¹ Loza ty satron-kasy folera ty rehareha reo mpinon-toake ao Efraima, vaho ty folera malazo ty hasoane bey hasy, ty satron-kasy ze atoboke eo andoha ty baibo maintso mava reo ze azo ty divay! ² Ingo, ty Tompo le mandefa ze foloay vaho mafe; manahake ty tafion-tiok' avandra vaho taion-tioke mandrava, hoe ty ora mitarike vaho rano manafotre; naho hanorake ty satron-kasy folera kirai-kiraike ho amity tane Re. ³ Ho lia liae ambane tomboke ty folera rehareha reo mamolava Efraima. ⁴ Ty folera malazo ty hasoane bey hasy, ze eo andoha ty baibo lonake, le hanahake ty aviavy mialen-tao aloha ty lohatao, zay, laha fa hisa ty ndaty zay, laha eo antagnane zay, le atelene. ⁵ Amize andro zay Yaveh tompo ty maro le ho lasa satron-kasy soa tarehe vaho diadema ty hasoa hoahy reo sisa tavela amity vahoakene, ⁶ fagnahy ty rarene ho aze ze mitoboke amity fitsara, naho here hoahy reo ze mampimpoly reo fahavalone eo ambavahady iereo. ⁷ Fa na le reo aza le midoladola amity divay, naho mivembe amity zaka-finome mahere. Ty mpisoro vaho ty mpaminane le adoladola ty zaka-finome mahere, naho atele ty divay iereo. Mivembe amity zaka-finome mahere iereo, mivembe amity fahisaha naho midoladola amity fanam-pahan-kevetre. ⁸ Feno vatane ty latabatre iaby, ka tsy misy toera malio. ⁹ Aminia ro hampianarane fahaia, naho aminia ro hagnazavane ty talily? Amireo ze vaho nisara-nono vao? ¹⁰ Fa baiko miampe baiko, baiko miampe baiko zay; fotsipeke miampe fotsipeke; fotsipeke miampe fotsipeke; kele eto, kele eroa. ¹¹ Miarake amity sogny magnaraty vaho rehake vahiny vatane ro hirehafane amity vahoake toy. ¹² Taloha Re le nirehake tamiereo hoe:"Toy ro fitofa, ameo fitofa ze rerake; naho toy ro famelombeloma," fa tsy nidranjy iereo. ¹³ Ka ho baiko miampe baiko, baiko miampe baiko; fotsipeke miampe fotsipeke, fotsipeke miampe fotsipeke; kele eto, kele eroa amiereo ty safa Yaveh; mba hindeha iereo naho hitonta, naho ho simba, voafandrike, naho voatrepake. ¹⁴ Ka dranjigno ty safa Yaveh, nareo ze magnaraty, nareo ze mandily amity vahoake ze ao Jerosalema toy. ¹⁵ Hiseho zay satria nirehake nareo hoe:" Nanao fagnenkea tamity fate zahay, naho nanao fifagnaraha tamity fiaigna tsy hisake. Ka laha mandrio eo ty karavasy manafotre, le tsy hahazo antika zay. Satria tika nanao ty vande hiaro antika, naho ty fitake ho reharehantika." ¹⁶ Laha zao Tompo Yaveh le manao ty hoe:" Ingo: Hagnore fototre ao Ziona raho, vato voasedra, vato fehezoro lafovily, fototre azo antoke. Ze mino le tsy ho megnatre. ¹⁷ Hataoko fotsipeke ty fitsara, naho pilao ty hamarea. Hamafa ty fialofa reo vande ty havandra, naho hanafotre ty toera mihaja reo ton-dra-drano. ¹⁸ Ho rava ty fagnenkea nareo tamity fate, naho tsy hitsanga ty fifagnarahanareo tamity fiaigna tsy hisake. Laha fa mandrio ty tondran-drano misavoravora, le ho feno zay nareo. ¹⁹ Na mbia na mbia handriogna zay, le hameno anareo zay, naho isa-maray le handrio zay naho hoavy andro aman'ale zay. Laha fa azo ty talily, le hagnorohoro zay. ²⁰ Fa bory loatre ty fandrea laha hihitia ty ndaty, naho kele loatre hoaze ty fisafora laha hanaroma ty vatane." ²¹ Hitsanga hoe ty Hohitse Perazima Yaveh; hanaitre ty vatane hoe ty tane amity Baibo Gibeona Re mba hanao ty asane, ty asane tsy mahazatre. ²² Laha zao are le ko magnaraty, laha tsy zay le ho henjagne ty fehea nareo. Le fa naharey lily famoteha eto antane tamy Tompo Yaveh tompo ty maro raho. ²³ Mifantoha ka ndranjigno ty feoko; midranjigna soa naho dranjigno ty rehako. ²⁴ Feie vao miasa tane avao ty mpambole ze miasa tane andro raike mba hamafe? Mitombon-doha zisikagne vaho manao benga ty baibo vao re? ²⁵ Laha fa baka nagnoma ty tane re, feie vao tsy mizara ty voa ty nigela, mamafe ty komina, mametrake ty vare tritike milahatre naho ty vare hordea amity toera voamare, naho ty ampemba egne amity sisine re? ²⁶ Magnanatre aze ty Zagnaharene; magnanatre aze ampimarea Re. ²⁷ Fagnampe zay, tsy fofohe amity vy ty nigela, na aotake amity Komina ty laro ty sarete; fa fofohe amity fantaka ty nigela, naho amity hetae ty Komina. ²⁸ Kosehe atao mofo ty vare nefa tsy manify loatre, naho na le mizara zay aza reo laro ty kalesene vaho reo soavalene, le tsy mandia zay reo soavalene. ²⁹ Reo kea le bakamy Yaveh tompo ty maro, ze soa amity fagnanara naho soa le soa amity famarea.