¹ Naho Elisa nirehake tamim-drampela rene ty kolo ze vinelone. Hoe re tamine:" Mitsangana, naho mindehana miarake amity fokonao, ka mitoboha na aia aia azonao itoboha agne antane hafa, satria Yaveh le fa nikaike kere ho avy eto amity tane toy zisike ty fito tao." ² Ka le nitsanga rampela naho nagnenke ty reha ty lahilahin'Agnahare. Nindeha niarake tamireo fokone re naho nitoboke tagne amity tane ty Filistina fito tao. ³ Naho fara ty fito tao le nihere bakao amity tane ty Filistina rampela, le nimbaeo amity mpanjaka re mba hangatake ty amity tragnone vaho ty amity tanene. ⁴ Naho ty mpanjaka nirehake tamy Gehazy mpanompo ty lahilahin'Agnahare, nanao ty hoe:" Mba atalilio ahy rie reo zaka bey ze natao Elisa." ⁵ Ka laha nirehake tamity mpanjaka ty fomba nameloma Elisa ty kolo ze le fa mate re, le niavy ty ampela rene ty kolo vinelone mba hangatake amity mpanjaka ty amity tragnone vaho ty tanene. Hoe Gehazy:" Ry mpanjaka, tompoko, toy i ampelay, naho toy ty anadahine, ze vinelo Elisa." ⁶ Laha fa nagnontane andrampela miomba ty anane ty mpanjaka, le hinazavane tamine zay. Ka nandily manam-pahefa raike ho aze ty mpanjaka, nanao hoe:" Aheregno amine iaby ze aze naho ty voka ty baibone iaby zisikamity andro ze niengane ty tane ka zisikamizao." ⁷ Nimbaeo Damaskosy tagne amize nararea Beni-hadada mpanjaka Syria ty Elisa. Rinehake ty mpanjaka hoe:" Niavy eo ty lahilahin'Agnahare." ⁸ Hoe ty mpanjaka tamy Hazaela:" Mindaisa fagnomea egne antagnanao naho mindehana manalaka ty lahilahin'Agnahare, naho magnontanea Yaveh amity alalane, manao hoe:" Ho afake amize arete zao vao raho?"' ⁹ Le nindeha nanalaka aze ty Hazaela naho ninday fagnomea tamity zaka-soa isan-karazane bakao Damaskosy, niente ty rameva efapolo. Le niavy ty Hazaela naho nitsanga teo agnoloa Elisa ka nanao hoe:" Ty ananao lahy Beni-hadada mpanjaka Syria ro nagnirake ahy ho aminao atoy, manao hoe:' Ho afake amize arete zao vao raho?"' ¹⁰ Hoe ty Elisa tamine:" Mindehana, rehafo Beni-hadada hoe:' Ho afake vatane riha', nefa Yaveh le fa nanoro ahy fa ho mate vatane re." ¹¹ Le hiambe i Hazaela mandra-pahamegnatre aze Elisa, le nitagny ty lahilahin'Agnahare. ¹² Nagnontane ty Hazaela hoe:" Nagnino riha ro mitagny, ry tompoko?" Namale re ty hoe:" Satria haiko ty raty ze hataonao amity vahoake Israely. Hagnoro ty fiarova mafe iereo riha, naho hamono ty ajalahy iereo amity meso, handrasarasa ty anake kele iereo riha, naho handriatre ty ampela bevoka ao amiereo." ¹³ Hazaela namale hoe:" Ia moa ty mpanomponao, ro hanao ze zaka bey zay re? Amboa avao re." Namale ty Elisa hoe:" Le fa natoro Yaveh ahy fa ho lasa mpanjaka Syria riha." ¹⁴ Le niala Elisa ty Hazaela naho nimbaeo amity tompone, ty nirehake tamine hoe:" Ino ro nirehafe Elisa taminao?" Namale re hoe:" Nirehake tamiko re fa ho afake vatane riha." ¹⁵ Naho ty hamaray le nangalake bodo-bey ty Hazaela naho nampijo zay tao agnate rano, naho namelatre zay teo amity tarehe Beni-hadada mba ho mate re. Le lasa mpanjaka nisolo ty toerane Hazaela. ¹⁶ Tamity tao fahalime nanjaka JOrama anadahy Ahaba, mpanjaka Israely, le nanomboke nanjaka ty Jehorama. Re le anadahy Josafata mpanjaka Joda. ¹⁷ Jehorama le roe amby telopolo tao ro nanomboke nanjaka, naho nanjaka zisike ty valo tao ta Jorosalema re. ¹⁸ Nindeha tamireo lala ty mpanjaka Israely ty Jehorama, manahake ze natao ty foko Ahaba; satria nana ty anakampela i Ahaba ho valine re, ke nanao ty raty teo amaso Yaveh re. ¹⁹ Na le zay aza, noho ty amy Davida mpanompone, le tsy te-handrava Joda Yaveh, satria nirehake tamine re fa hagnomea aze foko zisikagne. ²⁰ Tamity andro Jehorama, le navande nandietre ty tagna Joda ty Edoma, naho nametrake mpanjaka ho ahy ty vatane iereo. ²¹ Bakeo le nitsake niarake tamireo mpifehene vaho reo Kalese iaby ty Jehorama. Le nitsanga re ty hale ka nanafike naho nagnisy reo Edomita, ze nagnodidy aze vaho reo mpifehe reo Kalese. Le nilay tane antragno iereo ty tafike Jehorama. ²² Ka niarake nandietre ty lily Joda zisikezao ty Edoma. Niarake avao kea Libna tamio anddro o. ²³ Naho ty amireo raraha hafa mikasike i Jehorama, iaby ze nataone, feie tsy le fa voasoratre ao amity boke reo tantara ty mpanjaka Joda vao zay? ²⁴ Mate naho nijano niarake tamireo razane ty Jehorama, naho naleve niarake tamireo razane tao antana Davida. Le Ahazia anadahine ro lasa mpanjaka nisolo ty toerane. ²⁵ Tamity tao faharoe amby folo nanjaka Jorama anadahy Ahaba, mpanjaka Israely, ro nanomboke nanjaka ty Ahazia, anadahy Jehorama, mpanjaka Joda. ²⁶ Roe amby roapolo tao ty Ahazia ro nanomboke nanjaka; nanjaka zisike ty heren-tao ta Jerosalema re. Ty agnaran-drenene le Atalia; re le anakampela Omry, mpanjaka Israely. ²⁷ Naho nindeha tamireo lala ty foko Ahaba ty Ahazia; nanao ze raty teo amaso Yaveh re, manahake ze natao ty foko Ahaba, satria Ahaza le vinanto lahy tamity foko Ahaba. ²⁸ Nindeha niarake tamy Jorama anadahy Ahaba ty Ahazia, mba hialy amy Hazaela, mpanjaka Syria, ao Ramota-gileada. Namere Jorama reo Syriana. ²⁹ Nihere ty Jorama mpanjaka mba hotsaboe agne Jezirela amireo fere ze natao reo Syrina tamine tao Rama, laha fa nialy tamy Hazaela mpanjaka re. Naho Ahazia anadahy Jehorama, mpanjaka Joda, nizotro ho agne Jezirela mba hagnente i Jorama anadahy Ahaba, satria nafere ty Jorama.