¹ Tamity andro Ahaza anadahy Jotama anadahy Ozia, mpanjaka Joda, le niakatre nimbaeo Jerosalema ty Rezina mpanjaka Syria, vaho Pelza anadahy Remalia, mpanjaka Israely mba hananga aly amizay, fa tsy naharese zay iereo. ² Tinao tagne amity foko Davida fa niarake tamity Efraima ty Syriana. Nihovitre ty arofone, vaho ty arofo ty vahoakene, hoe reo hetae agne agnala hozogne ty tioke. ³ Le hoe Yaveh tamy Isaia hoe:" Miakara miarake amy Seara-jasoba anagnao lahy mba hanalaka i Ahaza eo amity fara ty lakan-drano kamory ambone, egne amity lala mbaeo amity baibo ty Mpanasa lamba. ⁴ Ambarao aze hoe:' Miambena, ko taitaitre, ko matahotre na ampitahore reo tampa-poroha roe mireake reo, amity helo Rezina vaho Syria, naho Pelza anadahy Remalia. ⁵ Syria, Efraima, naho ty anadahy Remalia le nanao heve-draty handiera anao; hoe iereo ty hoe: ⁶ "Andao tika hanafike Joda vaho hagnorohoro aze, ka ao tika hamaky aze naho hametrake ty mpanjakantika, ty anadahy Tabeala ao." ⁷ Hoe ty Tompo Yaveh hoe:"Tsy ho lefe zay; tsy hiseho zay, ⁸ satria Damaskosy ro loha Syria, naho Rezina ro loha Damaskosy. Ao agnate ty dime amby enem-polo tao, le ho torotoro ty Efraima naho tsy ho vahoake sase. ⁹ Samaria ro loha Efraima, naho ty anadahy Remalia ro loha i Samaria. Laha tsy mitoboke mafe amity finoa nareo, le azo antoke fa tsy ho voaaro.""' ¹⁰ Nirehake tamy Ahaza ndraike ty Tompo hoe: ¹¹ "Mangataha famantara amy Yaveh Zagnaharenao; mangataha zay amity laleke na amity halava ty ambone." ¹² Fa hoe Ahaza hoe:" Tsy hangatake raho, na hitsapa Yaveh." ¹³ Ka namale Isaia hoe:" Dranjigno, ry foko Davida. Tsy ampe anareo vao ty mitsapa ty fiareta ty vahoake? Tsy maintsy mitsapa ty fiareta ty Zagnahareko kea vao nareo? ¹⁴ Laha zao le ty Tompo vatane ro hagnomea famantara anareo: ingo, hobevoka ty ajalahy, hiterake ajalahy, naho hikaike ty agnarane hoe Imanoela. ¹⁵ Hihina rononomandre vaho tantele re laha fa mahay milietre ty raty naho mifily ty soa. ¹⁶ Fa aloha ty hahaia ty kolo milietre ty raty naho mifily ty soa, le ho rava ty tane reo mpanjaka roe ze natahoranareo reo. ¹⁷ Yaveh le hinday andro tsy mboe nisy zisikamity niala Efraima tamy Joda aminao, vaho ty vahoakenao, naho amity fokon-draenao__ho entene aminao eo ty mpanjaka Asyria." Amize andro zay Yaveh le hifioke laletre bakalavitre egne amity rano Egypta, naho tantele bakegne amity tane Asyria. ¹⁹ Hoavy iaby ie iaby naho hitoboke ambane egne amity baibo maike, egne agnivo ty harambato, egne amity vala fatike iaby, naho egne amity tane fihinanam-bilo iaby. ²⁰ Amize andro zay ty Tompo le hagnaratre amity meso hinofa tagne amoro ty rano Eofrata__ty mpanjaka Asyria__ty loha vaho ty volon-tomboke; hagnafake reo vaoke avao kea zay. ²¹ Amize andro zay, le hihare agnombe vave kele vaho agnondry roe ty ndaty, ²² naho noho ty hamaro ty ronono ze hamea iereo, le hihina rononomandre re, satria ty ndaty iaby tavela eo amity tane le hihina rononomandre vaho tantele. ²³ Amize andro zay, teo amzie nisy divay agnarivone teo amity sekele volafoty arivo, le tsy hisy na ino ino laha tsy fatike. ²⁴ Hindeha ho agne mba hihaza amity folese ty ndaty, satria ty tane iaby le ho fatike iaby. ²⁵ Hijano lavitre reo tamboho iaby ze navalike tamity fangaly iereo, noho ty tahotre reo fatike; fa ho toera fihinana ty biby hare vaho agnondry zay.