¹ Hoe Elisa hoe:" Dranjigno ty safa Yaveh". Zao ro safa Yaveh:' Hamaray amity lera hoe zao le ho sekele raike ty vily ty koba soa lisa era ty fagnarana, naho ho sekele raike ty vare hordea roe fagnarana, eo ambavahady Samaria."' ² Naho namale ty lahilahin'Agnahare ty bey ty mpiambe raike ze nagnankina ty mpanjaka ty tagnane, naho nanao ty hoe:" Ingo, na le hanao varavarakele egne amity lagnitre aza Yaveh, hisy vao ze zaka zay?" Naho namale Elisa hoe:" Ingo, hahisake ty atao zay reo masonareo, kanefa tsy hihina amizay nareo." ³ Naho nisy efa-dahy boka teo ambaly ty vavahady ty tana. Nifampirehake iereo hoe:" Nagnino tika ro tokone mijano eto mandram-pifatezantika? Laha hirehake tika hoe tokone hilitre ao amity tana tika, kanefa misy kere ao antana, le ho mate agne tika. ⁴ Nefa laha hijano eto tika le mboe ho mate avao kea. Ka andao, andao tika ho agne amity tafike reo Syriana. Laha tsy mamono antika iereo, le ho velo tika, fa laha mamono antika iereo, le ho mate tika. ⁵ Ka nindeha iereo ty takariva mba hombaeo amity tobe ty Syriana; laha fa niavy tegne amity faritre ambaly ty tobe iereo, le tsy nisy ndaty tao. ⁶ Fa le fa nampahareize ty tompo ty feo reo Kelese, vaho ty feo reo Saovale__ty feo reo tafike bey hafa, ty tafike ty Syriana, naho nifampirehake iereo hoe:" Ty mpanjaka Israely le fa nagnarama reo mpanjaka reo Hetita vaho reo Egyptiana mba ho avy handietre antika. ⁷ Le nindeha vaho nilay reo miaramila ty takariva; nenga iereo ty tragnone, reo soavalene, reo ampondrane, naho hoe zay kea ty tobe, naho nilay ho ahy ty arofone iereo. ⁸ Laha fa niavy teo amity faritre ambaly ty tobe reo lahilahy boka reo, le nilitre tao agnate ty tragno raike iereo ka nihina vaho nino, naho nangalake volafoty vaho volamena naho akanjo, le nindeha ka nagnaja reo. Nihere iereo naho nilitre tao amity tragno hafa le nanimba ty tao avao kea iereo, naho nindeha ka nagnaja zay. ⁹ Bakeo le nifampirehake iereo hoe:" Tsy manao ty mare tika. Andro ty filazantsoa zao andro zao, nefa mita filamina miomba zay tika. Laha mandy zisike ty azava ty andro tika, le hisy fagnaliloa hahazo antika. Amizao are, andao ao tika hindeha naho hitalily ty foko ty mpanjaka." ¹⁰ Nindeha iereo ka nikaike reo mpiambe vavahady tao antana. Hoe reo tamiereo:" Nimbaeo amity tobe reo Syriana zahay, nefa tsy nisy ndaty tao, tsy nisy feogn'ondaty, fa reo soavale vaho ampondra mifehe ro ao, naho reo tragno ze nitobohane." ¹¹ Le nikorake mafe reo vaovao ty mpiambe vavahady, bakeo le natalily tao amity foko ty mpanjaka zay. ¹² Naho nifoha ty mpanjaka ty hale naho nitalily tamireo mpanompone hoe:" Amizao le ataliliko anareo ty natao reo Syriana tamintika. Hay iereo fa kere tika, ka niala ty tobe iereo mba hihaja agne ambaibo. Hoe iereo:" Laha fa miakatre ty tana iereo, le hataontika sambo-belo, ka hilirantika ty tana."' ¹³ Namale ty raike tamireo mpanompo ty mpanjaka vaho nanao ty hoe:" Mangatake aminao raho, engao hangalake dime amireo soavale sisa reo lahilahy, le ze sisa tao antana zay. Iereo le manahake ty sisa reo vahoake Israely iaby ze tavela_fa le fa mate ty ankamaroane amizao; ao tika handefa iereo ka hahisake." ¹⁴ Ka nangalake kalese roe niarake tamity soavale iereo, ka nirahe ty mpanjaka hagnorike reo tafike reo Syriana iereo, nanao ty hoe:" Mindehana naho henteo." ¹⁵ Nindeha nagnorike iereo zisikagne Jordana iereo, ka feno siky vaho zaka ze naria Syriana tamim-pikoropaha ty lala iaby. Le nihere ty mpinday talily naho nirehake tamity mpanjaka. ¹⁶ Nilay reo vahoake vaho nandrava ty tobe reo Syriana. Ka navily ho sekele raike ty koba soa lisa era ty fagnarana, naho vare hordea roe fagnarana le sekele raike, arake ty le fa voatalily ty safa Yaveh. ¹⁷ Nibaikoe ty mpanjaka ty bey ty mpiambe ze marine aze mba hiambe ty vavahady, naho voalialia reo vahoake teo, ambavahady re. Naho mate re manahake ty le fa voatalily ty lahilahin'Agnahare, ty nirehake nizotro teo amine ty mpanjaka. ¹⁸ Ka niseho zay arake ty le fa nirehafe ty lahilahin'Agnahare tamity mpanjaka hoe:" Amize andro zao eo ambavahady Samaria, le azo vilie ho sekele raike ty vare hordea roe fagnarana, naho ty koba soa lisa raike fagnarana le ho sekele raike." ¹⁹ Namale ty lahilahin'Agnahare ze bey ty mpiambe zay vaho nanao ty hoe:" Ingo, na le hanao varavarakele egne andagnitre aza Yaveh, hisy vao ze zaka zay? Le fa nirehake Elisa hoe:" Ingo, hahisake ty atao zay amity masonareo nareo, kanefa tsy hihina amizay nareo. ²⁰ Hoe zay vatane ro niseho tamine, satria voalialia ty vahoake teo ambavahady re, naho mate.