¹ Talily mikasike Babylona, ze voarambe Isaia anadahy Amoza: ² Mananga fagneva agne ambohitse mangalihaly, mikoraha mafe amiereo, akofakofaho amiereo ty tagnanareo mba hilirane amity vavahady reo roandria. ³ Le fa nandily reo masiko Raho, eka le fa nikaike ty mahereko mba hanao ty heloko, eka na le reo manao am-pirehareha aza. ⁴ Ty korake ty maro agnisake agne ambohitse, le manahake ty vahoake marobey! Ty tabataba ty fanjaka manahake reo firene maro tafiharo! Yaveh tompo ty maro ro magnamafe ty tafike amity aly. ⁵ Bakagne amity firene lavitre iereo, bakagne amity faran-dagnitse. Yaveh vaho reo zaka fitsarane, mba handrava ty tane iaby. ⁶ Mitoreova, fa antomotre ty andro Yaveh; hoavy miarake amity hapoteha bakamity Tsitoha zay. ⁷ Laha zao le hiraviravy ty tagna iaby naho ho tofoke ty arofo. ⁸ Hihorohoro iereo; ho azo ty fangirifiry vaho fijalea iereo, manahake ty ampela miterake. Sambe ho tsereke amiereo sambe iereo; naho hirehetre reo tarehene. ⁹ Ingo, avy amity havignira lozabey vaho heloke manafotre ty andro Yaveh, mba hahavy ty tane ho maike vaho hamoteke reo mpanonta bakao amizay. ¹⁰ Reo kinta ty lagnitre vaho reo telo noho refe le tsy hagnomea ty hazavane. Ty masoandro le haieke amity fivakiane, naho tsy hamiratre ty vola. ¹¹ Hanazy zoa iaby zao noho ty haratiane naho reo raty fagnahy noho ty helo iereo Raho. Hampijano ty avognavo reo mpirehareha vaho handrava ty avognavo ty masiake Raho. ¹² Hataoko mahala noho ty volamena voalio ty ndaty naho ty ndaty ho saro-paie noho ty volamena tsy miharo Ofira. ¹³ Laha zao le hataoko mihovitre amity alala Yaveh tompo ty maro, vaho amity androm-pimelofane bey ty lagnitre, naho hataoko miozo eo amity toerane ty tane. ¹⁴ Manahake ty gazela voahaza na manahake ty agnondry tsy misy mpiarake, ro hiheregna ty ndaty kirai-kiraike amity vahoakene naho hilaisane agne amity tanene. ¹⁵ Iaby ze hisake le ho mate iaby, naho iaby ze tratre le ho mate ty meso. ¹⁶ Ty kolo kele iereo le hotorotoroe eo amasone. Ty tragno iereo le halae naho reo valine ho voa alake. ¹⁷ Ingo, mandrisike reo Mediana mba hanafike iereo Raho, ty tsy ho voakasike ty volafoty, na nitea ty volamena. ¹⁸ Ty folese iereo hitomboke reo ajalahine. Tsy hana firegnay amity kolo vaho tsy handefetre amity kolo iereo. ¹⁹ Naho Babylona, ty soa-antsae vatane amireo fanjaka, ty famira-pira ty rehareha ty Kaldeana, le horavae manahake Sodoma vaho Gomora. ²⁰ Tsy hitoboha na hitoera zay zisikamity foko afara. Tsy hisy Arabo hagnoren-tragno agne, na hisy mpiarake agnondry hanao ty agnondrine agne. ²¹ Fa reo bibin'ala ty efetre ro hitoboke agne. Ho feno vorondolo ty tragno iereo; naho ostrisa vaho oselahy ro hifalehavanja ao. ²² Hitsero ao agnate fiarovane ty pison'ala, naho ty amboan'ala ao amireo toera soasoa. Antomotre ty androne, naho reo androne le tsy ho tara.