¹ Hamafeo, hamafeo ty vahoakeko,"hoe ty Zagnaharenareo. ² "Mirehafa mora amy Jerosalema; naho rehafo amine fa le fa nijano ty aline, fa vototre ty helone, fa le fa nandrae roe ambone tegne antagna Yaveh re tamity hadisoane iaby." ³ Nisy feo nikaike mafe hoe:" Vognono ty lala Yaveh agne agnefetre; manova lalam-bey mahity agne amity tane foa ho ahy ty Zagnaharentika." ⁴ Ty baibo iaby le hakare, naho ty vohitse vaho tazoa iaby le hakare; naho ty tane ala ho lembalemba, naho reo tane saro-dala hizare gebo; ⁵ naho ty hasy Yaveh le hampahaie, naho ty vahoake iaby hiarake hahisake zay; fa ty vava Yaveh ro nirehake zay. ⁶ Nisy feo nanao hoe:" Kaiho." Nisy raike namale hoe:" Ino ro kaike tokone hataoko?" "Ty nofo iaby le akata, naho fifagnenkea iereo le hoe ty folera egne ambaibo. ⁷ Maike ty akata naho malazo ty folera laha fa mitioke eo amizay ty fofo gnay nagnahare; azo antoke fa akata ty ndaty. ⁸ Maike ty akata, malazo ty folera, fa ty reha ty Zagnaharentika le haharetre zisikagne." Miakara egne amity vohitse agnabo, ry Ziona, mpinday vaovao mahafale. Magnakatre feo mafe, ry Jerosalema. Riha ty minday reo vaovao mahafale, akaro ty feonao, ko matahotre. Ambarao amireo tana Joda hoe:" Io ro Zagnaharenareo!" Ingo, ty Tompo Yaveh avy hoe ty lahilahy mpialy niakatre mpaharese, naho ty sandrine mahere ro handily ho aze. Ingo, ty valesoanay miarake amine, naho reo ze navotane le mindeha eo agnoloane. ¹¹ Hamaha ty agnondry aman'osene hoe ty mpiarake agnondry Re, hamory reo agnondrine eo antsandrine Re, ka hinday reo ao agnarofone, naho hitarike amin-kasoam-pagnahy reo agnondry vave mampinono reo anane. ¹² Ia ro nagnametatre ty rano teo antagnane, nagnametatre ty lagnitre tamity zehe ty tagnane, nita ty debon-tane tagnate haro, nandanja ty vohitse tamireo fandanja, na reo tazoa tamity moza? ¹³ Ia ro le fa nahatakatre ty eretrere Yaveh, na nanoro lala Aze hoe ty mpagnomea hevene? ¹⁴ Bakaminia ro le fa nangalane toro-lala? Ia ro nagnanatre Aze ty fomba fanoa zaka amity tokone ho ie, naho nagnanatre Aze fahaia, na nanoro Aze ty fomba fahaia? ¹⁵ Ingo, reo firene le hoe ty rano mitete indraike agnate siny, naho niraesene hoe ty deboke eo ambone ty fandanja; ingo, lanjaene hoe ty teboke kele reo nose. ¹⁶ Libanona le tsy ampe ho roa, na reo bibin'alane tsy ampe atao fagnatetre oroa. ¹⁷ Ty firene iaby le tsy feno eo agnoloane; reo le rinaene hoe ty tsy misy. ¹⁸ Aminia zay ro hampitovie nareo amin'Agnahare? ¹⁹ Sampe! namolavola zay ty mpanao asa-tagna: ty mpanefe volamena le nanao takela-bolamena vaho nanefe rojo volafoty hoahy zay. ²⁰ Mba hanova fagnatetre le misy raike mifily hetae tsy mete lo; mipay mpanao asa-tagna mahay re mba hanao sampe te tsy mete mirotsake. ²¹ Tsy hainareo vao? Tsy mboe reinareo vao? Tsy le fa nirehafe taminareo tagne amboalohane vao zay? Tsy le fa takanareo vao zay tamity fagnoregna ty tane? ²² Re ty arere mitoboke ambone ty raho ty tane; naho ty vahoake le hoe ty valala eo agnoloane. Nandrovitre ty lagnitre hoe ty lamba Re naho nanjara reo hoe ty tragno hitoboha. ²³ Nampihe reo mpandily hoe ty tsy misy Re naho nanao reo mpandily ty tane ho tsy misy antone. ²⁴ Vaho nambole iereo, vaho nafafe, ty sampagna reo le vaho nitiry tamity tane, laha fa nitioke teo amiereo Re ka nalazo reo, naho niente ty tioke hoe ty mololo iereo. ²⁵ Aminia zay ro hampitovie nao amiko, ia ro mitovy amiko?" hoe ty Masy. ²⁶ Henteo ty lagnitre! Ia ro namoro reo kinta iaby reo? Magnakatre iereo amity laharane Re naho mikaike aze iaby amity agnarane. Tamity habey ty herene vaho tamity tanja ty fahefane, le tsy nisy raike tsy niakatre. ²⁷ Nagnino riha, ry Jakoba, ro nirehake vaho nagnomara tamy Israely hoe:" Ty lalako le mihaja amy Yaveh, naho ty Zagnahareko le tsy voakasike ty hamareako?" ²⁸ Tsy hainareo vao? Tsy reinareo vao? Ty Zagnahare maharetre zisikezay, Yaveh, ty namoro reo vazan-tane, le tsy vozake na rerake; tsy misy farane ty fahaiane. ²⁹ Magnomea here ty rerake Re; naho magnomea here vao hoahy ze marare. ³⁰ Na ty kele aza le ho lasa vozake vaho rerake, naho reo ajalahy le ho tafintohy ka hitonta: ³¹ Fa reo ze mandy Yaveh le hagnavao ty here iereo; hitily amity elane hoe ty voromahere iereo; hilay iereo ka tsy ho rokake; hindeha iereo naho tsy ho tora.