¹ Nikaike ty raike tamireo ana ty mpaminane ty Elisa mpaminane ka nanao tamine hoe:" Miakanjoa ho agne le, naho alae eo antagnanao ty tavoangy kele misy diloilo toy naho mindehana agne Ramota-gileada. ² Laha fa avy riha, le paio ty Jeho anadahy Josafata ana i Nemsy, ka milira naho ampitsangano eo amireo namane naho ento ao agnate efetre agnatene raike re. ³ Naho alao ty tavoangy misy diloilo ka ailigno eo ambone ty lohane naho rehafo ty hoe:' Zao ro safa Yaveh:" Le fa hinosoko ho mpanjaka eo amy Israely riha."' Bakeo le sokafo ty varavara, ka milaisa; le ko mitarezo." ⁴ Naho nindeha tagne Ramota-gileada, ty ajalahy, mpaminane. ⁵ Tamy niavy re, ingo, nitoboke ty kapitene ty tafike. Naho ty mpaminane ajalahy:" Ninday talily ho anao raho, ry kapitene." Jeho namale hoe:" Ho ania aminay zao?" Ty mpaminane ajalahy namale hoe:" Ho anao, ry Kapitene." ⁶ Ka nitsanga ty Jeho naho nilitre tagne antragno, naho naily ty mpaminane ajalahy teo ambone ty lohane ty diloilo ka hoe re tamy Jeho:" Zao ro safa Yaveh, ty Zagnahare Israely:'Le fa nagnosotre anao ho mpanjaka teo amity ndaty Yaveh, teo amy Israely raho. ⁷ Tsy maintsy vonoenao ty foko Ahaba tomponao, mba hamaleako fate ty lio reo mpaminane mpanompoko, vaho reo lio reo mpanompo Yaveh iaby, ze vinono ty tagna Jezebela. ⁸ Fa ho rava ty foko Ahaba iaby, naho ho foagnako eo amy Ahaba ty anadahy iaby, na ndevo zay na ndaty soa. ⁹ Hataoko manahake ty foko Jeroboama anadahy Nebata vaho manahake ty foko Basa anadahy Ahia ty foko Ahaba. ¹⁰ Reo amboa ro hihina i Jezebela ao Jezirela, naho tsy hisy ndaty handeve aze." Naho sinoka ty mpaminane ty varavara ka nilay re. ¹¹ Naho Jeho niakatre teo amireo mpanompo ty tompone, naho nisy raike nanao tamine hoe:" Mindeha soa vao ty zaka-iaby? Nagnino ro nimbaeo aminao ty ndaty gege eigne? Jeho namale aze hoe:" Hainareo igne ndaty igne naho hainareo ze zaka rehafene." ¹² Hoe iereo:" Vande zay. Ambarao anay." Jeho namale hoe:" Hoe zay vaho zay ro rinehane tamiko, naho hoe kea re hoe:" Zao ro safa Yaveh: Le fa nagnosotre anao ho mpanjaka teo amy Israely raho."' ¹³ Naho le sambe nagnafake malaky ty akanjone ambalike iereo ka nanao zay teo ambane Jeho tegne amity farane ambone ty tohatre. Tinio iereo ty trompetra naho hoe iereo hoe:" Mpanjaka ty Jeho." ¹⁴ Zay ty fomba niharoa Jeho anadahy Josafata ana Nimsy handietre i Jorama. Naho Jorama mpanjaka le fa niaro i Ramota-gileada, re vaho ty Israely iaby, noho Hazaela mpanjaka Syria, ¹⁵ Kanefa nihere tagne Jezirela ty Jorama mpanjaka mba ho afake amireo fere ze natao reo Syriana aze, laha fa nialy amy Hazaela mpanjaka Asyria re. Hoe ty Jeho tamireo mpanompo Jorama:" Laha zay ty dinenareo, le ko enga hisy ndaty hilay amizao vaovao zao agne Jezirela." ¹⁶ Ka nitikitse kalese nimbaeo Jezirela ty Jeho; satria nangalake harerake tagne ty Jorama. Naho nindeha nizotro mba hifankahita amy Jorama ty Ahazia mpanjaka Joda. ¹⁷ Nitsanga teo amity tilikambo Jezirela ty mpijilo, naho hisane namonje baka lavitre reo nama Jeho; hoe re:" Magnente ndaty mamonje raho." Jorama nanao hoe:" Mangala mpitiki-tsoavale raike, naho alefaso mba hanalaka iereo re; ambarao re mba hirehake hoe:' Avy mba hilongo vao nareo?"' ¹⁸ Ka nalefa mba hanalaka aze ty mpitiki-tsoavale; naho hoe re:" Zao ty reha mpanjaka:' Avy mba hilongo vao nareo?"' Naho hoe Jeho:" Mpino vao riha vaho ty fiongoa? Miotaha naho magnoriha ahy." Naho nitalily