¹ Talily miomba ty tane efetre amoron-driake. Manahake ty talio mamakivaky i Negeva ro hiavia zay mandrio bakagne agnefetre, bakagne amity tane loza. ² Fahisaha raty ro namea ahy: ty lahilahy mpamitake le namitake, naho ty mpandrava le nandrava. Miakara naho tafiho, ry Elama; anovo faherano, ry Mediana; hampijano ty taraine iaby Raho. ³ Laha zao le feno fanaintaigna ty valahako; fanaintaigna manahake ty taintay ty ampela miterake ro namehe ahy; nihohoke noho ty zaka reiko raho; nikoronta tamity zaka hisako raho. ⁴ Torotoro ty arofoko, mihovitre ty tahotre raho. Ty hariva, andro teako agnate ty andro, le ninday horohoro hoahy. ⁵ Nagnoma ty latabatre iereo, vinela iereo ty lamba firakofa ka nihina vaho nino; mitsangana, ry roandrian-dahy, hosoro diloilo ty ampinganareo. ⁶ Fa zao ro talily Tompo tamiko hoe:" Mindehana, mametraha lahilahy mpiambe raike; tsy maintsy mitao ze hisane re. ⁷ Laha fa mahisake kalese, mpitikitse-soavale roe, mpitikitse borike, naho mpitikitse kamela re, le tokone hidineke vaho hahay." ⁸ Nitaray ty lahilahy mpiambe hoe:"Ry Tompo, teo amity tilikambo fiambena raho le nitsanga zisike ty andro raike iaby, isan'andro, naho teo amity toeram-pitiliko zisike ty hale iaby." ⁹ Ingo tamy ty kalese raike miarake amity lahilahy raike vaho mpitikitse soavale roe. Nikaike mafe re nanao hoe:" Le fa rava Babylona, rava, naho reo sare vonga ty zagnaharene iaby le poteke amity tane." ¹⁰ Ry finofoke vaho sinivako, ana ty tragno fadisanam-bareko! Ze reiko tamy Yaveh tompo ty maro, ty Zagnahare Israely, le fa nataliliko taminareo. ¹¹ Talily miomba Edoma. Nisy raike nikaike ahy bakagne Seira hoe:" RY mpiambe, ombia ro ho tampetre ty hale? Ry mpiambe, ombia ro ho tampetre ty hale? ¹² Hoe ty mpiambe ty hoe:" Hoavy ty maray naho ty hale avao kea. Laha magniry ty hamonje riha, le magnotanea; naho miheregna ndraike." ¹³ Talily miomba Arabia. Agne amity tane efetre Arabia ro andanianareo ty hale, ry roandrian-Dedanita. ¹⁴ Mindaisa rano hoahy ty marandrano; ry vahoake ao amity tane Tema, salakao amity mofo reo mpifindra-tana. ¹⁵ Fa iereo le nilay ty meso, tamity meso voata, tamity folese voarirotse, naho tamity vesa ty aly. ¹⁶ Fa zao ro nirehafe ty Tompo tamiko hoe:" Ao agnate ty tao raike, manahake ty hisa ty mpiasa tagne kinarama zisike ty tao, le hifara ty hasy Kedara iaby. ¹⁷ Mpanao folese, lahilahy mpialy Kedara tsy ampe sisa ro ho tavela," satria Yaveh, ty Zagnahare Israely, ro le nirehake.