¹ Mihohoke ty Bela, miondreke ty Nebo; reo sampe iereo le ente ty biby hare vaho biby folahe. Reo sampe ze entenareo reo le enta-mavesatre ho ahy ty biby rerake. ² Miara-miondreke iereo, miara-mandohaleke; ka tsy mahavonje ty entane, naho iereo le fa lasan-ko azo. ³ Dranjigno raho, ry foko Jakoba, ry foko Israely sisa iaby, ze le fa nienteko taloha ty haterahanareo, le fa binabeko zisikagne antroke. ⁴ Eka ne le amity taom-piterahanareo aza, le tsy miova raho, naho mandra-paha foty ty volonareo le hinday anareo raho. Nanao anareo Raho ka hitrotro anareo; hinday anareo Raho naho hagnavotre anareo. ⁵ Aminia ro hampitovize nareo Amiko? Ia ro dinehenareo fa mitovy amiko, ka azo ampitovize zahay? ⁶ Nagnily volamena bakao agnate kitapo ty vahoake naho nandanja zay teo amity fadanja. Magnarama mpanefe Vy iereo, naho mamboatre zay ho zagnahare re, mihohoke vaho manompo zay iereo. ⁷ Magnakatre zay eo antsorone iereo ka minday zay, mametrake zay eo amity toerane iereo, mitsanga eo amity toerane zay naho tsy mihetseke eo. Mitaray amizay iereo, kanefa tsy afake mamale na mamonje na ia ia amity lozane zay. ⁸ Hevero ty miomba reo zaka reo, ko atao tsinontsino reo, ry mpavande! ⁹ Dineho ty miomba reo zaka vaho tsy ela, reo tamity fotoan-dasa, fa Zaho ro Zagnahare, naho tsy misy hafa, Zaho ro Zagnahare, naho tsy misy na ia ia mitovy amiko. ¹⁰ Ambarako agne amboalohane ty fiafara, naho aloha zay mboe tsy niseho; Zaho manao ty hoe:" Ho lefe ty fikasako, naho hanao arake ze fagniriako Raho." ¹¹ Kaiheko bakagne antignana ty voro mpimpay, naho ty ndaty voafiliko bakagne amity tane lavitre; eka, le fa rinehako; ka hataoko; le fa natoloko, ka hataoko avao kea zay. ¹² Midranjigna Ahy, nareo ry vahoake mafe taoke, ze lavitre ty fanoa ty mahity. ¹³ Mampiharine ty hamareako Raho; tsy lavitre zay, naho tsy mandy ty famonjeako; naho hagnomea ty famonjea ho ahy Ziona vaho ty hasoako ho ahy Israely Raho.