¹ Hiferegnay Jakoba Yaveh; hifily Israely ndraike Re naho hagnampoly iereo ao amity tanene. Hiharo amiereo ty vahiny naho hamehe ty vatane amity foko Jakoba. ² Hinday iereo agne amity toerane reo firene. Le hinday iereo agne amity tane Yaveh ho mpanompo lahy vaho vave ty foko Israely. Hangalake reo ze le fa nangalake aze iereo, naho handily reo mpampijale aze. ³ Amity andro ze hagnomea Yaveh fitofa hoanareo amity fijalea vaho ty hirifiry, vaho amity asa mafe ze paie hataonao, ⁴ le hiantsa ze antsa fagnafaha ho ahy ty mpanjaka Babylona zao nareo hoe:" Hehe vita ty amity mpampijale, tampetre ty havignira mieboebo! ⁵ Lefa namoteke ty tehe ty raty fagnahy Yaveh, ty tehem-panjaka reo mpandily reo, ⁶ ty magnisy ty vahoake amity heloke amity fitiofa tsy manam-pitofa, ze nandily reo firene tamin-keloke, tamity fanafiha te tsy nijano. ⁷ Mitofa naho milamy ty tane iaby; manomboke mandaza amity antsa iereo. ⁸ Na le ty hetae Kypreso aza le mifale aminao amity sedera Libanona; hoe reo:' Ka satria natao ambane riha, le tsy nisy mpandily hetae niakatre mba handily anay.' ⁹ Miambe mafe ty hanalaka anao ty Fiaignan-tsy hisake ambane laha mbaeo riha. Mananga ty mate ho anao zay, ry mpanjaka ty tane iaby, mananga iereo eo amity sezan-droandriane, ry mpanjaka ty firene iaby. ¹⁰ Hirehake ie iaby naho hanao aminao hoe:' Le fa lasa maletse manahake anay riha. Le fa lasa manahake anay riha. ¹¹ Le fa nizotro ho mbaeo amity fiaignan-tsy hisake tamity feom-balihanao ty hasinao. Mizara eo ambanenao reo oletre, naho mameno anao reo soko.' ¹² Akore ty nitontanao bakagne an-dagnitse, ry kinta ty andro, anagny ty maray! Akore ty handilia anao amity tane, riha ze naharese reo Firene! Le fa nitalily tao agnarofonao riha hoe:' Hiakatre ho agne andagnitre raho, hagnakatre ty sezan-droandriako ambone reo Kintan'Agnahare raho, naho hitoboke eo ambohitse ty fiangona, agne amity farane lavitre ty avaratre. ¹⁴ Hiakatre ambone reo raho agnabo raho; anoeko manahake ty Zagnahare Agnabo vatane ty vatako.' ¹⁵ Kanefa nazotro tagne amity fiaignan-tsy hisake riha, tagne amity halale ty lavake. ¹⁶ Reo ze mahisake anao le handineke anao ka hidranjy anao iereo. Hanao iereo ty hoe:' Feie vao ty lahilahy ze nampihovitse ty tane, ze nagnozohozo reo fanjaka, ¹⁷ ze nanao zao iaby zao hanahake ty efetre, ze nandrava reo tana zay naho tsy namototse reo gadrane holy?' ¹⁸ Ty mpanjaka reo firene, iaby le miroro amin-kasy, ty kirai-kiraike sambe ao amity kiborine iaby. ¹⁹ Nefa riha le hafaha ao amity kiborinao manahake ty tahon-ketae naria. Manaro anao manahake ty siky ty mate, le reo ze tinomboke tamity meso, ze mizotro agne amireo vato ty lavake. ²⁰ Tsy haleve manahake iereo riha, satria le fa namoteke ty tanenao vaho namono ty vahoakenao. Ty foko ty mpanao raty le ho tognone sase." ²¹ Vognono ho ahy reo anane ty vonoa, ho ahy ty helo reo razambeine, mba tsy hitsanga iereo ka hangalake ty tane naho hameno zao iaby zao amireo tana. ²² "Hitsanga handietre iereo Raho"__zay ro talily Yaveh Tompo ty maro. Ho foagnako hiala amy Babylona ty agnara, ty foko, naho ty harea"__zay ro talily Yaveh. ²³ "Hanoeko ho ao amity fanagna reo vorondolo avao kea re, vaho ao amireo dobon-drano, naho hofafako amity kofafa ty famoteha re"__zay ro talily Yaveh Tompo ty maro. ²⁴ Le fa nifanta Yaveh Tompo ty maro hoe:" Arake ty le fa kinasako vatane, ro hiseho; naho arake ze le fa kinendreko, le zay ro ho ie: ²⁵ Ho poteheko ao amity tane reo Asyriana, naho liako amity tomboke eo amireo vohiko re. Le hafaha hiala amiereo ty zogane naho hiala eo amity taho iereo ty enta-mavesane." ²⁶ Zay ro fikasa ze kinasa ho ahy ty tane iaby, naho zay ro tagna ze nakare ho ahy reo firene iaby. ²⁷ Fa le fa nikasa zay Yaveh Tompo ty maro; ia ro hahasaka aze? Miakatre ty tagnane, ka ia ro hagnemotre zay? ²⁸ Tamity rao ze nifateza Ahaza mpanjaka ro nahavia ze talily zao hoe: ²⁹ Ko mifale, nareo ry Filistina iaby, fa tampake ty tsila-ketae ze nagnisy anareo. Fa bakao amity valaha ty mere ro hiakara ty menara, naho ty haterane le ho mere mirehetre mitily. ³⁰ Hampihina reo agnondrine eo amireo fihinanam-biloko ty anadahy voalohane ty mahantra, naho hiroro amim-pilamina ty ore. Ho vonoeko amity kere te hamono ty sisa velo aminareo ty valahanareo. ³¹ Mitoreova, ry vavahady; mitagnia, ry tana; inareo iaby le feno iaby, ry Filistina. Fa bakao avaratre ro hiavia ty rahon-deboke, naho tsy misy miala eo am-pilaharane. ³² Ka ino are ro hamalea ty ndaty ty ira ze firene zay? Fa hisa Yaveh ty Ziona, naho amine ao ro hahisa ty ore amity ndaty fialofa.