¹ Naho nana foko fitompolo tagne Samaria ty Ahaba. Nanoratre taratasy ty Jeho ka nandefa zay tagne Samaria, ho ahy reo mpandily Jezirela, tao agnate zay reo olobey vaho reo mpiambe ty foko Ahaba, nanao ty hoe: ² "Eo aminareo reo foko ty tomponareo, naho mana kalese vaho soavale naho tana voaaro vaho akanjo fiaro avao kea nareo. Laha zao, laha vaho avy eo aminareo ty taratasy toy, ³ le filio ze soa vaho mete vatane amireo foko ty tomponareo ka atoboho ho eo amity sezan-droandriane re, naho mialia ho ahy ty foko ty mpanjaka tomponao." ⁴ Fa natahotre iereo ka nifampitalily hoe:" Ingo, mpanjaka roe aza tsy naharetre teo agnoloa Jeho. Ka ino moa ro hijanognantika?" ⁵ Bakeo ty lahilahy ze mita ty lampa, vaho ty lahilahy nandily ty tana, vaho reo olobey avao kea, naho reo ze niteza reo kolo, le nandefa talily nihere tagne amy Jeho, nanao hoe:" Manomponao zahay. Hataonay ze iaby handilianao anay, tsy hametrake ndaty ho mpanjaka zahay. Anovo ze hainao fa mete eo amasonao." ⁶ Naho nanoratre taratasy fagnindroene ho ahy iereo ty Jeho, nanao ty hoe:" Laha miandany amiko nareo, naho laha midranjy ty feoko nareo , le tsy maintsy tampahenareo ty loha reo lahilahy foko ty tomponareo, naho mindeha amiko atoy Jezirela hamaray amity lera hoe zao." Amizao reo foko ty mpanjaka, misake fitompolo, le niarake tamireo lahilahy manan-danja teo antana, ze niteza iereo. ⁷ Ka laha fa niavy teo amiereo ty taratasy, le nalaene reo anadahy ty mpanjaka ka vinonone, ndaty fitompolo, nataone tao agnate vaha ty loha iereo, naho nalefane tagne amy Jeho tagne Jezirela reo. ⁸ Nisy mpinday talily niavy teo amy Jeho, nanao hoe:" Le fa ninday ty loha reo anadahy ty mpanjaka iereo." Ka hoe re:" Anovo atnon-jaka roe ho eo amity vavahady filira iereo zisike maray." ⁹ Ty maray ty Jeho le niakatre ka nitsanga, naho nirehake tamity vahoake iaby hoe:" Tsy manan-tsiny nareo. Ingo, niarake tamity tompoko raho ka namono aze, fa ia ro namono toa iaby toa? ¹⁰ Amizao le tokone ho tsapanareo vatane fa tsy nisy tamity safa Yaveh, ty nirehake ze nirehafene mikasike ty foko Ahaba, hirarake amity tane, satria Yaveh ro nanao arake ze nirehafene tamity alala Elia mpanompone." ¹¹ Ka vinono Jeho ze sisa tavela tamity foko Ahaba tagne Jezirela, vaho reo lahilahy manan-danjane, reo namane vatane, reo mpisorone, mandram-pilania ty foko iereo. ¹² Bakeo le nitsanga ty Jeho ka lasa nimbaeo Samaria re. Naho laha vaho niavy tao Bet-ekeda ty mpiarake agnondry re, ¹³ le nifanoje tamireo rahalahy Ahazia mpanjaka Joda. Hoe ty Jeho tamiereo hoe:" Ia nareo?" Namale iereo hoe:" Rahalahy Ahazia zahay, naho hizotro mba hanalama reo ana ty mpanjaka vaho reo ana i Jezebela Mpanjaka vave zahay." ¹⁴ Hoe ty Jeho tamireo lahilahine:" Anovo sambo-belo iereo." Ka natao iereo sambo-belo iereo naho vinonone tagne amity lavake famorian-drano Bet-ekda, reo roe amby efapolo lahy. Tsy nisy niengane ho velo iereo. ¹⁵ Laha fa niala teo Jeho, le nifanoje tamy Jonadaba anadahy Rekaba naho namonje ze. Nanalama aze ty Jeho ka nanao tamine hoe:" Miarake amiko vao ty arofonao, manahake ty arofoko Ze miarake amity anao?" Namale ty Jonadaba hoe:" Zay vatane." Hoe ty Jeho:" Laha zay vatane ro ie, le atoloro aze ty tagnanao." Ka natolo Jonadaba aze ty tagnane, naho nonjone Jeho niarake tamine teo amity kalesene ty Jonadaba. ¹⁶ Hoe ty Jeho" Miaraha amiko ka henteo ty zotom-poko ho ahy Yaveh." Ka niara-nindeha tamine tao amity kalesene ty Jonadaba. ¹⁷ Laha niavy tagne Samaria