1 Tamize andro zay Merodaka-baladana anadahy Baladana, mpanjaka Babylona, le nandefa taratasy vaho fagnomea hoahy Hezekia; satria reine fa narare ty Hezekia naho afake. 2 Fale tamireo zaka reo ty Hezekia; natorone reo mpinday talily ty tragno rihane fisy zaka lafo-vily__ty volafoty, ty volamena, reo zaka-magnitre naho menake soa, ty tragno rihane amireo zaka-fialiane, vaho iaby ze hisake tao amireo tragno rihane. Tsy nisy raraha tao antragnone, na tao amity fanjakane iaby, ka tsy natoro Hezekia aze reo. 3 Bakeo Isaia mpaminane niavy tagne amy Hezekia mpanjaka naho nagnontane aze ty hoe:" Ino ro reha reo ndaty reo aminao? Baka aia iereo?" Hoe ty Hezekia hoe:" Avy amiko eto bakagne amity firene lavitre Babylona iereo." 4 Le nagnontane Isaia hoe:" Ino ro hisa iereo tao antragnonao?" Namale Hezekia hoe:" Hisa iereo iaby ty zaka iaby tao antragnoko. Tsy nisy zaka tamireo rarahako lafo-vily ka tsy natoroko iereo." 5 Le hoe Isaia tamy Hezekia hoe:" Dranjigno ty safa Yaveh tompo ty maro: 6 'Ingo, avy ty andro ze hindaisa ty zaka iaby ao amity lampanao, reo zaka ze navory reo razambeinao zisikezao hoagne Babylona. Tsy hisy ho tavela, hoe Yaveh. 7 Reo anadahy nateranao, ze le fa nitezanao__halae iereo, naho ho lasa andampa ao amity lampa ty mpanjaka Babylona iereo."' 8 Bakeo Hezekia nirehake tamy Isaia hoe:" Soa ty reha Yaveh ze le fa nirehafenao." Fa nidineke re hoe:"Hisy filamina vaho hamarean-toera amity androko."