¹ Ingo, ty mpanjaka le hanjaka amity hamarea, naho ty roandrian-dahy le handily amity rarene. ² Ty kirai-kiraike iaby le hanahake ty fialofa amity tioke naho ho aloke amity hotroke, manahake ty rano velo amity toera maike, manahake ty alo ty vatolampy bey agne amity tane ty hareraha. ³ Naho ty maso reo ze mahisake le ho poahe, naho ty sofy reo ze maharey le hidranjy soa. ⁴ Reo kele say le hidineke soa amity hazavan-tsay, naho reo mibedabeda le hahay hirehake mahity soa. ⁵ Ty gege le tsy ho kaihe sase hoe soa, na ty mpamitake ho hajae. ⁶ Fa ty gege le hirehake hagegea, naho ty arofone le hanao heve-draty vaho hanao asa mihatsaravelatsihy, naho hirehake diso handietre Yaveh re. Hahakere reo kere re, naho hahavy reo marandrano tsy hana zaka hinome. ⁷ Raty reo fomba ty mpamitake. Midineke heve-draty re mba hanimba ty mahantra amity vande, na le mirehake ze mare aza ty mahantra. Fa ty ndtay soa kea le manao hevetre soa; naho reo dinene soa le hosoa re. ⁹ Mitsangana, ry ampela tsy manano-sarotre, naho dranjigno ty feoko; ry ampela tsy midineke, dranjigno raho. ¹⁰ Fa afake herentao farafahakelene le ho rava ty fatokianao, ry vampela tsy midineke, fa tsy hisy ty fihazam-boaloboke, tsy hoavy ty famoria. ¹¹ Mihovitre, ry ampela tsy manano-sarotre; ao hihovitre, riha ze matoky; efaho reo akanjo manifinao naho ao riha hiborida; naho asio lamba fandala ty valahanao. ¹² Hitoreo amireo baibo soa riha, hoahy reo voaloboke mamokatre. ¹³ Ty tane ty vahoakeko le ho feno reo fatike vaho reo here, eka fa na le ty ao amireo tragno mahafale iaby ao amity tana ty fifalea aza. ¹⁴ Fa ty lampa le hafoe, ty tana feno vahoake le ho foa; ty tazoa vaho ty tilikambo le ho lava-bato zisikezay, hafalea hoahy reo borike le, akata maintso hoahy reo agnondry aman'ose; ¹⁵ mandram-pizotroa ty fagnahy bakagne amity agnabo amintika, ka ty tane efetre le hizare baibo mamokatre, naho ty baibo mamokatre le dinehe hoe ty ala. ¹⁶ Naho hitoboke ao amity tane efetre ty rarene; naho ty hamarea hitoboke ao amity baibo mamokatre. ¹⁷ Ty asa ty hamarea le ho filamina; naho ty voka ty hamarea, le fitsigna vaho fatokia zisikagne. ¹⁸ Ty vahoakeko le hitoboke ao amity fitoboha feno filamina, ao amireo tragno azo antoke, naho ao amity toera ambalike fitofa. ¹⁹ Kanefa laha misy reo havandra le ho simba ty ala, ka le rava vatane ty tana, ²⁰ riha ze mamafy egne agnila reo onja le ho voatahy, riha ze magnakatre reo agnombenao vaho reo borikenao mba hiraoke.