¹ Magnatogna marikitse, inareo firene, vaho minjajigna, mifantoha, inareo vahoake! Ty tane naho ze mameno izay le tsy maintsy minjajy, ze iaby zao, naho ty zaka iaby amigny zay. ² Fa meloke amity firene iaby Yaveh, vaho meloke amity miaramila gniereo iaby; nadrava iereo vatane re, nagnomey iereo tan tagna ty mpamono re. ³ Reo vata manintsy gnireo ze mate le hatorake ambalike agne. Ty fofone maimbo gny fate reo le ho egne iaby; vaho vohitse reo ho vonto ty lio gniereo. ⁴ Ho rava iaby ty kinta ty lagnitse, vaho ty lagnitse le hihoro manahake ty horogna; vaho ty kintane iaby le ho rava, manahake ty rave maleme mihintsa amity tahom boaloboke, naho manahake ty aviavy lo mihintsa amity hetae n'aviavy. ⁵ Fa lahafa mamo ty lione andagnitsagne ty mesoko; ingo, amizao hizotso a Edoma agne zay, amity vahoake ze hatokako amity fandrobaha. ⁶ Ty meso gn'Yaveh le mitete lio naho feno vondrane, feno ty vondra ty voa gnireo agnodry lahy. Fa mana raketse a Bozra ao naho vono bevata amity tane Edoma ty Yaveh. ⁷ Ho vonoe miarake amy gniereo ty agnombe ly, naho vanto n'agnombe miarake amy fa antetse reo. Ty tane gniereo le ho mamon-ndio, vaho ty lembone le vondra ty vondrane. ⁸ Fa ho andro femalea gn'Yaveh zay naho ho tao famaleane ty amy Ziona. ⁹ Ty rian drano gny Edoma le hizare linte mirehetse. ¹⁰ Hirehetse hale naho atoandro zay; ty setro gnizay le haharetse zisikagne; amity foko mifandimbe le ho tane maike zay; tsy hisy ndaty handrio amy gnizay zisikagne. ¹¹ Fa vorondy naho bibily reo ro hitoboke agne; ty vorondolo naho ty goaika ro hanao ty tragnone amignizay ao. Vaho hohenjagne amy zay ty taly famentara ty hapoteha naho ty fantso drano fandrobaha. ¹² Ndaty sahazan kasy reo le tsy hana zaka ho tavela ho kaihe tihoe fanjaka, vaho ty roandriandahy iaby le tsy hasia dikane. ¹³ Fatike ro hitiry amy lapane reo eo, voaroy naho amiana ro amity tragno fiarone eo. Ho fitoboha gnireo amboa ly zay, naho pilasy ostritsa reo. ¹⁴ Ty bibily naho Kare reo ro hifanoje agne, vaho osidia reo ro hifampikaike agne. Ty bibily ty hale ro hagnore pitoboha agne ka hahisake pilasy pitofa hoe iereo. ¹⁵ Vorondolo reo hanao hamboatse tragnone, hagnatoly naho Hamana atoline reo, Hamana vaho hiambe anane reo. Mare, agne ro hivoria papango reo, ty kiraidraike miarake amity ragnene iaby. ¹⁶ Ilao amity fognosa taratasy ao ty Yaeh, fa tsy misy raike amy reo tsy ho ao. Tsy misy tsy hana ragnetse, fa ty vavane ro mandily izay, vaho ty fagnahine ro mamory iereo. ¹⁷ Nanao filoka ho ahy ty pilasine iereo re, vaho ty tagnane ro nagnamentatse izay tamity taly hoe iereo. Ho Tompo zay zisikagne iereo; zisikamity zafeafe mifandimbe ro hitoboha gniereo agne.