¹ Reo zaka hisa Isaia ana i Amoza tao agnatene, mikasike i Joda vaho Jerosalema. ² Amity andro farane ro hagnoregna vohitse ty tragno Yaveh ho vohitse agnabo vatane, naho hitsanga eo ambone ty tazoa, naho reo firene iaby hombaeo amizay. ³ Nadty maro ro hoavy vaho hirehake ty hoe:" Avia, hindeha tika hiakatre egne ambohitse Yaveh, agne antragnon'Agnahare Jakoba, mba hahafahane magnanatre ty ilane amireo lalane amintika, naho mba hindenantika amity lalane." Fa ty lala le hiakatre bakao Ziona, naho ty safa Yaveh bakagne Jerosalema. ⁴ Hitsara eo amireo firene Re naho hagnomea fanam-pahan-kevetre hoahy reo ndaty maro hoe; hanorotoro ty mesone iereo ho lelam-pangaly, naho ty lefone ho fanam-paham-boaloboke; ty firene tsy hagnakatre ty mesone handietre firene, na hianatre hoamy ty aly. ⁵ Ry foko Jakoba, avia, naho ao tika hindeha amity hazava Yaveh. ⁶ Fa le fa nienga ty ndatinareo nareo, naho foko Jakoba, satria feno ty fomba ty antignana iereo vaho mpamaky talily hoe reo Filistina, naho nifandrae tagna tamity ana ty mbahiny iereo. ⁷ Feno volafoty vaho volamena ty tane iereo, naho tsy misy farane ty hareane; feno soavale avao kea ty tane iereo, naho tsy misy farane ty kalesene. ⁸ Feno sampe avao kea ty tane iereo; manompo ty asa ty tagnane avao, zaka ze natao ty rambon-tagnane avao iereo. ⁹ Hihohoke ty vahoake, naho ty ndaty hitonta; laha Zao ko mananga iereo. ¹⁰ Mindehana agne amity toera feno vato naho mihaja amity tane amity horohoro Yaveh vaho amity hasy ty hafoloaine. ¹¹ Ty hafoloay ty maso ty ndaty le hoambane, naho reo ndaty mirehareha le hoambane, naho Yaveh arere avao ro hakare amize andro zay. ¹² Fa hisy ty andro Yaveh tompo ty maro handietre ty ndaty iaby ze mirehareha vaho miakatre, naho mandietre ty ndaty iaby ze miavo_naho hoambane re_ ¹³ naho mandietre reo sedera Libanona iaby ze ambone vaho nakare, naho mandietre reo hetae terebinta Basana iaby. ¹⁴ Fa handietre reo vohitse agnabo iaby ty andro Yaveh Tompo ty maro zay, vaho handietre reo tazoa iaby ze fa nakare, ¹⁵ naho mandietre reo tilikambo agnabo, vaho mandietre reo manda tsy mete rava, ¹⁶ naho mandietre reo sambo ty Tarsisy iaby, vaho mandietre reo sambo soa vatane iaby. ¹⁷ Ty herareha ty ndaty le hoambane, naho ty avognavo ty nadty le ho tonta; Yaveh arere avao ro hakare amize andro zay. ¹⁸ Ho rava vatane reo sampe iaby. ¹⁹ Hindeha agnate lava-bato reo ndaty naho ao agnate lavake ty tane, noho ty horohoro Yaveh, vaho noho ty hasy ty hafoloaine, laha fa mitsanga hagnorohoro ty tane re. ²⁰ Hanorake reo sampe volafoty vaho volamena ty ndaty amize andro zay ze natao iereo ho tompoe__hanorake reo agne amity valavo vaho ramanavy iereo. ²¹ Hindeha agnate lavake eo amity vato ty vahoake naho ampagnivoa ty harambato, noho ty horohoro Yaveh vaho noho ty hasy ty hafoloaine, laha fa mitsanga hagnorohoro ty tane Re. ²² Ajanogno ty fatokia ty ndaty, ze eo amity vavorone ty fofognaine, fa ino ro fagnampea zay?