² Raeso ty fadisanam-bare ka mandisana vare; afaho ty voalinareo, afaho ty akanjo lavanareo, aboridagno ty tombonareo, ka mitsaha ty renerano. ³ Hiseho tsy misiky nareo, eka, ty hegnanareo le ho hisake: Hamale fate Raho naho tsy handefetre amity ndaty. ⁴ Ty Mpagnavotre antika, Yaveh tompo ty maro ro agnarane, ty Raike Masy ty Israely. ⁵ Mitoboha amity milamy naho mindeha agne amity maieke, ry anakampela Kaldeana; fa nareo le tsy hatao ty hoe andriam-bave ty fanjaka sase. ⁶ Meloke tamity vahoakeko Raho; nandoto ty lovaho Raho naho nagnomea reo ho eo antagnanareo, kanefa tsy nanoro fiferegnay tamiereo nareo; nametrake joka mavesatre tamity antetre nareo. ⁷ Hoe nareo ty hoe:" Handily zisikagne manahake ty fiambonea ty andriam-bave raho." Tsy nandrae reo zaka reo tamity arofo nareo, na nidineke zay ho fivalihane. ⁸ Ka dranjigno te amizao, nareo ze tea hasoa vaho mitoboke am-pilamina; nareo ze manao anakam-po hoe:" Misy raho, naho tsy misy manahake ahy; tsy mananim-bata sase raho, na hivelo ty harobaha-nanake vatane." ⁹ Fa ty zaka roe toa le hoavy tampoke aminareo ao agnate ty andro raike: hoavy aminareo amity hafenoan-kere ty harobaha-nanake vaho ty tsy fanagnam-baly sase, na le eo aza ty famosavianareo vaho reo fandraikiraeke nareo naho reo aolinareo. ¹⁰ Natoky ty haratianareo nareo, hoe nareo hoe:" Tsy misy mahisake ahy"; ty hamareanareo vaho ty fahaianareo ro mitarike anareo agne amity lalan-diso, fa hoe nareo manao anakam-po hoe:" Misy raho naho tsy misy na ia ia mitovy amiko." 11Haharese anareo ty loza; tsy hahavita handroake zay nareo vaho ty fandraekeraeke nareo. Ho ao aminareo ty harava; tsy hahavita hamafa zay nareo. Hagnisy tampoke anareo ty loza, aloha ty hahaianareo zay. ¹² Mahareta amity fanoanareo fagnozogna vaho ty famosavianareo ze nataonareo antsay tamim-patokisa zisikamity hakeleanareo; mete hosoa nareo, mete hatahotre loza nareo. ¹³ Rerake nareo noho ty fangala-dineke; ao hitsanga reo ndaty reo ka hiaro anareo_reo ze miandrandra ty lagnitre vaho magnete ty kinta, reo ze magnombara vola vaovao_ao iereo hamonje anareo amize hiseho aminareo. ¹⁴ Ingo, ho lasa mololo iereo. Hagnoro iereo ty afo. Tsy hahavonje ty fiaine eo antagna ty lelan'afo iereo. Tsy hisy vaen'afo hahamay iereo naho tsy hitoboke eo agnila ty afo iereo! ¹⁵ Zao ro le fa nahavy iereo ho aminareo, reo ze le fa niara-niasa taminareo, naho niara-nivily vaho niara-nivarotre taminareo tamy ty mboe nikele nareo, naho ie iaby le mboe manao ty hagegeane avao; naho laha fa mikaike vonje nareo, le tsy hisy na ia ia afake hamonje anareo."