¹ Tamireo andro reo ty Hezekia le narare mafe le fa eo ampifateza. Ka niavy teo amine Isaia anadahy Amoza, ty mpaminane, naho nanao tamine ty hoe:" Zao ro talily Yaveh:' Alamino ty tragnonao; fa ho mate riha, fa tsy ho velo." ² Le nagnody ty tarehene nimbaeo amity rindry ty Hezekia naho nivavake tamy Yaveh. ³ Hoe re:" Mba tiarovo rie ry Yaveh, ty nindehanako ampitokia tamity arofoko iaby teo agnoloanao, vaho ty nanovako ty soa teo amasonao." Le nitagny mafe ty Hezekia bakeo. ⁴ Naho niavy tamy Isaia ty safa Yaveh, manao ty hoe: ⁵ "Mindehana naho rehafo amy Hezekia, mpitarike ty ndatiko hoe:' Zao ro talily Yaveh, ty Zagnahare Davida razambeinao: Le fa reiko ty vavakenao, naho le fa hisako reo ranomasonao. Ingo, hagnampe dime amby folo tao tamity fagnahinao raho. ⁶ Le hagnavotre anao vaho ty tana toy amity tana ty mpanjaka Asyria raho, naho hiaro ty tana toy. ⁷ Zao ro famantara bakamy Yaveh ho anao, fa hataoko ze nampagnategnaeko. ⁸ Ingo, hampimpoly ty aloke eo amireo tohatre Ahaza ho folo asa raho.""Ka nihere zaka folo reo tohatre teo amize nihoatre. ⁹ Zao ro vavake voasora Hezekia mpanjaka Joda, laha fa narare naho afake re: ¹⁰ Zaho nirehake fa eo amity ampagnivoa ty haveloko le hindeha amireo vavahady ty fiaigna tsy hisake raho; nalefa tagne raho zisike ty tao sisa hivelognako. ¹¹ Hoe raho ty hoe tsy hahisake Yaveh sase raho, Yaveh agne amity tane ty velo; tsy hagnente ty ndaty na reo vahoake ty tane sase raho. ¹² Nafaha vaho nalae tamiko manahake ty tragno ty mpiarake agnondry ty arofoko; naforeporeko manahake ty tano ty arofoko; mandily ahy amity zaka magneno riha; eo agnivo ty andro vaho ty hale riha ro namara ty arofoko. ¹³ Nikorake mafe zisike-maray raho; manahake ty liona ro famakia reo taolako iaby. Eo agnivo ty andro vaho ty hale Riha ro mamara ty arofoko. 4Mikolalaike manahake ty tilintily raho; mikononoke manahake ty voro mahilala raho; rerake miandrandra ambone ty masoko. Ry Tompo, ore raho; ampeo raho. ¹⁵ Ino ro tokone ho rehafeko? Vaho nirehake re, ro nanao zay tamiko; hamindra moramora amity tao hivelognako iaby raho satria feno heloke. ¹⁶ Ry Tompo, reo fijalea nalefanao le soa ho ahy; ha here amiko ndraike anie ty arofoko; nagnampoly ty arofoko vaho ty hasalamako Riha. ¹⁷ Zaka soa hoahy ty niaignako amity alahelo manahake rey. Nagnavotre ahy tamity lavake harava Riha; le fa nanorake reo hadisoako iaby hoagne andambosinao Riha. ¹⁸ Fa tsy misaotre anao ty fiaigna tsy hisake; tsy miantsa anao ty fate; reo ze mizotro ao agnate lavake le tsy magnantegna ty hasoam-pitokia. ¹⁹ Ty ndaty, ty ndaty, re ro raike ze magnomea fisaora anao, manahake ty ataoko amity andro toy: naho mampahay ty hasoam-pitokisa nao amireo anake. ²⁰ Eo andalam-pamonjea ahy Yaveh, naho handaza amity antsa zahay amity androm-piaignanay iaby ao antragno Yaveh." ²¹ Naho hoe Isaia:" Ao iereo hangalake vongan'aviavy naho hametrake zay eo amity vae, le ho afake re." ²² Hoe avao kea ty Hezekia hoe:" Ino ro ho famantara fa tokone hiakatre ho agne antragno Yaveh raho?"