¹ Tamity tao fahefatse ambiny folo nanjaka ndre Hezekia mpanjaka, Sankeriba, mpanjaka Asyria, le nanafike tana iaby reo milakoro Joda vaho nagnadevo iereo. ² Le nalefa ty mpanjaka Asyria baka Lakisa agne ho ahy Jerosalema ho amy Hezekia mpanjaka agne ty bevata mpifehe miarake amity miaramila bevata. Nampifagnato ty lakan drano ty rano ambone re, amity lalam bey mbamity baibo ty mpanasa lamba agne, vaho nitsanga tamy zay. ³ Ty manan kasy Israelita ze niboake ambaly ty tana soa hivola amy gniereo le i Eliakima anake lahy Hilkia, ty mpiarake ty lapa, Sebna mpanora i mpanjaka, vaho Joa anake lahy re Asafa, ze nanoratse fanampahan keve ty governemanta. ⁴ Nivola tamy gniereo ty bevata manan kasy tihoe: "Volagno amy Hezekia fa ty mpanjaka bevata, mpanjaka Asyria, le mivola tihoe: "Ino ty lohandrano ty tokinareo? ⁵ Tsy mivola afa tsy ty tsara tsy le ilae nareo, mivola fa misy torohae naho here amity aly. Amizao amy gnia ty itokianareo? Ia ro nagnamafe anareo hivory handietse ahy? ⁶ Ingo, matoky ani Egypta nareo, ze volontara misintake ze ampiasa gnareo manahake ty fitogno, fa lahafa miantehetse amizay ty ndaty raike, le handiteke amity tagnane ka hitomboke aze zay. Manahake izay ty Farao mpanjaka Egypta amity ndaty ze matoky aze. ⁷ Fa laha mivola amiko nareo tihoe: "Matoky ani Yaveh Zaganharenay zahay," tsy aze vao pilasy abo reo naho alitara reo ze nalae Hezekia, vaho fa nivola tamy Joda naho Jerosalema tihoe: "Miondreha agnoloa ty alitara a Jerosalema toy agne"? ⁸ Vaho amizao, magniry ty hanao fagnomeza soa ho anao bakamity mpanjaka Asyria raho. Hagnomey anao sovaly roe arivo raho, laha ohatse ka mahavita mila mpitikitse hoe iereo riha." ⁹ Hanao akore ty hahafahanao mandietse na ty kapiteny raike ze kele vatane amity mpanompo ty tompoko eo? Nampipoke ty tokinareo tamy Egypta naho kalese reo naho mpitikitsovaly reo nareo! ¹⁰ Vaho amizao, feie vao nindeha tatoy tsy niarake tamy Yaveh hialy handietse ty tane toy naho handrava izay vao raho? Hoe ty Yaveh tamiko," tafiho ty tane toy vaho ravao."" ¹¹ Vaho Eliakima anake lahy Hilkia, naho Sebna, vaho Joa nivola tamity bey manan-kasy tihoe: "Mivolagna rie amy mpanomponao reo amity fivola Syriana, Aramaika, soa hahazoanay izay. Ko mivola aminay amity fivola gny Joda antsofy vahoake reo ze amity lakoro." ¹² Fa hoe ty bey manakansy: "Feie vao nandefa ahy soa hivola tsara reo ho amity tomponao agne naho ho aminao agne vao ty tompoko? Tsy nandefa ahy ho amy lahilahy reo ze mitoboke amity lakoro eo re, ze hihina ty malotone avao naho hino ty amanine avao miarake aminao? ¹³ Vaho nitsanga ty bey manan kasy vaho nikorake tamity feo mafe tamity fivola Jiosy, mivola tihoe: "Minjajigna ty tsara ty mpanjaka bevata, mpajaka Asyria. ¹⁴ Hoe ty mpanjaka: "Ko mete hofitahe ndre Hezekia riha, fa tsy afake ty hagnavotse anao re. ¹⁵ Ko enga hampatokie Hezekia amy Yave riha, ze mivola tihoe; "Hamonje anay vatane ty Yaveh, tsy hagnomey ho an tagna ty mpanjaka ty Asyria eo ty tana toy. ¹⁶ Ko minjajy andre Hezekia fa izao ro tsarae ty mpanjaka Asyria: "Milongoa amiko vaho magnatogna ahy. Vaho ty kiraidraike aminareo le hihina bakamity voalobone naho bakamity hetae aviavine avao, vaho hino ty rano agnate ty fitoboha dranone ao avao. ¹⁷ Izay ro anoegnareo mandra piaviako naho hangalako anareo ho amity tane agne manahake ty tanegnareo avao, tane ty vare naho tane ty divae mbao, tane ty mofo naho tanen boaloboke." ¹⁸ Ko magnega ani Hezekiela hamitake anareo, mivola tihoe: "Yaveh ro hamonje antika." Feie vao nisy tamy Zagnahare ty vahoake reo vao ka nahavonje iereo baka antane ty mpanajaka Asyria? ¹⁹ Aia Zaganahare ndre Hamata naho Arpada reo? Feie vao nahavonje andre Samaria tamity hereko iereo? ²⁰ Tamy Zaganahre iaby teto reo amity tane, feie vao nisy Zaganahre nahavonje ty tanene tamity hereko vao? Manahake ty hoe afake mamonje ani Jerosalema amity hereko vao ty Yaveh? ²¹ Fa ty vahoake nijano nitsy vaho tsy nisy namale, fa izay ro lily ty mpanjaka tihoe: "Ko mamale aze." ²² Vaho re Eliakima anake lahy ndre Hilkia ze bey ty longo, naho Sebma mpanora dily, vaho Joa anake lahy Asafa, mpita ty raraha mpanjaka, le nandiso andre Hezekia miarake amy sikine driatse reo, vaho ninday tamine tsara ty bey manan kasy reo.