¹ Fa amizao le zao ro safa Yaveh, Re ze namoro anao, ry Jakoba, naho Re ze nagnamboatre anao, ry Israely:" Ko matahotre, fa le fa nagnavotre anao Raho; le fa nikaike anao tamity agnaranao Raho, ahy riha." ² Laha mindeha mamakivaky ty rano nareo, le ho eo aminareo raho; naho amireo renerano, le tsy hanafotre anareo rey. Laha fa mindeha mamakivaky ty afo nareo le tsy ho may, naho tsy handrava anareo ty lelan'afo. ³ Fa zaho ro Yaveh Zagnaharenareo, ty Raike Masy Israely, Mpamonjenareo. Nameako ho hoe ty ty vilim-pagnavotanareo Egypta, Etiopia vaho Seba ho takalonareo. ⁴ Fa lafo-vily vaho miavake eo amasoko nareo, teako nareo; laha zao le hagnomea ndaty ho takalonareo Raho, naho vahoake hafa ho takalo ty ainareo. ⁵ Ko matahotre, fa miomba nareo raho; hinday ty fokonareo bakagne antignana raho, naho hamory anareo bakagne ahandrefa. ⁶ Hitalily amity avaratre Raho hoe:' Afaho iereo', naho amity antimo hoe:' Ko misy tana;' Ento bakagne lavitre reo anadahiko, naho reo anakampelako bakagne amireo faritane lavitre ty tane, ⁷ ty kirai-kiraike kinaike tamity agnarako, ze hinareko ho ahy ty hasiko, ze namboareko, egne, ze nanoeko. ⁸ Akaro reo ndaty ze goa, na le mana-maso aza iereo, vaho reo maregne, na le manan-tsofy aza iereo. ⁹ Miara-mivory ty firene iaby, naho mivory ty vahoake. Ia amiereo ro afake nitalily zay vaho nitalily taminay reo zaka taloha? Ao iereo hinday ty vavolombelone mba hagnamare iereo, ao iereo hidranjy vaho hagnamafe hoe:' Mare zay.' ¹⁰ Magnombara Yaveh ty hoe:" Nareo ro vavolombeloko, naho mpanompoko ze finiliko, ka tokone hahay vaho hino ahy nareo, naho hahay fa Zaho ro Ie. Tsy nisy zagnahare voaforo talohako, naho tsy hisy afarako ao. ¹¹ Zaho, Zaho ro Yaveh, naho tsy misy Mpamonje hafa tsy zaho. ¹² Le fa nitalily raho, namonje, naho nitalily ampahibe-maso, naho tsy misy zagnaharen-kafa eo aminareo. Nareo ro vavolombeloko," hoe Yaveh," Zaho ro Zagnahare. ¹³ Zisikamio andro o le Zaho ro Ie, naho tsy misy afake magnavotre ania ia eo antagnako. Miasa raho, naho ia ro afake hamadike zay?" ¹⁴ Zao ro safa Yaveh, Mpagnavotre anareo, Ty Raike Masy Israely:" Fa noho ty aminareo ro handefasako agne Babylona vaho hitarihako iereo iaby hizotro hoe ty mpilay, hamadiha ty fanoroa reo Babylona hafalea ho antsam-pitagnia. ¹⁵ Zaho ro Yaveh, Ty Raike Masinareo, Mpamoro Israely, Mpanjakanareo." ¹⁶ Zao ro safa Yaveh( ze namoha lala namakivaky ty riake vaho lala teo amity rano mahere, ¹⁷ ze nagnakatre ty kalese vaho ty soavale, ty tafike vaho ty miaramila mahere. Niara-lavo iereo; tsy hitsanga sase iereo; mate iereo, mitsilopelope manahake ty lahin-jiro.) ¹⁸ "Ko midineke miomba rey zaka taloha reigne, na mahatiaro reo zaka taloha le fa ela. ¹⁹ Ingo, Zaho le fa manao zaka-vaovao; le fa hanomboke miseho zay amizao; tsy mahay zay vao nareo? Hanao lala agne antane efetre vaho rian-drano agne antane maike Raho. ²⁰ Hagnomea hasy Ahy ty bibin'ala ambaibo, reo amboan'ala vaho reo ostritsa, satria magnomea rano agne antane maike raho, naho renerano agne antane efetre, mba ho nome ty vahoake voafiliko, ²¹ reo vahoake ze vinolavolako ho ahy avao, fa mete hitalily ty antsa Ahy iereo. ²² Fa tsy nikaike Ahy riha, ry Jakoba; rokake ty Amiko riha, Ry Israely. ²³ Tsy mba ninday tamireo agnondrinareo ho fagnatetre oroa hoahy nareo, na nagnomea hasy Ahy tamireo soronareo. Tsy nagnavesatre anareo tamity fagnatetre vare Raho, na nandrerake anareo tamity hatake liten-ketae magnitre. ²⁴ Tsy nivyly veromagnitre ho ahy tamity vola nareo, na nagnily tamiko ty vondra reo soronareo; fa nagnavesatre Ahy tamity hadisoanareo nareo; nandrerake ahy tamireo asa ratinareo. ²⁵ Zaho, eka, Zaho, ro aze mamono ty fandikan-dilinareo noho ty Amiko avao; naho tsy hahatiaro reo hadisoa nareo sase raho. ²⁶ Ampahatiarovo Ahy ze niseho. Ao tika hiara-hilahatre; atoro ty dinenareo, fa mete ho voamare ho tsy manan-tsiny nareo. ²⁷ Nidiso ty raenareo voalohane, naho navande tamiko reo olobey nareo. ²⁸ Laha zao le holotoeko reo manam-pahefa masy; hanao Jakoba ho rava vatane Raho, naho Israely amity fagnafaham-baraka mahere asa."