¹ Ty fahisaha Isaia ana i Amosa, ze hisane nahakasike i Joda vaho Jerosalema, tamity andro Ozia, Jotama, Ahaza, naho i Hezekia, mpanjaka i Joda. ² Mdranjigna, ry lagnitre, naho manongilagna sofy, ry tane; fa le nirehake Yaveh hoe:" Le namaha vaho niteza ty kolo raho, nefa navande tamiko iereo. ³ Ty agnombe mahay ty tompone, naho ty borike mahay ty zaka famahana ty tompone aze, kanefa tsy hay ty Israely, tsy takatry ty Israely. ⁴ Loza! Ry firene, mpanonta, vahoake mavesan-keloke, foko mpanao raty, anadahy mpanao meloke! Le fa nahafoe Yaveh iereo, le fa nanao tsinontsino ty Masy Israely iereo, le fa nagnemotre ty vata iereo tamiereo. ⁵ Nagnino nareo ro mboe voafofoke? Nagnino nareo ro miraike zisikagne? Marare ty loha iaby, osa vatane ty arofo. ⁶ Tsy misy faritre tsy fere zisikamity tomboke ka hatragne amity loha; fere, naho manga vaho fere vao kea; mboe tsy voatoka, voalio, na finehe, na tsinabo tamity diloilo kea reigne. ⁷ Laha ty firenenareo, may reo tananareo; reo baibonareo_eo amity fiatrehanareo, ro hamoteha ty ndaty hafa firene reo_foa naho rava, rinava reo ndaty hafa firene. ⁸ Ty anakampela Ziona le nenga manahake ty tragno boka egne antanem-boaloboke, manahake ty fandrea egne amity baibo kaokaombira, hoe ty tana natao faherano. ⁹ Laha tsy nagnenga sisa kele tamintika Yaveh Tompo ty maro, le fa manahake i Sodoma tika manahake zay, le fa nitovy tamy Gomora tika manahake zay. ¹⁰ Midranjigna ty safa Yaveh, nareo ry mpandily Sodoma; midranjigna ty lalan'Agnahare, nareo ry vahaoke Gomora hoe: ¹¹ "Ino ty hamaroa ty soronareo hoahy?" hoe Yaveh." Le fa mamo ty agnondrilahy atao fagnatetre oroa raho, naho ty sabora ty biby mifehe; ka tsy teako ty lio ty agnombelahy, anakagnondry, na ose. ¹² Laha fa avy hiaboake eto agnoloako nareo, ia ro nangatake ze taminareo, mba handia ty kianjako? ¹³ Ko minday fagnatem-poa sase; zaka-raty ty liten-ketae magnitre amiko, ty vola vaovao naho ty mesom-piangona_tsy afake ty handefetre amirey fiangonan-draty rey Raho. ¹⁴ Hejeko reo vola vaovaonareo naho reo hafalea voatondronareo, enta-mavasatre ho ahy reigne; rerake amity fiareta reigne raho. ¹⁵ Ka te laha fa mamelatre ty tagnanareo amity vavake nareo, le magnaja ty masoko tsy hoaminareo raho; na le manolotre vavake maro aza nareo, le tsy hidranjy raho; feno lio ty tagnanareo. ¹⁶ Sasao, liovo ty vatanareo, afaho tsy ho eo amasoko ty haratia reo asanareo; mitofa amity haratia; ¹⁷ mianara manao ty soa; mipaia ty rarene, ahitio ty fampijalea, magnomea rarene ho ahy reo bode, arovo ty mijale. ¹⁸ "Avia, naho, indao tika hiara-handineke," hoe Yaveh;" Na le manahake ty jaky aza ty hadisoanareo, le ho foty manahake ty oram-panala reigne, na le mena manahake ty sily aza reigne, le hanahake ty volon'agnondry foty. ¹⁹ Laha magnenke vaho mete nareo, le hihina ty soa bakamity tane, ²⁰ fa laha milietre vaho miraike nareo, le ho ravae ty meso," fa ty vava Yaveh ro mirehake zay. ²¹ Nefa, lasa janga ty tana matoky! Re ty feno rarene_Re ty feno hamarea, fa amizao kea re feno mpamono ndaty. ²² Niova ho tain-drenzeke ty volafotinareo, miharo rano ty divainareo. ²³ Reo roandrianareo le mpavande naho nama ty mpandrebake; tea vandevande iaby naho team-pimpay ambonene. Tsy miaro ty bode iereo, na ty taray amity lalane ty mijale ze avy eo agnoloa iereo. ²⁴ Laha zao le ezao ro talily Yaveh Tompo ty maro, ty Mahere Ysraely hoe:" Loza ho ahy iereo! Hanao valefate ho ahy reo mpifanao amiko raho, naho hamalefate reo fahavaloko raho; ²⁵ hampimpoly ty tagnako aminareo Raho, hagnalio ty tain-drenzenareo manahake ty amity karbonetra raho, naho hagnafake ty tain-drenzeke iaby aminareo. ²⁶ Hagnampoly amity lalane reo mpitsaranareo hoe ty tamity voalohane Raho, naho reo mpagnomea-hevenareo hoe ty tamity vaho voalohane; tafara zay nareo le hatao ty hoe tana ty hamarea, tana matoky. ²⁷ Ho voavonje amity lio rarene ty Ziona, naho reo mpibebane amity hamarea. ²⁸ Hiarake ho torotoro ty mpavande vaho ty mpanonta, naho reo nahafoe Yaveh le ho tampetre ty amine. ²⁹ "Fa ho afa-baraka nareo amireo hetae terebinta masy ze nirienareo mafe, naho ho megnatre nareo amireo baibo ze le fa finilinareo. ³⁰ Fa hanahake ty hetae terebinta raike ze mihintsan-drave nareo, naho manahake ty baibo ty tsy misy rano. ³¹ Ty lahilahy mahere le hanahake ty vohavoha, naho ty asane manahake ty pitek'afo; hiara-may ie roe reo, naho tsy misy hamono ty afo iereo.