¹ Zao ro safa Yaveh amity voahosone, amy Kyrosy, ze taneko amity tagnane ankavana, mba haharese reo firene eo agnoloane, mba hampilavo lefo ty mpanjaka, naho mba hamoha ty varavara eo agnoloane, mba hijano hivoha reo vavahady. ² "Hindeha eo agnoloanao raho naho hampahity reo vohitse; ho tampatampaheko reo varavara varahy naho ho poteheko reo bara vy, ³ naho hameako anao reo harea ty ieke vaho ty harea nihaja, mba hahaianao fa Zaho, Yaveh, ro mikaike anao amity agnaranao, le Zaho, ty Zagnahare Israely. ⁴ Noho ty amy Jakoba mpanompoko, vaho Israely voafiliko, le nikaike anao tamity agnaranao Raho: nagnomea anao agnaran-kasy, na le tsy nahay ahy aza riha. ⁵ Zaho ro Yaveh, naho tsy misy hafa; tsy misy Zagnahare hafa tsy raho. Zaho ro haniky anao hoamity aly, na le tsy nahay Ahy aza riha; ⁶ mba hahaia ty ndaty zisikagne amity fivakia ty andro, ka le zisikagne ahandrefa, fa tsy misy zagnahare hafa tsy raho: Zaho ro Yaveh, naho tsy misy hafa. ⁷ Zaho ro nanao ty mazava naho nanao ty maieke; zaho ro minday filamina naho mahavy loza; Zaho ro Yaveh, teie manao ze zaka iaby zay. ⁸ Nareo ry lagnitre, ao hagnora bakagne ambone! Ao ty raho hagnora hamarea. Ao ty tane hitioke zay, mba hitsimoke miarake amizay famonjea, naho hiara-hitiry amizay ty hamarea. Zaho, Yaveh, ro nanao iereo. ⁹ Loza hoahy ze mialy amize nanao aze, amize hoe ty velagne tane eo agnivo reo velagne tane hafa eo amity tane avao! Feie vao ty tanemanga mba mirehake amity mpanefe tanemanga hoe:' Ino injato amboarenao?' na 'Tsy mahafehe zay ty asanao'? ¹⁰ Loza hoahy ze mirehake amity rae ty hoe:' Ino ty aterako?' na amin-ampela ty hoe:' Ino ty akarenao?' ¹¹ Ezao ro safa Yaveh, ty Raike Masy Israely, Mpahare aze:' Nagnino riha ro magnotane ty amize ataoko ho ahy ty anako? Mirehake amiko za tokone hatao mikasike reo asa ty tagnako vao riha? ¹² 'Zaho ro nanao ty tane naho nanao ty ndaty teo amizay. Ty tagnako ro namelatre ty lagnitre, naho Zaho ro nandily ty kinta iaby mba hiboake. ¹³ Zaho ro nanao Kyrosy tamity hamarea, naho zaho ro hanalama ty lalane iaby. Re ro hananga ty tanako; re ro hampoly reo ndatiko sesetane, naho tsy misy viline na vandevande,"'hoe Yaveh tompo ty maro. ¹⁴ Zao ro safa Yaveh:" Ty filiram-bola Egypta vaho ty entam-baro Etiopia amireo Sabeana, ze ndaty lava ranjo, le ho ente aminao eo. Ho anao reo. Hagnorike anao rey, hindeha miarake amity gadra vy. Hihohoke aminao eo rey ka hifona aminao hanao ty hoe:' Miarake aminao vatane ty Zagnahare, naho tsy misy hafa tsy Re."' ¹⁵ Mare vatane fa Riha ro Zagnahare ze magnaja ty vatanao, ry Zagnahare Israely, Mpamonje. ¹⁶ Hiara-megnatre vaho ho afa-baraka iaby rey; reo ze manao sampe voasokitre le hindeha amity fahafaham-baraka. ¹⁷ Fa havota Yaveh amity famonjea zisikezay Israely; tsy ho megnatre na ho afa-baraka sase riha. ¹⁸ Zao ro safa Yaveh, ze nanao ty lagnitre, ty Zagnahare mare ze nanao ty tane vaho nanao zay, ze nagnore zay. Re ro nanao zay, tsy manahake fakofako, fa nataone mba ho azo hitoboha:" Zaho ro Yaveh, naho tsy misy hafa. ¹⁹ Tsy nirehake moramora, tagne amity toera mihaja Raho; tsy mba nirehake tamity foko Jakoba Raho ty hoe:' Paio fahatane Raho!' Zaho ro Yaveh, ze mirehake mare; zaka mare ro ambarako. ²⁰ Avorio ty vatanareo ka avia! Miaraha-mivory, nareo mpifindra-tana bakagne amireo firene! Tsy mba manam-pahaia, reo ze minday sare voasokitre vaho mivavake amity zagnahare ze tsy afake mamonje. ²¹ Miharinea naho atalilio amiko zay, ento ty porofo! Ao iereo hiara-himonomono. Ia ro nanoro zay zisike ty ela? ro nitory zay? Tsy Zaho Yaveh vao? Tsy misy Zagnahare laha tsy Zaho, le Zagnahare mare vaho Mpamonje; tsy misy hafa tsy zaho. ²² Miheregna amiko naho ao ho voavonje, ry fara ty tane iaby; fa Zaho ro Zagnahare naho tsy misy hafa tsy Raho. ²³ Mifanta amity vatako Rao, mirehake ty lily mareko, naho tsy hihemotre zay:' Amiko ro hiforetre ty ongotre iaby, naho hifanta ty lela iaby. ²⁴ Hitalily ty Amiko iereo ty hoe:" Ao amy Yaveh arere avao ty famonjea vaho ty here."""Ho megnatre iaby reo ze meloke amine. ²⁵ Ao amy Yaveh ro hagnamarea ty foko Israely iaby; ao amine ro hirehareha iereo.