¹ Hisy tsempane hitsimoke bakamity foto Jese, naho hisy rambone bakamity tahone hinday voane. ² Hitoboke ao amity ty Fagnahy Yaveh, ty fagnahy hamarea vaho hazavan-tsay, ty fagnahy ty fagnanara vaho here, ty fagnahy ty fahaia vaho tahotre Yaveh. ³ Ty aleone mba ho tahotre Tompo; tsy ho tsarae amize hisa ty masone re, na hanam-pakevetre amize ray ty sofine. ⁴ Fa kea, hitsara ty mahantra amity hamarea re naho hanam-pakevetre ara-drarene amity mpagnetre-bata ty tane. Hagnisy ty tane amity tsila-ketae ty vavane re, naho hamono ty raty fagnahy amity fofognay ty sognine. ⁵ Ty hamarea ro ho santira ty andilane, naho fatokia ro santira magnodidy ty valahane. ⁶ Naho ty amboan'ala hiara-hivelo amity anak'agnondry, naho ty leoparda hiara-miroro amity anak'ose, anak'agnombe, ty liona kele naho ty anak 'agnombe vondrake. Aja-kele ro hitarike iereo. ⁷ Ty agnombevave vaho ty bera le hiara-hiraoke, naho ty ana iereo hiara-miroro. Ty liona le hihina mololo manahake ty agnombe. ⁸ Hihisa eo andavake ty menara ty kolo, naho ty kolo nisara-nono hametrake ty tagnane eo andava ty mere. ⁹ Tsy hamere na handrava egne amity vohiko masy iaby iereo; satria ho feno fahaia Yaveh ty tane, hoe ty rano manaro ty riake. ¹⁰ Amize andro zay, le hitsanga hoe ty fagneva ho ahy ty vahoake ty foto Jese. Hipay aze reo firene naho ho bey hasy ty toera fitofane. ¹¹ Amize andro zay, le hagnabey ty tagnane ndraike ty Tompo mba hanaro reo sisa amity vahoakene ze mitoboke agne Asyria, Egypta, Patrosa, Kosa, Elama, Sinara, Hamata, naho reo nose ty Riake. ¹² Hametrake fagneva ho ahy reo firene Re naho hamory reo voaroake Israely vaho reo voaele Joda bakagne amity zorone efatre ty tane. ¹³ Hivalike ty fagniria Efraima Re, naho ho ravae ty falay Joda. Tsy hagniry Joda ty Efraima, naho Joda tsy halay Efraima sase. ¹⁴ Fa hizotro agne amity tazoa ty Filistina agne agnaratre kea iereo, naho hiara-hangalake ty vahoake agne antignana. Hanafike Edoma vaho Moaba iereo, naho hagnenke iereo ty vahoake Amona. ¹⁵ Hamoteke vatane agne amity riake Egypta Yaveh. Miarake amity tione mahamay le hagnofahofa ty tagnane eo amity Rano Eofrata Re naho hanarake zay ho sampane fito, ka afake hitsake miarake amity kapa zay. ¹⁶ Hisy lalam-bey ho ahy ty sisa amity vahoakene ze mihere bakagne Asyria, hoe ty nisia zay ho ahy Israely tamity niakara iereo bakagne amity tane Egypta.