1 "Loza hoahy reo kolo mpavande," Zay ro talily Yaveh." Manao dineke iereo, fa tsy bakamiko; manao filongoa amity firene hafa iereo, feie tsy tinoro ty fagnahiko lala, ka le magnampe hadisoa amity hadisoa iereo. 2 Mivogno ty hombaeo Egypta iereo, feie tsy nangatake ty toro-lalako. Mipay fiaro bakamy Farao iereo naho mialoke ao amity alo Egypta. 3 Laha zao le ho hamegnaranareo ty fiaro Farao, naho ty aloke eo amity alo Egypta, ho fahafaham-baraka nareo, 4 na le agne Zoana aza ty roandria iereo, naho niavy tagne Hanesa reo mpinday taliline. 5 Ho megnatre iaby ie iaby noho ty amity vahoake raike ze tsy afake-magnampe iereo, te vaho tsy fagnampea ro tsy famonjea, fa hamegnara, naho fahafaham-baraka vatane aza." 6 Talily miomba reo bibin'ala Negeva: Bakamity tane ty fijalea vaho Loza, liona vave vaho liona lahy, ty menara vaho ty mere mirehetre mitily, ro hindaisa iereo ty hareane eo andambosy ty borike, naho ty rakene eo amity voho ty rameva, ho agne amity vahoake te tsy afake magnampe aze iereo. 7 Fa tsy misy antone ty fagnampea Egypta; laha zao le nataoko ty hoe Rahaba re, ze mitoboke tsy mihontse. 8 Mindehana amizao, sorato eo amity fagnatrefa iereo amity vato pisake zay, naho anovo ao amina sare-sare, mba ho voa hajary ho amity andro magnarake ho vavolombelo. 9 Fa vahoake mpavande reo, kolo mpavande, kolo toe tsy mba haharey ty fagnanara Yaveh. 10 Hoe iereo amity mpahisake hoe:" Ko mahisake;" naho amireo mpaminane ty hoe:" Ko maminane ty mare aminay; mirehafa rehake mitsiriry aminay, maminania nofinofy. 11 Miotaha hiala amity lala, miotaha amity lala; anovo mijano mirehake eo agnoloa ty tarehenay ty Raike Masy Israely." 12 Laha zao le hoe ty Raike masy Israely ty hoe:"Satria milietre ze rehake zao nareo naho matoky ty fampijalea vaho fitake ka miarake amizay, 13 ka ze andro zay le hanahake ty zaka vaky te vogno hitonta aminao, manahake riatre eo amity rindry agnabo ze ho tampoke ty fitontane, ao agnate ty andro kele. 14 Ho vakie manahake ty fivakia ty finga ty mpanefe tanemanga zay; tsy hiaro zay re, ka tsy hisy potene ho hisake eo amireo vakine ze azo hagnafaha ty afo bakao ampata, na hamoara ty rano bakao amity sinibein-drano. 15 Fa zao ro safa Tompo Yaveh, Ty Raike masy Israely:" Ho avotre amity fiheregna vaho fijanogna nareo; amity fitsigna vaho fatokia ro ho herenareo. Feie tsy manam-pagniria nareo. 16 Hoe nareo ty hoe:' Aha, fa nilay amity soavale zahay,' ka le hilay nareo; naho,'Hitikitse soavale malaky lia zahay,' ka le halaky lia reo ze magnia anareo. 17 Arivo ro hilay noho ty fampitahora ty raike; amity fampitahora ty dime ro hilaisanareo mandram-pahavy ty sisa tavela aminareo hanahake ty tahon-jozoro egne ambone vohitse, na manahake ty zozoro egne amity tazoa." 18 Fa mboe mandy ty handefetre aminareo Yaveh, laha zao le vogno ty hanoro fiferegnay aminareo Re. Fa Yaveh le Zagnahare ty rarene; sambatre reo ze miambe aze. 19 Fa hisy vahaoke hitoboke agne Ziona, agne Jerosalema, naho tsy hitagny sase nareo. Handefetre amity feo ty taray nareo vatane Re. Laha fa reine zay, le hamale anareo Re. 20 Na le magnomea anareo ty mofo ty aly sarotre vaho ty rano ty fampijalea aza Yaveh, na le zay aza, le tsy hihaja sase ty mpagnanareo, fa hahisake ty mpagnananareo amity masonareo vatane nareo. 21 Ty sofinareo haharey rehake baka afaranareo hanao ty hoe:" Toy ro lala, amity mindeha," na miotake hoamity ankavana na miotake ho amity ankavia nareo. 22 Ho tsinontsinoe nareo reo sare sokinareo ze rinakoke volafoty vaho reo sare mitily volamena. Harianareo manahake ty vorodamba ty falim-bola zay. Hirehake amirey nareo ty hoe:" Miala eto." 23 Hagnomea ora hoahy ty volenareo Re laha fa mamafe egne amity tane nareo, naho mofo mitobatobake bakamity tane, naho ty vokatre le hitobatobake. Amize andro zay le hiraoke egne amity akata mivelatre reo biby harenareo. 24 Reo agnombe vaho reo borike, ze miasa tane, le hihina ty voaisy sira ze kinororoke tamity fangaly vaho ty fangaly fanjaitre. 25 Egne amity vohitse agnabo iaby vaho ty tazoa ambone iaby, le hisy baibon-driake hily naho rano mindeha, amity andro ty famonoam-bey ze hitonta ty tilikambo. 26 Hanahake ty hazava ty masoandro ty hazava ty vola, naho ty hazava ty masoandro le hamiratre impito-hene, manahake ty tara-masoandro ty andro fito. Hamehe ty fanorotoroa ty ndaty Yaveh naho hagnafake ty fere ty namereane iereo. 27 Ingo, ty agnara Yaveh le avy bakagne amity toera lavitre, mirehetre amity helone vaho deboke mateve. Feno havignira ty sognine, naho ty lelane le manahake ty afo mandrava. 28 Ty fofognaine le manahake ty fikija ty riake ze mahatratre zisikagne amity vozo kele, mba haniva ty firene amity siva ty fandrava. Ty fofom-piaine le hisatre amity valagnora ty ndaty mba hahavy iereo hirererere. 29 Hana antsa hoe ty amity hale hiambena ty fifalea masy nareo, naho fifaleam-po, manahake ty amity findeha ty ndaty miarake amity sody ho egne ambohy Yaveh, ho eo amity Vatolamy Israely. 30 Hatao Yaveh rie ty famirapirata ty feone naho hatorone ty fihofahofa ty sandrine amity heloke mirehetre vaho lelan'afo, amity tafion-tioke, oram-baratre, naho havandra. 31 Fa amity feo Yaveh, le hitonta Asyria; hagnisy iereo amity tehe Re. 32 Ty fofoke iaby amity tsila-ketae voatendre ze hatobo Yaveh amiereo le hiaraha ty feon'amponga tampake vaho valiha eo am-pitolognane vaho hialiane amiereo. 33 Fa misy toera fagnoroa voaoma hatra niela. Eka mare, voaoma ho ahy ty mpanjaka zay, naho nataon'Agnahare laleke vaho malalake. Le fa vogno amity afo vaho hetae bey le bey ty antontane. Ty fofognay Yaveh, manahake ty fandria ty solifara, le handrehetre zay.