¹ Talily mikasike ty Baibo ty Fahisaha: Ino ro antone nindehananareo iaby hoagne amireo ambone tragno? ² Ty mba hahareizanareo ty tana feno korake vao, tana ze feno fifalea? Ty mate aminao eo le tsy mate ty meso, naho tsy mate tamity aly iereo. ³ Reo mpandily anao iaby niara-nilay, fa voa alake tsy nampiasa folese iereo; ie iaby le voa alake niarake, na le nilay lavitre aza iereo. ⁴ Laha zao le hoe raho hoe:" Ko magnente ahy, fa hitagny mafe le mafe raho; ko miezake hampiono ahy mikasike ty harava ty anakampela ty ndatiko." ⁵ Fa misy ty andro ty korake, fagnosehosea, naho fifanjevoa hoahy ty tompo Yaveh tompo ty maro, ao amity baibo ty Fahisaha, harava reo manda, naho ty ndaty mikai-kaike mafe agne amireo vohitse. ⁶ Elama nangalake ty tragnon-jana-polese, niarake tamity kalese reo lahilahy naho kira nagnafake ty fogno ty ampinga. ⁷ Fa reo baibo ze finilinao vatane le ho feno kalese, naho reo mpitiki-tsoavale le hangalake ty toerane eo ambavahady. ⁸ Nagnafake ty fiaro Joda Re; naho tamize andro zay riha le nagnente reo zaka-fialia eo amity Lampa ty ala. ⁹ Nahisake ty manke ty tana Davida nareo, fa maro reo, naho namory ty rano ty dobo ambane nareo. ¹⁰ Nagnisake ty foko Jerosalema nareo, naho nanonta reo tragno mba hagnamafea ty manda. ¹¹ Namboatre famoria teo agnivo reo manda roe nareo hoahy ty rano ty dobo faela. Fa tsy mba nidineke ty mpamoro ty tana nareo, ze nagnoma zay zisike ela. ¹² Tamize andro zay ty tompo Yaveh tompo ty maro nikaike fitagnia, fandala, fiharatan-doha, naho fanoa akanjo fandala. ¹³ Fa ingo, kea , ty fandaza vaho ty hafalea, ty famonoa agnombe vaho ty famonoa agnondry, fihinan-kena vaho finoman-divay; ao tika hino vaho hihina, fa ho mate tika hamaray. ¹⁴ Zao ro natalily Yaveh tompo ty maro teo antsofiko:" Eka mare fa tsy henga ze helonareo zay, eka fe na le ho mate aza nareo," hoe ty tompo Yaveh tompo ty maro. ¹⁵ Ty tompo Yaveh tompo ty maro, nitalily zao:" Mindehana mbaeo amity mpitan-draraha, agne amy Sebna, iaze mpandily ty tragno, naho rehafo ty hoe: ¹⁶ 'Ino ro ataonao eto naho ia ro nagnomea lala anao hihaly kibory ho ahy ty vatanao, hagnamboatre kibory egne ambone vaho handavake toera fihisa egne amity vatolampy?"' ¹⁷ Ingo, Yaveh le fa hanorake anao, ry lahilahy mahere, hanorake anao ho ambane; handialia anao mafe vatane Re. ¹⁸ Hamerevere anao vatane Re, naho hampisavoaravoara anao hanahake ty laboly mbaeo amity tane malalake. Agne ro hifatezanao, naho ho agne kea reo kalese ty hasinao; ho lasa hegnatre hoahy ty tompo ty tragnonao riha! ¹⁹ "Ho roaheko hiala eo amity rarahanao vaho ty toeranao riha. Haonga riha. ²⁰ Amize andro zay Raho le hikaike i Eliakima mpanompoko anadahy Hilkia. ²¹ Hampiakanjoeko amity akanjo lavanao re naho hasiako ty santiranao, naho hafindrako ho eo antagnane ty fahefanao. Ho rae ty vahoake Jerosalema vaho ty foko Joda re. ²² Hatoboko eo an-tsadrine ty famoha ty foko i Davida; hamoha re, naho tsy hisy hagnily; hagnily re, naho tsy hisy hamoha. ²³ Hatoboko re, hoe ty fihatogna-jaka amity toera azo atonke, naho hizare toeran-kasy hoahy ty fokon-draene re. ²⁴ Hahanto iereo amine ty hasy ty fokon-draene iaby, ty anane vaho reo fokone, ty fanake kele iaby bakamireo kapoake zisikamity tavoara iaby. ²⁵ Amize andro zay_zao ro talily Yaveh tompo ty maro_hafaha ty fihatognan-jaka amity toera mafe ore, ho potehe naho ho lavo, naho ty lanja amizay le ho tampahe_fa Yaveh ro nirehake.