¹ Tamity tao faharoe amby folo nanjaka Ahaza mpanjaka Joda, ro nanomboke ty fanjaka Hosea ana i ELaha. Nanjaka tao Samaria nagnera ty Israely zisike ty sive tao re. ² Nanao ze raty teo amaso Yaveh re, tsy nanahake reo mpanjaka Israely ze taloha. ³ Nanafike aze ty Salmanesera mpanjaka Asyria, ka lasa mpanompone ty Hosea naho ninday fagnomean-kasy ho aze. ⁴ Naho hisa ty mpanjaka Asyria fa nidineke handietre aze ty Hosea, satria nandefa mpinday talily nimbaeo amy So mpanjaka Egypta ty Hosea; naho kea, tsy mba nanolotre fagnomean-kasy ho ahy ty mpanjaka Asyria re, manahake ty nataone isan-tao isan-tao. Ka hinily ty mpanjaka Asyria re naho finehene tagne am-ponja. ⁵ Bakeo le nanafike nagnera ty tane iaby ty mpanjaka Asyria, naho nanafike i Samaria vaho nanao faherano zay zisike ty telo tao. ⁶ Tamity tao fahasive naha-mpanjaka i Hosea, le nangalake Samaria vaho ninday ty Israely lavitre Asyria ty mpanjaka Asyria. Nanao iereo tagne Hala re, tao amity Habora rano i Gozana, naho tagne amity tana ty Mediana. ⁷ Niseho ze fahazoa zay satria nanonta tamy Yaveh Zagnahare iereo ty vahoake Israely, ze ninday iereo niakatre bakagne amity tane Egypta, bakeo ambane fifehea Farao mpanjaka Egypta. Le fa nanompo zagnahare-hafa reo vahoake ⁸ ka nindeha tamity fatao reo firene ze le fa rinava Yaveh teo agnoloa reo ana Israely, vaho tamity fatao reo mpanjaka Israely ze le fa natao iereo. ⁹ Ty ana Israely__le nanao reo zaka ze tsy mare ambalike__handietre Yaveh Zagnahare iereo. Nagnore fitoera agnabo ho aze magnera reo tanane iereo, zisikagne amity tilikambo fiambena ka hatragne amity manda fiarova. ¹⁰ Nagnore tsangam-bato vaho baon-Aseraha tegne amity tazoa agnabo iaby vaho tagne ambane ty hetae maintso iaby avao kea iereo. ¹¹ Tegne iereo ro nagnoro liten-ketae magnitre tamireo fitoera agnabo iaby, manahake ty natao reo firene, reo ze niente Yaveh teo agnoloa iereo. Nanao zaka-raty reo Israelita mba hahavy Yaveh ho meloke; ¹² iereo le nanompo sampe, miomba ze le fa nisafagne Yaveh iereo hoe:" Tsy hanao zay zaka zay nareo." ¹³ Nefa Yaveh le fa nagnambara tamy Israely vaho tamy Joda tamity alala ty mpaminane kirai-kiraike vaho ty mpahisake kirai-kiraike, nanao hoe:" Miala amireo fomba ratinareo ka ambeno reo liliko vaho reo lalako, naho mimetea hagnorike ty lala iaby nandiliako reo razanareo, naho ze niraheko ho aminareo tamity alala reo mpaminane mpanompoko. ¹⁴ Kanefa tsy nidranjy iereo; fa kea mafe loha vatane manahake reo razane ze tsy natoky Yaveh Zagnahare iereo. ¹⁵ Niliere iereo ty lalane vaho ty fagnenkeam-pilongoa ze nataone tamireo razane, naho reo lily fagnenkea ze nameane iereo. Nagnorike fomba tsy nisy ipaia aze iereo naho ty vata iereo vatane ro lasa tsy nisy antone. Nagnorike reo firene mpanompo sampe ze nagnodidy aze iereo, le reo ze nandilia Yaveh iereo tsy ho tahafe. ¹⁶ Iereo le nanao tsinontsino reo lily iaby Yaveh Zagnahare iereo. Nagnamboatre saren-anakagnombe roe vita tamity vy iereo mba ho tompoe. Namboatre baon'Aseraha iereo, naho nanompo Bala vaho reo kinta iaby tegne andagnitre. ¹⁷ Nalefa iereo tagnate afo reo anadahy vaho anakampela iereo, nampiasa reo sikily vaho fagnosavia, nivarotre ty vata iereo mba hanao ze raty teo amaso Yaveh, vaho nahavy aze ho meloke. ¹⁸ Laha zao le meloke mafe tamy Israely Yaveh ka nagnafake iereo tsy ho amasone eo. Tsy nisy na raike aza tafijano laha tsy ty foko Joda arere avao. ¹⁹ Na le Joda aza tsy nahata ty