¹ Talily mikasike Moaba. Eka mare, agnate ty ale raike le foa vaho poteke ty Ara-moaba; eka mare, agnate ty hale raike le foa vaho poteke ty Kira-moaba. ² Niakatre hoagne an-tempoly iereo, niakatre hoagne amity ambone ty ndaty Dibona mba hitagny; mitagny ao Nebo vaho ao Medeba ty Moaba. Hinaratre ho sola ty loha iereo naho voatampake ty vaoke iereo iaby. ³ Misiky lamba fandala iereo egne amireo lala iereo; mitoreo eo amity ambone-tragno vaho egne an-kianja ty kirai-kiraike, rerake ty tagny. ⁴ Mipay famonjea ty Hesbona vaho i Elale; rie zisikagne Jahaza ty feo iereo. Ka mipay famonjea reo lahilahy Moaba mitam-pialia; mihovitre ao agnate iereo avao iereo. ⁵ Mitagny ho ahy Moaba ty arofoko; milaisa hoagne Zoara vaho Egleta-selisia reo mpilaine. Miakatre agne amity tazoa i Lonita am-pitagnia iereo; mitoreo mafe ty amity hasimbane amity lala ho agne Horonaima iereo. ⁶ Maike reo rano Nimrima; malazo reo akata naho mate reo akata-baovao; tsy misy na ino ino maintso. ⁷ Iaby ze nampitomboene vaho navory iereo le niente iereo agne am-baibon-driake reo hetae-malahelo. ⁸ Nagnera ty faritane Moaba ty tagny; zisikagne Eglaima vaho Ber-elima ty toreo. ⁹ Fa feno lio reo rano Dimona; fa mboe beibey kea ro hoenteko amy Dimona. Hanafike ze tafilay bakao Moaba vaho reo sisa tavela eo amity tane ty liona.