¹ Loza Ariela, Ariela, ty tana nitobea Davida! Ampeo tao ty tao; ao hiheren-kere ty andro fifalea. ² Fa hanao faherano Ariela Raho, ka handala vaho hitagny re; naho hanahake Ariela re Amiko. ³ Hitobe magnodidy anao Raho vaho hametrake faherano hanemetre anao, naho hananga manda handietre anao Raho. ⁴ Hoambane riha ka hirehake egne amity tane; ho ambane bakegne amity deboke ty rehanao. Hanahake ty angatre miakatre ao amity tane ty feonao, naho ty rehanao le haleme vatane bakao amity deboke. ⁵ Reo malaso mpanafike anao le hanahake ty deboke malineke, naho maro amireo ze masiake ro hanahake ty akofa ze velo. Hiseho tampoke zay, ao agnate ty andro tsy ampe. ⁶ Hoavy ao aminao miarake amity hotron'ora, horohoron-tane, tabataba bey, miarake amity tioke-mahere vaho tafion-tioke, naho lelan'afo mandrava Yaveh. ⁷ Hanahake ty nofy, fahisaha amity hale zay: Ty malaso ty firene iaby hialy handietre Ariela vaho ty fiaro mafene. Hanafike aze iereo naho ty fagnamafesane hisere aze. ⁸ Hanahake ty lahilahy kere te magnonofy mihina, kanefa laha fa mifoha re le kere ty trone. Hanahake ty ndaty maran-drano te magninofy mino, kanefa laha fa mifoha re le rerake, vaho tsy afake aran-drano. Eka, ho hoe zay ty firene bey maro ze mialy handietre ty vohitse Ziona. ⁹ Ataovy hisake ty vatanareo ka ao ho hisake; tampeno ty masonareo ka ao ho goa! Ao ho mamo, kanefa tsy amin-divay; ao hivembe, kanefa tsy amity toake. ¹⁰ Fa Yaveh le fa nagnily ty fagnahy ty roronao laleke tao aminareo. Le fa nagnily ty masonareo Re, ry mpaminane, naho le fa nanako ty lohanareo, ry mpahisake. ¹¹ Reo talily iaby taminareo le fa manahake ty soratre ao amity boke ze voatombo-kase, ze mete hamea ty ndaty iaze raike ze nanare, ka hatao ty hoe:" Vakio toy." Re kea le manao ty hoe:" Tsy azoko atao, satria voatombo-kase toy." ¹² Laha amea ty raike ze tsy mahay mamaky ty boke, ka hatao ty hoe:" Vakio toy," le ie hanao ty hoe:" Tsy mahay mamaky raho." ¹³ Ty Tompo nanao ty hoe:" Mamonjea ahy amity vavake reo vahoake reo naho mandaza ahy amity sogny iereo, kanefa lavitre ahy ty arofo iereo. Ty fandaza iereo ahy le lily reo ndaty ze nanare avao. ¹⁴ Laha zao, ingo, hiakatre hanao zaka-mahagaga eo amireo vahoake reo raho, hagaga orihe fahagaga. Ho foa ty hamarea ty ndaty maregniereo, naho hanjavo ty hazavan-tsay ty ndaty maregniereo." ¹⁵ Loza reo ze magnaja laleke ty fikasa amy Yaveh, vaho reo ze miasa ao agnate ieke. Hoe iereo ty hoe:" Ia vao ro mahisake anay, naho ia ro mahay anay?" ¹⁶ Mampivali-draraha nareo! Tokone hihere ho tanemanga vao ty mpanao tave, mba hahafaha reo zaka ze namboare mirehake mikasike aze ze nagnamboatre zay ty hoe:" Tsy nanao ahy re," na ty zaka dinineke hirehake miomba ty nandineha aze ty hoe:" Tsy mahay re"? ¹⁷ Tsiela tsiela avao, le hizare baibo ty Libanona naho ty baibo ho ala. ¹⁸ Amize andro zay le haharey ty reha ty boke ty maregne, naho ty maso ty goa le hahisake ao amity iem-pito. ¹⁹ Ty ore le hifale ao amy Yaveh ndraike, naho ty mahantra eo amireo ndaty le hifale ao amity Raike Masy Israely. ²⁰ Fa reo masiake le hijano, naho ty mpagnaraty le hanjavo. Reo iaby ze tea manao raty le ho ravae, ²¹ amity meso ro hagnafaha ty ndaty amity mpanao raty. Mametrake fandrike hoaze ze mikatrake ty rarene eo ambavahady vaho mametrake ty mare eo amity vande avao iereo. ²² Laha zao le ezao ty safa Yaveh mikasike ty foko Jakoba_Yaveh, ty nagnavotre Abrahama:" Tsy ho megnatre sase ty Jakoba, na hivalike ty tarehene. ²³ Kanefa laha fa mahisake ty anane re, ze asa ty tagnako, le hagnamasy ty agnarako iereo. Hagnamasy ty agnara ty Raike Masy Jakoba iereo naho hitsanga amin-tahotre an'Agnahare Israely. ²⁴ Reo ze mivio fagnahy le mboe hahazo hazavan-tsay, naho reo mpitaray le hahazo fahaia."