¹ Reo ana ty mpaminane nirehake tamy Elisa ty hoe:" Ty toera ze hitobohanay miarake aminao le tena kele loatre ho anay iaby. ² Engao rie zahay hindeha ho agne Jordana, naho engao ty ndaty iaby mba hanampake hetae agne, naho engao zahay hagnore toera hitobohanay agne." Namale Elisa ty hoe:" Afake mindeha nareo." ³ Ty raike tamiereo nirehake ty hoe:" Mindehana rie miarake amireo mpanomponao." Naho namale Elisa ty hoe:" Hindeha raho." ⁴ Ka nindeha niarake tamiereo re, naho laha fa niavy tagne Jordana iereo, le nanomboke nanampake hetae. ⁵ Fa laha teo ampanampaha ty raike, le nipoke tao agnate rano ty lela-pamaky; nikorake mafe re naho nanao ty hoe:" Loza, ry tompoko, nindrame igne!" ⁶ Ka hoe ty lahilahin'Agnahare ty hoe:" Taia ro nipohane?" Le natoro ty ndaty Elisa ty toera. Le nanampake tapa-ketae re, naho nanorake zay tao agnate rano, ka nampihafo ty vy. ⁷ Hoe ty Elisa hoe:" Alao io." Ka namototre ty tagnane ty ndaty naho nangalake zay. ⁸ Naho nialy tamy Israely ty mpanjaka Syria. Nirehake tamity mpanompone ra, nanao ty hoe:" Agne amity toera hoe zao vaho hoe zao ro hitobeako." ⁹ Ka ty lahilahin'Agnahare ze nalefa tagne amity mpanjaka Israely, nanao ty hoe:" Miambena tsy handrio amize toera zay, fa hizotro agne reo Syriana." ¹⁰ Nandefa tatily tagne amity toera ze voalaza vaho nampiambena ty lahilahin'Agnahare aze ty mpanjaka Israely. Tsy indraike na indroe avao, laha fa nindeha tagne ty mpanjaka, le mahiratre re. ¹¹ Meloke mafe tamireo fampiambena ty mpanjaka Syria, ka nikaike reo mpanompone re naho nanao tamiereo ty hoe:" Tsy hirehake amiko vao nareo hoe ia eo aminareo ro tea ty mpanjaka Israely?" ¹² Ka hoe ty raike tamireo mpanompone hoe:"Aha, ry mpanjaka, tompoko, fa i Elisa mpaminane ao Israely ro mitalily amity mpanjaka Israely reo rehake ze rehafenao ao amity efetragno firoroanao!" ¹³ Naho namale ty mpanjaka hoe:" Mindehana naho paio ty misy i Elisa mba handefasako ndaty hitsepake aze." Nirehafene tamine hoe:" Ingo, agne Dotana re." ¹⁴ Ka nandefa soavale maro, kalese, naho tafike bey tagne Dotana ty mpanjaka. Tamity haleke re ro niavy naho nagnodidy ty tana. ¹⁵ Laha fa nifoha maray ka niakatre tagne ambalike ty mpanompo ty lahilahin'Agnahare, le ingo, ty tafike bey mitiki-tsoavale vaho kalese nagnodidy ty tana. Hoe ty mpanompo tamine hoe:" O, ry tompoko! Ino ro ho ataontika?" ¹⁶ Elisa namale hoe:"Ko matahotre, fa reo ze miarake amintika le mboe maro kea tane reo ze miarake amiereo." ¹⁷ Nivavake Elisa naho nanao ty hoe:" Ry Yaveh, mangatake aminao ty mba hanokafanao ty masone mba hahisake raho." Naho nisokafe Yaveh ty maso ty mpanompo, ka nahisake re. Ingo, ty vohitse le feno soavale vaho kalese afo nagnodidy Elisa naho nanao ty hoe:" Mangatake aminao raho, anovo goa reo ndaty reo." Ka nigoane iereo, arake ty nangatahe Elisa. ¹⁹ Naho hoe ty Elisa tamireo Syriana hoe:" Tsy io ro