tamity mpanjaka ty mpijilo hoe:" Nahisake iereo ty mpinday talily, nefa tsy nimpoly re." ¹⁹ Naho nandefa mpitiki-tsoavale faharoe re, ze nimbaeo amiereo ka nanao ty hoe:" Zao ro safa ty mpanjaka:' Avy mba hilongo vao nareo?"' Jeho namale hoe:" Mpino vao riha naho ty filongoa? Miotaha naho magnoriha ahy." ²⁰ Nitalily ndraike ty mpijilo hoe:" Nifankahita tamiereo re, kanefa tsy nimpoly. Fa ty lala ze nindaisa kalese ro lala nindeha Jeho anadahy Nismy; le nirifatre mafe re." ²¹ Ka hoe Jorama:" Vognono ty kaleseko." Naho vinogno iereo ty kalesene, naho sambe nitikitre ty kalesene iaby, ty Jorama mpanjaka Israely vaho Ahazia mpanjaka Joda, mba hipay Jeho. Hisa iereo tao amity tana Nabota Jezirelita re. ²² Laha fa hisa Jorama ty Jeho, le hoe re:" Avy mba hilongo vao riha, ry Jeho?" Re namale ty hoe:" Ino ro filongoa eo, laha mboe maro bey kea ty fanompoan-tsampe amity asa fivarotam-bata vaho ty aoly raty Jezebela renenao?" ²³ Naho nahere Jorama ty kalesene ka nilay re naho nanao tamy Ahazia hoe:" Misy fitake, ry Ahazia." ²⁴ Naho le hinia Jeho tamity ozane iaby ty folesene ka tinifine teo agnivo ty soro Jorama; nitsovoke teo amity fone ty folese, ka nitonta bakegne amity kalese re. ²⁵ Naho hoe Jeho tamy Bidkara Kapitene:" Alao re naho atoraho ao amity baibo Nabota Jezirelita. Tiarovo tamizaho vaho riha niarake ninday kalese nagnorike Ahaba raene, le nanao ze visavisa zay hagnisia aze Yaveh: ²⁶ Yaveh nitalily hoe__'Nahisake ty lio Nabota vaho ty lio reo anadahine raho male__naho hampagnavake anao zay eto amity baibo toy vatane raho__hoe Yaveh. Ka amizao, alao re naho atoraho eo amio baibo o, arake ty safa Yaveh." ²⁷ Laha fa nahisake zay ty Ahazia mpanjaka Joda, le nilay niakatre tagne amity lala mbaeo Beta Hagana re. Fa Jeho nagnorike aze, naho nanao hoe:" Vono eo amity kalese avao kea re," naho tinify iereo teo amity tazoa ho agne Gora, ze eo agnila Jibleama. Nilay tagne Megido ty Ahazia ka le mate tagne. ²⁸ Niente reo mpanompone tamity kalese nimbaeo Jerosalema ty fatene naho nalevene tao amity kibory niarake tamireo razambeine tao antana Davida re. ²⁹ Naho tamity faha-raike amby folo tao nanjaka Jorama anadahy Ahaba ro nanomboke nanjaka teo amy Joda ty Ahazia. ³⁰ Laha fa niavy tao Jezirela ty Jeho, le rey Jezebela zay, naho nandoko ty masone, vaho nibango ty volone, naho nijilo teo andafonete re. ³¹ Laha nilitre ty vavahady ty Jeho, le hoe re tamine hoe:" Avy mba hilongo vao riha, ry Zimry, mpamono ty tomponao?" ³² Nijilo tegne andafonete ty Jeho naho hoe re:" Ia ro miandany amiko? Ia?" Bakeo le nisy tandapa roe na telo nijilo. ³³ Ka le hoe Jeho:" Apoho re." Ka napo iereo ty Jezebela, naho ty ilane tamity lio nipitsike tegne amity rindry vaho reo soavale, ka hinosehose Jeho tamity tombone re. ³⁴ Laha fa nilitre tao amity lampa ty Jeho, le nhina vaho nino re. Naho hoe re:" Henteo amizay ty ampela voaozo naho alevegno re, fa anakampela ty mpanjaka re." ³⁵ Nindeha nandeve aze iereo, kanefa tsy nahisake laha tsy karan-doha, vaho tomboke, naho tagnane ie roe. ³⁶ Ka nihere iereo naho nirehake tamy Jeho. Hoe re:" Zao ty safa Yaveh ze nirehafene tamity alala Elia ty Tisibita mpanompone, manao hoe:' Ao amity tane ao Jezirela ro hihinana reo amboa ty nofo Jezebela, ³⁷ naho ty fate Jezebela le hanahake ty zezeke eo amity velara ty baibo eo amity tane ao Jezirela, mab tsy hisy ndaty afake hirehake hoe:" Jezebela io.""'