1 Lahafa regny Hezekia Mpanjaka ty tate gniereo, le nandriatse ty sikine re, ka nandrakoke ty vatane tamity siky fandala, vaho nimba antragno gn'Yaveh mbeo. 2 Ire le nagnirake andre Eliakima, ze loha ty longo, naho Sebna mpanora dily, vaho loha ty mpisoro reo, sambe nisaro siky fandala iaby, ho amy Isaia mpitoky agne, ana ndre Amoza. 3 Hoe iereo tamine: "Hoe re Hezekia tihoe: 'Ty andro toy le andro ty fijalea, fasiafa, vaho hagnalabaraka, manahake ty kolo fa ho terake, nefa ty renene le tsy mana here hiteraha ty anane. 4 Mete ho regn'Yaveh Zagnaharenao avao tsara ty bey ty mpifehe eo, ze nirahe ty mpajaka Asyria soa hialy an Anaghahare velo, ka hivola mafe tsara reo ze regn'Yaveh Zagnaharenao. Amizao le asondroto ho ahy ze mboe sisa eto ty vavagmao." 5 Ka nimbamy Isaia mpanompo Hezekia mpajaka reo mbeo, 6 vaho hoe ty Isaia tamy gniereo: "Volagno amity tomponareo tihoe: "Ko matahotse ty tsara ze fa regnao, ze tamy zay ro nametaveta gnireo mpanompo ty mpajaka Asyria ahy. 7 Ingo, hampipoke fagnahy amine ao raho, vaho haharey ty resake ilane re ka hihere amity tanene agne. Hantontako amity mesobey amity tanene agne avao re."" 8 Vaho nihere bey ty mpitarike reo ka nahisake ty mpajaka Asyria nialy tamy Libna, fa fa regne fa niala ta Lakisy ao ty mpajaka. 9 Vaho regny Senkeriba fa nivory hialy amine ty Tiraka mpajaka Etiopia naho Egypta, ka nagnirake mpinday hafatse miarake amity hafatse tamy Hezekia ndraike re: 10 "Volagno amy Hezekia, mpajaka Joda tihoe: Ko enga handiso fagnatena anao ty Zagnaharenao ze itokianao, manao tihoe: "Tsy hamea an tagna ty mpajaka Asyria eo ty Jerosalema." 11 Ingo, fa regnao ze nanoe ty mpajaka Asyria zay tamity tane iaby tamity fandrobaha iereo vatane. Kea ho vonje vao riha? 12 Feie vao namonje iereo Zagnahare ty firene, le reo firene ze rinava ndroazako reo: Gozana, Harana, Razefa, vaho ty vahoa Edena ta Telsara ao? 13 Aia ty mpajaka i Hamata, mpajaka Arpada ay, mpajaka reo tana Sefarvaima, Hena, vaho Iva?"" 14 Nandrambe ty taratasy tatagna ty mpiday hafatse egne ty Hezekia vaho namaky izay. Le nimba antragno Yaveh agne re vaho namelatse izay tagnoloane eo. 15 Nivavake tamy Yaveh ty Hezekia tihoe: 16 "Nao Yaveh Tompo ty maro, Zagnahare Israely, iriha ze mitoboke ambone Kerobima egne, iriha raike ro Zagnahare amity fanjaka ty tane iaby eo. Iriha ro nihare ty lagnitse naho ty tane. 17 Atokilagno ty sofinao, gea Yaveh, vaho minjajigna. Sokafo ty masonao, gea Yaveh, ka henteo, vaho njanogno tsara Sankeriba reo, ze fa nalefane hikizaha an Nagnahare velo. 18 Mare njay, eh gea Yaveg, fa rinava ty mpajaka Asyria ty firene iaby naho ty tane gniereo. 