¹ Ingo, Tompo Yaveh Tompo ty maro le fa hagnafake mpita vaho vatse amy Jerosalema vaho Joda: Le ty fagnomea mofo iaby, vaho ty fagnomean-drano; ² ty lahilahy mahere, ty mpialy, ty mpitsara, ty mpaminane, ty mpamaky talily, ty olobey; ³ ty kapitene ty dimampolo, ty vahoake manan-kaja, ty mpagnomea hevetre, ty mpanao asa-tagna za-draraha, naho ty Ombiasa malaky. ⁴ "Ajalahy avao ro hatoboko ho mpitarike iereo, naho reo tanora ro handily eo amiereo. ⁵ Hampijale ty vahoake, ty kirai-kiraike ampijale ty hafa, naho ty kirai-kiraike ampijale ty namane; ty kolo ro hagnararaotre ty Raoke, naho hipay reo sao amity hajae reo nambane. ⁶ Hangalake ty rahalahine ao atragnon-draene vatane aza ty ndaty raike ka hirehake ty hoe:' Mana akanjo riha; mimetea ho mpandily anay, naho ao ze faharava zao ho eo antagnanao.' ⁷ Amize andro zay le hikorake re ka hanao ty hoe:' Tsy ho mpagnafake raho; tsy mana-mofo taho na siky. Tsy hanao ahy ho mpandily ty vahoakenao riha."' ⁸ Fa lavo Jerosalema, naho nitonta ty Joda, satria mandietre Yaveh ty rehane vaho ty asane, mipay ty maso ty hasine. ⁹ Ty hente ty tarehene le vavolombelo mita iereo; naho atalily iereo manahake Sodoma ty hadisoane; tsy mba hahajane zay. Loza hoahy reo! Fa nanao loza bey ho ahy iereo avao re. ¹⁰ Ambarao ty ndaty mare fa tsy hagnino, fa hihina ty vokatre ty asane iereo. ¹¹ Loza hoahy ty raty fagnahy! Fa ho raty ty hanjo aze, fa ty vale ty asa ty tagnane ro hatao amine. ¹² Ry ndatiko__kolo ro mampijale iereo, naho ampela ro manjaka eo amine. Ry ndatiko, reo ze mitarike anareo le mamio lala anareo naho mampamorovoro lalan-kombanareo. ¹³ Mitsangana noho ty fitana Yaveh, mitsanga hita ty ndaty Re. ¹⁴ Hoavy amity fitsara handietre reo olobey ty ndatine vaho reo mpitarine Re hoe:" Namoteke ty tanem-boaloboke nareo; ao antragnonareo ze voa-rebake bakamity mahantra. ¹⁵ Nagnino nareo ro manorotoro ty ndatiko naho magnosehose ty tarehe ty mahantra?" Zay ro talily Yaveh Tompo ty maro. ¹⁶ Zay ro safa Yaveh satria mirehareha ty anakampela Ziona, mindeha amity loha mian-jagnanja, naho mangareke amity masone, mitignantinga am-pindeha laha mamindra amity tombone, ¹⁷ laha zao le hagnisy arete manakom-pere eo andoha ty anakampela Ziona ty Tompo, naho hatao Yaveh sola iereo. ¹⁸ Amize andro zay le hagnafake reo ravake ty ranjo soa tarehene, reo fehelohane, reo fihamina sare-vola; ¹⁹ reo kavy, reo ravaken-tagna, vaho reo voaly; ²⁰ reo fognon-doha, reo ravan-kitro, reo santira, vaho reo vata fisia ranomagnitre, naho reo ravake minday vinta Tompo. ²¹ Hafahane reo peratre vaho reo kavin'oro; ²² reo akanjo lava fanoa raraha, reo kapoty, reo voaly, reo poketra kele; ²³ reo fitaratre kele, reo aten'akanjo rongone foty malineke, reo hengon-doha, naho reo fanarogna. ²⁴ Faimbo ro ho solo ty ranomagnitre magnitre; naho taly ro ho solo ty santira; loha sola ro ho solo ty volo soa-ogo; naho lamba fandala ro ho solo ty akanjo lava; naho tatomboke mahamay ho solo ty hasoa. ²⁵ Ho lavo-meso ty lahilahinareo, naho ho lavo agnaly reo lahilahy maherenareo. ²⁶ Hitagny ty vavahady Jerosalema ka handala; naho ho arere re titroboke amity tane.