¹ Ty tane efetse naho maike le hifale; vaho ty tane maike hifale naho hamole. Manahake ty raozy, ² hitiry bey zay vaho hifale amity hafalea naho ty antsa antsa; ty hasy gny Libanona le hamea zay, ty hasoa tarehe gny Karmela naho Sarona; hahisake ty hasy gn'Yaveh iereo, ty famirapira Nagnahare. ³ Ampaherezo ty tagna mitsiraviravy, vaho hamafeso ongotse mangitikitike reo. ⁴ Volagno amy tsy afake agnarofo reo tihoe: "Mahereza, ko matahotse! Ingo, ty Zagnahare, le ty famalea Nagnahare. Ho avy re vaho hamonje anareo." ⁵ Le hahisake ty maso gny Goa reo, vaho haharey ty sofy gny maregne reo. ⁶ Le hisoty manahake ty diera ty ndaty mandrobake, vaho ty lela ty moa le hiantsa, fa hiboake bakamity tane maike agne ty rano, vaho lohandrano agnefetse agne reo. ⁷ Hizare rano kele ty faseke magnoro, vaho ty tane mange hizare lohandrano miroborobo; amity fitoboha gnireo amboa ly reo, ze itoboha gniereo rano kele reo, le ho feno akata volontara naho zozoro. ⁸ Ty lalam bey agne le ho kaihe tihoe lala Masy. Tsy hindeha amy gnizay ty maloto. Fa izay le nanoe ho ahy ze mandeha amigny zay. Tsy misy gege handeha amignizay. ⁹ Tsy hisy liona ty agne, tsy hisy biby masiake amignizay ao; tsy ho hisake ao iereo, fa reo ze voavonje ro handeha ao. ¹⁰ Hihere ty vilin pagnavota gn'Yaveh vaho ho avy a Ziona agne amity fiantsa, vaho hafalea zisikagne ro ho an doha gniereo eo, hahazo laza naho hafalea iereo, hilay ty alahelo naho ty fisefoa.