¹ "Midranjigna ampilamina magnoloa ahy, nareo moron-tsirake; ao hagnavao ty herene reo firene; ao iereo hamonje marine naho hirehake; ao tika hiarake mba hifandahatre vaho hialy hevetre. ² Ia ro nanao ty raike bakagne antignana, nikaike aze ampimarea ho amity fanompoane? Manolotre ty firene hoaze Re naho magnampe aze haharese reo mpanjaka. Mivalike amiereo ho deboke amity mesone re, manahake ty mololo tiofe ty tioke amity folesene. ³ Magnia iereo re ka tafita soa avao, tamity laka soa ze tsy nilia ty tombone. ⁴ Ia ro nanao vaho nahavita reo asa reo? Ia ro nampikaike reo foko hatra amboalohane? Zaho, Yaveh, ro voalohane, naho miarake amireo farane, Zaho ro Ie. ⁵ Nahisake reo nose ka natahotre; mihovitre ty fara ty tane; namonje iereo ka avy. ⁶ Sambe magnampe ty namane ty ndaty iaby, naho ty ndaty iaby nifampirehake hoe:' Mimafea.' ⁷ Ka le magnamafe reo mpanefe volamena ty mpandrafetre, naho ze miasa amity fikala mahamafe ze miasa amity riandria, mirehake ty solohoto ty hoe:' soa zay.' Finehe iereo tamity fatiby zay mba tsy hihozo. ⁸ Fa riha, ry Israely, mpanompoko, ry Jakoba ze le fa finiliko, foko Abrahama namako, ⁹ riha ze hevereko bakamity fara ty tane, naho ze kinaiko bakamireo toera lavitre, naho ze nirehafeko ty hoe:' Mpanompoko riha;' le fa nifily anao Raho naho tsy niliereko riha. ¹⁰ Ko matahotre, fa mboe anao raho. Ko mitebetebe, fa Zaho ro Zagnaharenao. Ho mafeko riha, naho hagnampe anao raho, naho hanoha anao amity tagnako ankavana mare raho. ¹¹ Ingo, ho megnatre vaho ho afa-baraka, reo iaby ze meloke taminao; ho hoe ty tsy misy antone iereo naho ho mate, reo iaby ze mandietre anao. ¹² Hipay riha nefa tsy hahisake reo ze nifandahatre taminao; reo ze nialy taminao le ho hoe ty tsy misy antone, vatane tsy misy antone. ¹³ Fa Izaho, Yaveh Zagnaharenao, ro hita ty tagnanao ankavana, mitalily aminao ty hoe:' Ko matahotre; fa hagnampe anao raho.' ¹⁴ Ko matahotre, riha ry Jakoba soko, naho nareo ndaty Israely; fa hagnampe anareo raho__zay ro talily Yaveh, mpagnavotre anareo, ty Raike Masy Israely. ¹⁵ Ingo, ataoko hanahake ty laro vy masio riha, vaho naho roe lela; hagnisy reo vohitse riha naho hanorotoro reo; hataonao ho hoe ty afoka reo tazoa. ¹⁶ Hikororoke iereo riha, naho ty tioke ninday iereo hiala; hizara iereo ty tioke. Hifalefale amy Yaveh riha, hifalefale amity raike Masy Israely. ¹⁷ Mipay rano reo ore vaho mahantra, kanefa tsy misy, naho ty lela iereo le ho maike noho ty aran-drano; Zaho, Yaveh, ro hamale ty vavake iereo; Zaho, Ty Zagnahare Israely, le tsy hahafoe iereo. ¹⁸ Hahavy ty rano hily amity lavake raho, naho loharano eo agnivo ty baibo; hataoko dobon-drano ty tane ela, naho ty tane maike ho loharano. ¹⁹ Agne amity tane efetre ro hametrahako reo sedera, akasia, rotre, naho ty hetaen'Oliva. Hametrake ty Kypreso egne amity gebo ty tane ela, miarake amireo keseke vaho reo hetae Kypreso raho. ²⁰ Hanao zay raho mba hahisake, hagnenke, naho hiara-hahatakatre ty ndaty, fa ty tagna Yaveh ro nanao zay, naho ty Raike Masy Israely ro namoro zay. ²¹ "rehafo ty mikasike anao," hoe Yaveh," atoro ty hevenao soa vatane ho ahy reo sampenao," hoe ty mpanjaka Jakoba. ²² Ao iereo hinday ty heve iereo avao; ampandroso iereo naho ambarao aminay ze hiseho, mba hahaianay soa reo zaka reo. Anovo hatalily iereo aminay reo talily dinehe mialoha, mba hahafahanay manao iereo ho fitaratre vaho hahaianay ty fomba nahalefea rey. ²³ Ambarao reo zaka miomba ty hoavy, mba hahaianay fa zagnahare nareo; manova zaka soa na raty, mba hatahotre vaho hieke vola zahay. ²⁴ Ingo, tsy misy antone; ty raike ze nifily anareo le raty. ²⁵ Le fa nananga raike bakagne avaratre Raho, naho niavy re; bakagne amity fiakara ty masoandro ro hikaihako ze mikaike ty agnarako, naho handia reo mpandily hoe ty fotake re, hoe ty mpanefe tanemanga mandialia tanemanga. ²⁶ Ia ro nitalily zay zisikagne amboalohane, mba hahaianay? Aloha ze andro zay, mba hirehafanay ty hoe:" Mare re?" Eka mare, tsy nisy nanao zay ho lily iereo, eka, tsy nisy nanoro anareo nirehake raraha. ²⁷ Hoe raho tamy Ziona tamity voalohane:' Ingo, intoa iereo;" nandefa mpinday talily tagne Jerosalema raho. ²⁸ Laha fa magnete raho, le tsy misy na ia ia, na ty raike eo amiereo ze afake magnomea toro-hevetre soa, zay, afake hamale rehake, laha fa magnontane raho. ²⁹ Ingo, tsy misy antone ie iaby, naho ty asa iereo le tsy misy antone; tioke vaho zaka foa ty sare mitily iereo.