¹ Nirehake tamiko Yaveh ty hoe:" Mangala vato pisake bey naho sorato amizay ty hoe:" Mahera-Salala-Hasi-Baza.' ² Hampikaike vavolombelo matoky hagnamare hoahy raho, le oria mpisoro, vaho Zakaria anadahy Jeberekia." ³ Nimbaeo amity mpaminane vave raho, naho nanagnanake ka niterake ajalahy re. Naho Yaveh nanao tamiko hoe:" Anovo hoe:' Mahera-Salala-hasi-baza.'ty agnarane. ⁴ Fa taloha ty hahaia ty kolo mikaike hoe:' babako,' vaho neneko,' ty mpanjaka ty Asyria le hangalake ty harea Damaskosy vaho ty babo ty Samaria." ⁵ Nirehake tamiko ndraike Yaveh hoe: ⁶ "Satria ty vahoake toy le nilietre ty rano misononoke Siloa, naho fale eo amin-dRezina vaho amity anadahy Remalia, ⁷ laha zao ty Tompo le hinday reo rano ty renerano ho eo amiereo, mahere vaho maro, ty mpanjaka ty Asyria vaho ty hasine iaby. Hoavy amireo fantsone iaby zay ka hahatondrake reo morone. ⁸ Ty Renerano le hamaoke manomboke ao amy Joda, hanondrake vaho hamakivaky, mandram-pahavy zay eo amity vozonao. Reo elane mivelatre le hameno ty borin-tane, ry Imanoela." ⁹ Ho torotoro nareo ry Vahoake. Midranjigna, ry firene lavitre iaby: vognono amity aly ty vatanareo naho torotoro; vognono ty vatanareo naho torotoro. ¹⁰ Manova fikasa, fa tsy ho lefe zay; magnakara lily, fa tsy ho lefe zay, fa miomba anay ty Zagnahare. ¹¹ Yaveh nirehake tamiko, niarake tamity tagnane mahere ze teo amiko, naho mampiambe ahy tsy hindeha amity lala ty vahoake toy. ¹² Ko atao ty hoe hevetre ty zaka ze atao ty vahoake toy ho hevetre, tsy hatahotre ze hatahorane riha, naho ko matahotre. ¹³ Fa Yaveh Tompo ty maro ro ameanao hasy ho masy; Re ro tokone hatahoranao, naho re ty tokone hangovitanao. ¹⁴ Ho lasa toera masy Re; fa ho vato famofoha Re, naho ho vatolampy hanafitohy ho ahy ty foko Israely, naho ho ahy ty vahoake Jerosalema le ho fandrike vaho rota Re. ¹⁵ Maro ro ho tafintohy amizay ka ho lavo naho ho rava, ho voafandrike ka halae. ¹⁶ Feheo ty fijoroako vavolombelo, naho asio tombo-kase ty fitana ofisialy, naho ameo reo mpianako zay. ¹⁷ Handy Yaveh raho, ty magnaja ty tarehene amity foko Jakoba; handy aze raho. ¹⁸ Ingo, zaho vaho reo anadahiko ty namea Yaveh ahy ho famantara vaho ho zaka-mahagaga ao Israely bakamy Yaveh Tompo ty maro, ze mitoboke eo amity Vohitse Ziona. ¹⁹ Hirehake aminao iereo hoe:" Agnontaneo reo mpahisake vaho reo mpisikily," reo ze tindrien-jaka mimonomono vaho mibisibisike kaike. Fa tsy tokone hagnotane ty Zagnaharene vao ty ndaty? Tokone hagnotane ty mate ho ahy ty velo vao iereo? ²⁰ Arake ty lala vaho ty fijoroa vavolombelo! Laha tsy mirehake zaka hoe zay iereo, le satria tsy mana ty hazava ty maray. ²¹ Handrio eo amity tane amity fijalea vaho ty hakerem-bey iereo. Laha fa kere iereo, le ho meloke naho hagnozo ty mpanjakane vaho ty Zagnahare, laha magnakatre ty tarehe iereo ambone. ²² Hagnente ty tane iereo ka hahisake ty fijalea, ty ieke, naho ty zavo mampijale. Ho roahe mbaeo amity tane ty fagnaliloa iereo.