¹ Loza ho anareo, ry mpandrava ze tsy mboe rinava! Loza hoahy ty mpamadike ze tsy mboe nivaliha iereo! Laha mihanto amity famoteha nareo, le ho potehe! Laha mihanto amity famadiha nareo, le hivaliha iereo. ² Ry Yaveh, mandefera aminay; mandy anao zahay; ao mba ho sandrinay isa-maray, naho famonjeanay amity andro fijalea. ³ Agnate ty feo mafe ro hilaisa ty ndaty; laha fa mitsanga Riha, le mizara reo firene. ⁴ Naleve manahake ty valala nivory ty babonao; manahake ty fifagnaretsa reo valala, ro ifagnaretsaha ty ndaty amizay. ⁵ Nakare Yaveh. Mitoboke agne amity toera agnabo Re. Ho fenoene amity fitsara vaho hamarea ty Ziona. ⁶ Ho filamina amity andro nareo Re, famonjeam-bey, hamarea, naho fahaia; ty fatahora Yaveh ro hareane. ⁷ Ingo, reo ira iereo mitaray eo andala; mitagny mafe reo irake manantena filamina. ⁸ Foa reo lalambey; tsy misy mpindeha sase. Rava ty fagnekea, tsinontsinoe reo vavolombelo, naho tsy voahaja ty maha-ondaty. ⁹ Mandala ty tane naho milofike; megnatre Lybanona naho maike; Sarana le manahake ty gebo maike; naho magnintsa ty ravene ty Basana vaho Karmela. ¹⁰ "Amizao hitsanga Raho," Hoe Yaveh;" amizao hakare raho; amizao ho egne amity agnabo Raho. ¹¹ Manorotoro ty voam-bare nareo, naho miterake mololo; afo mandrava anareo ty fofo gnay nareo. ¹² Ho voa oro reo ndaty, manahake ty fatike tinampake vaho noroa. ¹³ Nareo ze lavitre, dranjigno ze le fa nataoko; naho nareo ze marine, ekeo ty hereko." ¹⁴ Matahotre reo mpanonta agne Ziona; fangovita ro le fa nahazo ty mpihatsaravelatsihy. Ia amintika ro afake hijano amity afo mandrava? Ia amintika ro afake hijano eo amity fireheta zisikagne? ¹⁵ Ire iaze mandeha amity fahitia ay naho mivola moramora; Ire iaze nagnafoa ty tombo ty fijalea ay, ze milietse ty handrambe ty afera, ze tsy manao tete draty heloke bevata fampipohan dio, vaho tsy mila ty raty- ¹⁶ hanoene amity abo vatane ty fitobohane; ty pilasy fiambenane le ho fiaro mafe amity harambato; ty hanene naho ty ranone le ho feno Zara. ¹⁷ Ty masonareo le hahisake ty mpanjaka amity hasoane; hiambe tane malalake iereo. ¹⁸ Ho tsaroe ty fonareo ty tahotse; Aia ty mpanora dily, aia re ze nibabe ty vola? Aia re ze nagnisake tilikambo reo? ¹⁹ Tsy hahisake ty ndaty pandietse anareo sasy inareo, ndaty hafa fivola ze tsy takanareo. ²⁰ Henteo Ziona, itana ty hafalea tika ay; hahisake ani Jerosalema manahake ty ndaty milamy ty masonareo, lay tsy mba hafahe, tsy ho voaombotse mihintsy ty tsato ketae na ho tampake ty kofehene. ²¹ Fa kea, hiarake aman-kere amintika ty Yaveh, amity pilasy antsisy ty rano naho lakan drano. Tsy hisy sambo hahazo mindeha amy zay, vaho tsy hisy sambo bevata hamakivaky izay. ²² Fa Yaveh ro mpitsara antika, Yaveh ro mpagnomey lily antika, Yaveh ro mpanjaka tika; vaho hamonje antika re. ²³ Mitsiraviravy fagnodikodiagnareo; tsy hae hitanjake ty hetae lava amity pilasine reo; tsy hae hagnaparitaha ty lay reo; lahafa Zinara indevoy bevata ay, ndra le ty voavoa aza haninto indevoy. ²⁴ Tsy hivola ty ndaty tihoe: "Marare raho; " ty ndaty mitoboke agne le ho henga ty hadisoa gniereo.