¹ Ingo, ty mpanompoko, ze tanako; ty finiliko, ao amine ro andrambesako saotre. Le fa natoboko teo amine ty Fagnahiko; hinday rarene eo amireo firene re. ² Tsy hitaray na hikorake re, na hanao ty feone ho rey egne andala. ³ Tsy ho tampahene ty volotara torotoro, naho tsy ho vonoene ty afo ty jiro mirehetre: hanao ty rarene amim-patokisa re. ⁴ Tsy hitombo hareraha re na ho kivy mandram-pametrahane ty rarene etoy ambone ty tane; naho ty tane amorontsirake hiambe ty liline. ⁵ Zao ro Safa Yaveh Zagnahare__ze namoro ty lagnitre naho nagnenja reo, ty nanao ty tane vaho iaby ze vokarene, ze magnomea fofognay ho ahy ty ndaty amizay naho fiaigna hoahy reo ze miay eo amizay hoe: ⁶ "Zaho, Yaveh, le fa nikaike anao tamity hamarea naho hita ty tagnanao. Hiambe anao Raho naho hametrake anao hoe ty fagnenkea hoahy ty ndaty, manahake ty hazava hoahy reo Jentilisa, ⁷ mba hamoha ty maso ty goa, mba hagnafake reo gadra ao amity tragno maieke, naho bakamity tragno fitoboha reo ze mitoboke ao amity ieke. ⁸ Zaho ro Yaveh, zay ro agnarako; naho ty hasiko tsy ho zaraeko amity hafa na ty fiantsa Ahy ho amity sampe voasokitre. ⁹ Ingo, le fa lasa ty zaka taloha, amizao hagnombara zaka-baovao aminareo raho. Aloha ty hanomboa reo le hirehake anareo mikasike reo raho." ¹⁰ Miantsa ansta vaovao hoahy Yaveh, naho ty fiantsane zisikagne amity fara ty tane; nareo ze mbaeo amity riake, vaho iaby ze amine ao, reo tane amorontsirake, nao reo ze mivelo agne. ¹¹ Ao hitaray ty efetre vaho reo tana, ty tana ze itoboha Kedara, le hikorake amity fahalea! Ao hifale ty vahoake Sela; ao hikorake bakeo ambone ty vohitse iereo. ¹² Ao hagnomea hasy Yaveh iereo naho hitalily ty fiantsane amity tane amorontsirake. ¹³ Hiakatre manahake ty mpialy ty Yaveh; manahake ty lahilahin'aly harisy ty zotom-pone Re. Hikorake Re, eka, hitsero amity korak'aline Re; hatorone ty fahavalone ty herene. ¹⁴ Le fa nitsy raho zisikela; le fa nitsy Raho naho niambe ty vatako; amizao hitaray hoe ty ampela miterake raho; miehakehake tsy afake miay. ¹⁵ Hataoko maike ty vohitse vaho ty tazoa naho hagnamaike ty zaka-mitiry iaby; naho hamalike ty rano ho nose Raho naho hagnamaike ty dobon-drano. ¹⁶ Hinday ty goa amity lala ze tsy hay iereo Raho; amity lala ze tsy hay iereo ro hitarihako iereo. Hamadike ty ieke hazava eo agnoloa iereo raho, naho hanao ty toera ty meloke ho mare. Reo zaka reo ro hataoko, naho tsy hiala iereo Raho. ¹⁷ Hihere iereo, naho ho afa-baraka vatane, reo ze matoky ty saren-jaka voasokitre, ze mirehake ty saren-jaka nirereke tamity vy hoe:" Nareo ro zagnaharenay." ¹⁸ Midranjigna, nareo ry maregne; naho magnentea, nareo goa, mba hahisake. ¹⁹ Ia ro goa nefa mpanompoko? Na maregne hoe ty mpinday talily ty raeko? Ia ro goa manahake ty naman-pagnenkeako, na maregne manahake ty mpanompo Yaveh? ²⁰ Maro ty zaka hisanareo, feie tsy takanareo; manongilan-tsofy, nefa tsy misy maharey. ²¹ Nahafale Yaveh ty miantsa ty hamareane naho ty magnomea hasy ty liline. ²² Nefa toy le vahoake nangalare vaho voarebake; voafandrike agne amity lavake iaby iereo, nitana ho azo tao ampigadra; le fa lasa voarebake iereo ka tsy misy na ia ia hagnavotre aze, naho tsy misy mirehake hoe:" Aheregno iereo!" ²³ Ia aminareo reo ro hidranjy zay? Ia ro hidranjy vaho haharey amity hoavy? ²⁴ Ia ro nagnomea Jakoba ho ahy reo lahilahy, naho ty Israely ho amity mpandrava? Feie vao zay tsy Yaveh, ze le fa nidisoantika, ze niliere iereo indeha ty lalane, naho ze niliere iereo horihe ty liline? ²⁵ Laha zao le nailine tamiereo ty fireheta ty helone, amity fandrava ty aly. Niredareda nagnodidy iereo zay, nefa tsy nahay zay iereo; ka nagnoro iereo zay, nefa tsy rinae iereo agnarofo zay.