lala, na ty tana. Oriho raho, fa ho enteko agne amity ndaty ze paienareo nareo." Bakeo le nitarihene ho agne Samaria iereo. ²⁰ Naho laha fa niavy tagne Samaria iereo, le hoe Elisa ty hoe:" Ry Yaveh, sokafo ty maso reo ndaty reo mba hahisaha iereo." Le nisokafe Yaveh ty maso iereo ka nahisake iereo, naho ingo, teo agnivo ty tana i Samaria iereo. ²¹ Hoe ty mpanjaka Israely tamy Elisa, laha fa nahisake iereo re:" Ry raeko, tokone hovonoeko vao iereo? Tokone hovonoeko vao iereo?" ²² Elisa namale ty hoe:" Ao tsy hamono iereo riha. Hovonoenao vao reo ze nibaboenao tamity meso vaho ty folese? Mametraha mofo vaho rano eo agnoloa iereo, mba hihina vaho hino iereo, naho mindehana agne amity tompo iereo." ²³ Ka nagnoma sakafo maro ho ahy iereo ty mpanjaka, naho laha fa nihina vaho nino iereo, le nalefane, ka nihere tagne amity tompone. Tsy nihere tagne amity tane Israely zisike ty andro maro reo tarike ty miaramila Syriana. ²⁴ Andro kele tafarazay le namory ty tafine ty Beni-hadada naho nanafike i Samaria vaho nanao faherano aze. ²⁵ Ka nisy kere bey tagne Samaria. Ingo, nanao faherano iereo mandram-pahalafo ho sekele volafoty valompolo ty lohan'ampondra raike, naho ty taim-boromahilala ampahaefa ty kaba ho sekele volafoty dime. ²⁶ Laha nandrio teo amity manda ty mpanjaka Israely, le nisy ampela nikorake tamine, nanao ty hoe:" Vonjeo, ry mpanjaka, tompoko." ²⁷ Hoe re:" Laha tsy magnampe anao Yaveh, ino ro hahafahako magnampe anao? Misy raraha vao bakamity famoloa vaho ty fameaham-boaloboke?" ²⁸ Le nanohy ty mpanjaka hoe:" Ino ro hasahiranao?" Ka namale re hoe:" Hoe ty ampela toy tamiko:' Ameo ty ananao mba hihinanantika aze androany, naho hihina ty anako tika hamaray." ²⁹ Ka nampandevenay ty anako naho nihanenay, naho nitalily tamine raho ty andro magnarake hoe:" Ameo ty ananao mba hihinanantika aze, kanefa le fa nahajane ty anane." ³⁰ Naho laha fa naharey reo rehan-drampela ty mpanjaka, le nandriatre ty akanjone re( naho nandrio teo amity manda re), ka nagnente naho nahisake fa nana aten'akanjo lamba fandala re, tegne ankoline. ³¹ Naho hoe re ty hoe:" Ao anie Zagnahare hanao zay amiko, mihoatre noho zay aza, laha mitoboke ao amine ty loha Elisa ana i Safata amizao." ³² Fa Elisa nitoboke tao antragnone, naho reo olobey niara-nitoboke tamine. Nandefa ndaty raike bakeo agnoloane ty mpanjaka, nefa laha fa niavy tagne amy Elisa ty mpinday talily, le hoe re tamireo olobey hoe:" Ingo, akore ty fomba nandefasa ty anaka mpamono ndaty toy ndaty handily ty lohako? Ingo, laha fa avy ty mpinday talily, le hilio ty varavara, naho tano hihily mba tsy hilirane ty varavara. Feie vao tsy feo ty tombo ty tompone ze afarao zay? ³³ Laha mboe nanohy nirehake tamiereo re, le ingo, nizotro teo amine ty mpinday talily. Hoe ty mpanjaka hoe:" Ingo, bakamy Yaveh ze loza zao. Nagnino raho ro tokone mboe handy Yaveh avao?"