19 Fa nanoene tagnate afo ao Zagnaharene reo, fa tsy Zagnahare regne fa asa tagna gnodaty, hetae naho vato avao. Ka le pinoteke ty Asyria reo. 20 Kea amizao, nao Yaveh Zagnaharenay, vonjeo amity herene eo zahay, soa ho hay ty fanjaka ty tane iaby fa Iriha raike avao ro Yaveh" 21 Vaho nandefa hafatse tamy Isaia ana ndre Amoza ty Hezekia, manao tihoe: "Yaveh, Zaganahre Israely manao tihoe: 'Satria fa nivavake tamiko mikasike andre Sankeriba mpajaka Asyria riha, 22 le izao ty tsara ze vinola Yaveh ty mikasike aze: " Manao tsisy dikane naho magnafabaraka anao ty anak'ampela mboe tseno gny Ziona; mivakiloha aminao ty anak'ampela. Nila aly naho nandratiraty ania riha? 23 Niambone feo naho nivandravandra taman-pirengerengea tamy gnia riha? Tamy iaze Masy gny Israely. 24 Tamity alala reo mpanomponao ro nipaianao ty Tompo naho nanovanao hoe:' Tamity hamaroa ty kaleseko ro niakarako tegne amity tazoa reo vohitse, tamity fiakara agnabo vatane Libanona. Ho tampaheko reo sederane lava naho ho filieko reo hetae-Kypreso agne, naho hilitre ao amity toerane ambone vatane raho, le ty alane mamoa bey vatane. 25 Le fa nihaly ty lava-drano raho ninon-drano; Riniko rano Egypta iaby ambane ty tomboko.' 26 Feie vao tsy reinao ty namaritako zay andro maro lasa zay vaho nanaovako zay tamity andro taloha? Naho enteko mba hiseho zay. Eto riha mba handrava reo tana mafe ho lasa korotam-bato. 27 Reo vahoakene, tsy manan-kery, le kivy vaho afa-baraka. Vole agne ambaibo iereo, akata maintso, akata egne ambone tafo na egne ambaibo, aloha ty tioke bakagne antignana. 28 Fa haiko ty tobonao, ty fiakaranao, ty filiranao, naho ty helonao amiko. 29 Noho ty helonao amiko, noho ty avognavonao ze nipake tamity sofiko, le hametrahako farangoko eo amity oronao, naho ty lamboridiko eo amity vavanao; hahereko agne amize lala niboahanao riha." 30 Zao ro ho famantara ho anao: Hihina ze mitiritiry avao riha amity tao toy, naho ze mitiry amizay amity tao faharoe. Fa amity tao fahatelo le tsy maintsy mambole riha naho mihaza, manova tanem-boaloboke naho hano ty vokane. 31 Reo sisa amity foko Joda ze tsy mate le hitiry vaho hamokatre ndraike. 32 Fa bakao Jerosalema ro hiboaha reo sisa; bakao ambohitse Ziona reo tsy mate. Hanao zay ty zotom-po Yaveh Tompo ty maro."' 33 Laha zao le zao ro safa Yaveh miomba ty mpanjaka Asyria:" Tsy hilitre eto amity tana toy, na hanorake folese eto re. Na hoavy aloha zay miarake amity ampinga na hananga rindry fiakara amizay re. 34 Ty lala nihaviane avao ro ho lala hialane; tsy hilitre ao amity tana toy re_zay ro talily Yaveh. 35 Fa hiaro ty tana toy raho naho hamonje zay, noho ty amiko vaho noho ty amy Davida mpanompoko.' 36 Naho ty anjele Yaveh le niakatre ka nanafike ty tobe reo Asyriana, nahafate miaramila 185.000. Laha fa nifoha magneno akoho reo lahilahy, le nitsilay tegne iaby tegne ty fate gnodaty. 37 Ka niala Israey ty Sankeriba mpanjaka Asyria naho noly tagne antragno ka nitoboke tao Ninive. 38 Tafara atoy, laha mboe niantsa tao antragno Nisroka zagnaharene Re, le namono aze tamity meso ty Adrameleka vaho Sarezera anadahine. Bakeo le nilay tagne amity tane Ararata iereo. Naho le Esara-hadona anane ro nanjaka teo amity toera ne.