¹ Midranjigna amizao, ry Jakoba mpanompoko, vaho ry Israely, ze finiliko: ² Zao ro safa Yaveh, Re ze nanao anao vaho namolavola anao tao antroke vaho ze hamonje anao hoe:" Ko matahotre, ry Jakoba mpanompoko; vaho riha, ry Jesorona, ze finiliko. ³ Fa hampipo-drano amity tane maike, vaho rian-drano amity tane maike raho; hampipoke ty fagnahiko amity ananao Raho, naho ho amireo ananao ty fitahiako. ⁴ Hitsimoke eo amity akata, manahake ty hetae malahelo eo agnila ty rian-drano iereo. ⁵ Ty raike hirehake hoe:' Ahy Yaveh raho', naho ty hafa hikaike mafe ty agnara Jakoba, naho ty hafa hanoratre eo amity tagnane ty hoe:' Ahy Yaveh', ka hikaike ty vatane amity agnara Israely." ⁶ Zao ro safa Yaveh__ty Mpanjaka Israely vaho Mpagnavotre aze, le Yaveh Tompo ty maro:" Zaho ro voalohane, naho Zaho ro farane; naho tsy misy Zagnahare laha tsy Zaho. ⁷ Ia ro manahake Ahy? Ao re hirehake zay ka hagnazava Amiko reo zaka ze niseho zisikamity nagnoregnako ty vahoakeko taloha, naho ao iereo hitalily reo zaka hoavy. ⁸ Ko matahotre na misalasala. Feie vao Raho tsy le fa nagnombara taminareo taloha tagne, ka nitalily zay? Vavolombelo nareo: Feie vao misy Zagnahare laha tsy Zaho? Tsy misy Vatolampy hafa; tsy mahay na raike aza Raho." ⁹ Te iaby ze mamboatre sampe le tsinontsino; zaka-foa reo zaka teane; ty vavolombelo iereo le tsy mahisake na mahay na ino ino, naho hafahem-baraka iereo. ¹⁰ Ia ro hamolavola Zagnahare na hamboatre sampe te zaka-foa? ¹¹ Ingo, ty mpiray-miasa amine iaby le hafahem-baraka iaby; reo mpanao asa tagna le ndaty avao. Ao iereo hiara-hitsanga; hatahotre iereo naho hafahem-baraka. ¹² Ty mpanefe le miasa amireo fiasane, manao zay, miasa amity are. Manao zay amity fikala naho miasa zay amity sandrine mahere re. Kere re, ka mihakele ty ozane, tsy minon-drano re ka lasa rerake. ¹³ Manao ty hetae amity fagnitia ty mpandrafetre, naho manokitre zay amity fandrake. Manao zay amireo fiasane re naho mamantatre zay amity Kompa. Manao zay ho hoe ty sare ndaty re, manahake ty ndaty maninto, mba hitoboke ao antragnone zay. ¹⁴ Mandily sedera re, na mifily hetaen-Kypreso na hetae terebinta. Mangalake hetae agne agnala hoaze re. Mambole keseke re naho mampitiry zay ty ora. ¹⁵ Le ampiasae ty ndaty handreheta afo vaho hamindroa zay. Eka, mandrehetre afo re ka manao mofo. Le manao zagnahare amizay re ka mihohoke amizay; manao sampe re ka mihohoke amizay. ¹⁶ Magnoro ty ilane amity hetae handreheta afo re, mitono ty henane amizay. Mihina re ka entsake. Mamindro re ka manao hoe:" Aha, mafana raho, le fa nahisake afo raho." ¹⁷ Amity hetae sisa tavela ro agnamboarane zagnahare, ty sare voasokitre; mihohoke eo amizay re vaho matahotre zay, naho mivavake amizay manao hoe:" Avoto raho, fa riha ro zagnahareko." ¹⁸ Tsy mahay, na mahatakatre iereo, fa goa ty maso iereo ka tsy mahisake, naho tsy mahay ty arofo iereo. ¹⁹ Tsy misy midineke, na mahazo iereo ka manao ty hoe:" Le fa nagnoro ty ilane tamity hetae tao agnate ty afo raho; eka, le fa nanao mofo teo ambone ty arene avao kea raho. Le fa nitono hena teo amity are raho ka nihina. Amizao, tokone hanao zaka raty amity hetae hafa ilane mba ho tompoe vao raho? Tokone hihohoke amity vatan-ketae vao raho?" ²⁰ Manahake ty hoe mihina lavenoke re; mamio aze ty arofone voafitake. Tsy afa-mamonje ty vatane re, na manao ty hoe re:" Ty zaka antagnako havana eto toy le zagnahare tsy ie." ²¹ Dineho ty miomba reo zaka reo, ry Jakoba, vaho ry Israely, fa mpanompoko riha: le fa nanao anao Raho; mpanompoko riha: Ry Israely, tsy ho halignoko riha. ²² Vinonoko, manahake ty raho-mateve, reo asa vandenao, naho manahake ty raho, reo hadisoanao; miheregna amiko, fa le fa nagnavotre anao Raho. ²³ Miantsa, nareo ty lagnitre, fa Yaveh ro nanao zay; mikoraha, nareo ry lahilahy ty tane. Mifalea amity fiantsa, nareo ry vohitse, riha ry ala amity hetae iaby ao; le fa navota Yaveh Jakoba, ka hahisake ty hasine ao Israely. ²⁴ Zao ro safa Yaveh, Mpagnavotre anao, Re ze nanao anao zisikao antroke:" Zaho ro Yaveh, ze nanao ty zaka iaby, Zaho arere ro nagnenja ty lagnitre, Zaho arere ro namboatre ty tane. ²⁵ Zaho ty mandrava ty famantara reo mpitsaratsara avao vaho ze magnafa-baraka reo ze mamaky famantara; Zaho ty mandrava ty hamarea ty mare vaho manao ty toro-heve iereo ho hagegea. ²⁶ Zaho, Yaveh, ty nagnamafe reo reha ty mpanompone naho mampandrio reo vinavina reo irake, ze mitalily amy Jerosalema hoe:' Hitoboha re', naho ahy reo rova Joda ty hoe:' Hatsanga ndraike iereo, naho hagnare ty haravane raho'; ²⁷ ze mitalily amity riake laleke ty hoe:' Ao ho maike, naho ho maiheko reo ranonao.' ²⁸ Yaveh Ty aze mirehake i Kyrosy hoe:' Re ro mpiarake agnondriko, hanao ty fagniriako iaby re, handily ty amy Jerosalema Re ty hoe:' Hatsanga ndraike re' naho ty amity tempoly hoe:' Ao haore reo fotoranao."'