¹ Tamity tao nahafate Ozia mpanjaka, le nahisake ty Tompo nitoboke teo amity sezan-droandria raho; vaho agnabo ro ambone Re, naho nameno ty tempoly ty moron'akanjo lavane. ² Teo ambonene le nisy ty serafima; sambe mana elane ene iaby; ty roe nanako ty tarehene, ty roe hafa nanako ty tombone, naho ty roe nitilignane. ³ Nifampikaike iereo naho nanao ty hoe:" Masy, masy, masy, Yaveh Tompo ty maro! Zao iaby zao le feno ty hasine." ⁴ Nihozongozo tamity feo reo ze mitaray ty foto reo tokonam-baravara, naho feno deboke ty tragno. ⁵ Naho hoe raho ty hoe:"Loza! Robake raho satria lahilahy maloto sogny raho, naho nivelo teo amity vahoake maloto sogny, satria ty masoko le fa nahisake ty Mpanjaka, Yaveh, Yaveh tompo ty maro!" ⁶ Bakeo le nisy tamireo serafima nitily tamiko eo; nisy vaen'afo tegne antagnane, ze nalaene niarake tamity tandra tegne amity alitara. ⁷ Nikasike ty sogniko tamizay re naho nanao ty hoe:"Ingo, nikasike ty sogninao toy; afake ty helonao, naho vototre ty hadisoanao." ⁸ Naharey ty feo ty Tompo raho nanao ty hoe:" Ia ro tokone hiraheko; ia ro hindeha ho antika?" Le hoe raho ty hoe:" Intoy raho; iraho raho." ⁹ Hoe Re ty hoe:" Mindehana naho ambarao reo vahoake reo hoe:' Dranjigno, fa ko takare; henteo, fa ko fantare.' ¹⁰ Hamafeo ty arofo vahoake eo, naho anovo mare ty sofy iereo, naho anovo goa ty maso iereo. Laha tsy zay le mete hahisake amity masone iereo, haharey amity sofine, vaho hahay amity aforo iereo, naho bakeo hiakatre ka ho salama." Naho hoe raho,"Tompo o, zisike ombia vao?" Le hoe Re, ¹¹ Le hoe raho ty hoe:"Ry Tompo, zisike ombia?" Namale Re hoe:" Mandram-pirava ty tana, ka tsy hisy ndaty, naho ty tragno tsy hisy ndaty, naho ty tane haliolio vatane, ¹² naho Yaveh hampindeha lavitre ty ndaty, ka ho bey ty halio ty eo amity tane. ¹³ Na ty ampaha-folo ty ndaty tavela ao amizay aza, le ho potehe ndraike; manahake ty terebinta vaho oka tinampake ka misy tahone tavela, ty voa masy le ao amity fotone."