re, le vinono Jeho iaby ty foko Ahaba ze sisa tavela tagne Samaria, mandram-pandravane ty foko Ahaba mpanjaka, arake ze le fa nirehafe tamiereo taloha tamity alala ty safa Yaveh, ze nirehafene tamy Elia. ¹⁸ Naho namory ty ndaty iaby niarake ty Jeho ka nirehake tamiereo hoe:" Ahaba le nanompo i Bala kelekele avao, fa i Jeho kea hanompo aze mafe. ¹⁹ Amizao naho kaiho ho amiko eto iaby reo mpaminane Bala iaby, vaho reo mpanompo aze iaby, naho reo mpisorone iaby. Ao tsy hisy tavela, satria mana fagnatetre bey hatolotre ho ahy Bala raho. Iaby ze tsy avy le tsy ho velo." Fa natao Jeho zay mba ho fitake, tamity fikasane hamono reo mpanompo Bala. ²⁰ Hoe ty Jeho:" Manokana andro raike mba hanova fivoria ho ahy Bala." Ka natalily iereo zay. ²¹ Naho nagnirake magnere Israely iaby vaho reo mpanompo i Bala iaby ty Jeho, mba tsy hisy ndaty tavela ka tsy avy. Niavy tao amity tempoly Bala iereo, naho feno na zisikaia aia. ²² Nitalily tamity lahilahy mpamory ty akanjo ty mpisoro ty Jeho hoe:" Magnakara akanjo ho ahy reo mpisoro Bala iaby." Ka nagnakatre akanjo ho ahy iereo ty lahilahy. ²³ Naho lasa niarake tamy Jonadaba anadahy Rekaba ho ao antragno Bala ty Jeho, naho hoe re tamireo mpanompo Bala:" Henteo, naho anovo azo antoke fa tsy hisy bakamity mpanompo Yaveh ty raike aminareo eto, fa mpanompo Bala avao." ²⁴ Le nindeha nanolotre soro vaho fagnatetre oroa iereo. Naho nifily lahilahy valompolo hitsanga eo ambaly Jeho, naho hoe re tamiereo:" Laha misy tafilay amireo lahilahy ze enteko eo antananareo, na ia ia mamototre ze ndaty zay hilay, le ho afaha amine ty fiaine ho solo ty laine." ²⁵ Naho vatane vaho vita Jeho ty fanolora ty fagnatetre oroa, le hoe re tamity mpiambe vaho reo kapitene:" Milira ka vono iereo. Ko enga hisy ho tafiakatre." ²⁶ Ka vinono iereo tamity lela-meso reo, naho ty mpiambe vaho reo kapitene nanorake iereo tagne ambalike naho nilitre tao agnefetre agnate ty tragno Bala. Tinary iereo niakatre ty ambem-bato tao antragno Bala, naho noroa iereo zay. ²⁷ Bakeo le narotra iereo ty ambe i Bala, ka rinavane ty tragno Bala naho nataone tragno fivegna, naho zisikamizao zay. ²⁸ Hoe zay ro nandrava Jeho ty fanompoa Bala tagne Israely. ²⁹ Kanefa tsy niala reo hadisoa Jeroboama anadahy Nebata ty Jeho, ze nampagnontane ty Israely_ty fanompoa ty agnombe-lahy kele volamena tagne Betela vaho Dana. ³⁰ Ka hoe Yaveh tamy Jeho hoe:" Satria riha nanao ze soa tamity fanaova ze mare teo amasoko, naho nanao ty foko Ahaba arake iaby ze tato ampoko, reo fokonao le hitoboke eo amity sezan-droandria Israely zisikamity foko fahaefatre." ³¹ Fa tsy niraharaha ze hindeha amity lala Yaveh, ty Zagnahare Israely, tamity arofone iaby ty Jeho. Tsy niala tamity hadisoa Jeroboama re, ze nampanontae ty Israely. ³² Tamireo andro reo Yaveh ro nanomboke namefe ty faritre Israely, naho Hazaela naharese reo Israelita tegne amity sisin-tane ty Israely, ³³ zisikagne Jordana ro mianignana, ty tane Gileada iaby, ty Gadita, naho ty Robenita, vaho ty Manasita, bakagne Aroera, ze bakeo amity baibo Arnona, zisikagne Gileada ka hatragne Basana. ³⁴ Laha ty amireo raraha hafa mikasike Jeho, vaho iaby ze nataone, vaho fahefane iaby, feie tsy le fa voasoratre ao amity boke ty tantara ty mpanjaka Israely vao zay? ³⁵ Nimate niarake tamireo razambeine ty Jeho, naho naleve iereo tagne Samaria re. Naho Joahaza anadahine ro lasa mpanjaka nisolo aze. ³⁶ Valo amby roapolo tao ty fotoa nanjaka Jeho teo amy Israely tagne Samaria.