lily Yaveh Zagnahare iereo, fa kea nagnorike fanompoan-tsampe nitovy tamizay norihe Israely. ²⁰ Laha zao le niliere Yaveh iaby reo foko Israely iaby; nampijalene iereo naho natolone tegne antagna reo ze mpangalake ty fanagna iereo, mpan-drapirava iereo tsy ho amasone eo. ²¹ Nagnafake ty Israely tamity fitohiam-poko Davida Re, naho nametrake Jeroboama anadahy Nebata mpanjaka. Nitarike ty Israely hiala tamity fagnoriha Yaveh ty Jeroboama naho nampanao hadisoa foloay iereo. ²² Nagnorike ty hadisoa Jeroboama iaby ty ana i Israely naho tsy niala tamirey iereo, ²³ ka nafaha Yaveh teo amaso Israely, arake ty nirehafene tamireo mpaminane mpanompone iaby fa hataone. Le nientene lavitre ambaly ty tane iereo tagne Asyria ty Israely, naho mboe agne avao zisike zao. ²⁴ Ninday vahoake bakagne Babylona vaho bakagne Kota, vaho bakagne Ava, vaho bakagne Hamata vaho Sefarivaima ty mpanjaka Asyria, ka nametrake iereo tagne amity tana Samaria teo amity toera ty ana Israely. Le nahazo i Samaria rey ka nitoboke teo amity tanane. ²⁵ Naho tamity voaloha ty fitoboha iereo tagne le tsy nagnomea hasy Yaveh iereo. Ka nandefa liona tamiereo ze namono ty ilane tamiereo Yaveh. ²⁶ Le nirehake tamity mpanjaka Asyria iereo, nanao hoe:" Reo firene ze baka nientenao vaho natobonao tato amity tana Samaria le tsy mahay reo fomba paie ty zagnahare ty tane. Ka nandefa liona teo amiereo re, naho, ingo, mamono ty ndaty reo liona satria tsy mahay reo fomba paie ty zagnahare ty tane iereo." ²⁷ Naho ty mpanjaka Asyria nibaiko, nanao hoe:" Alao ty raike amireo mpisoro ze nientenareo bakagne, ka ao re hindeha vaho hitoboke agne, naho ao re hagnanatre iereo ty fomba ze paie ty zagnahare ty tane." ²⁸ Ka niavy nitoboke tagne Betela ty raike tamireo mpisoro ze baka niente iereo bakagne Samaria; nagnanatre iereo ty fomba tokone hiantsa iereo Yaveh re. ²⁹ Nanao zagnahare ho aze iaby reo foko kirai-kiraike, ka nametrake iereo tegne amity fitoera agnabo ze natao reo Samaritana__ty foko kirai-kiraike tagne amity tana nitobohane iaby. ³⁰ Ty vahoake Babylona nagnamboatre i Sokota-benota; ty vahoake Kota nagnamboatre i Nergala; ty vahoake Hamata nagnamboatre i Asima; ³¹ reo Avita nagnamboatre i Nibaza vaho Tartaka. Reo Sefarvita nagnoro reo anane tao amity afo ho ahy Adrameleka vaho Anameleka, zagnahare ty Sefarvaima. ³² Nagnomea hasy Yaveh avao kea iereo, ka nanendre mpisoro reo fitoboha agnabo bakamireo, ze nanao soro ho ahy reo tao amity tempoly tao amireo toera agnabo. ³³ Nagnomea hasy Yaveh iereo vaho nanompo reo zagnahare iereo, tamity fomba fatao reo firene tamize le fa niente iereo. ³⁴ Hatramize andro zao le mivasa amireo fomba fatao iereo taloha iereo. Vaho tsy magnomea hasy Yaveh iereo, ro tsy magnorike reo lily aman-dala ze natolo Yaveh tamity vahoake Jakoba__ze nataone ty hoe: Israely__ ³⁵ naho tamize nanova Yaveh fagnenkea vaho nandiliane iereo hoe:" Tsy hatahotre zagnahare hafa nareo, na hihohoke amizao, na hanompo irey, na hanao fiaolo ho ahy rey. ³⁶ Nefa Yaveh, ze ninday anareo niakatre bakagne amity tane Egypta tamity here foloay vaho tagna niakatre, ro raike ze tsy maintsy ameanareo hasy; Re ro hihohofanareo, naho ho aze ty soro ataonareo. ³⁷ Reo lily aman-dala ze sinorane ho anareo, ho tana nareo zisikagne rey. Laha zao ko matahotre zagnahare hafa nareo, ³⁸ naho ty fagnenkeam-pilongoa ze le fa nataoko taminareo, le tsy ho halignoenareo; na nareo hagnomea hasy zagnahare hafa. ³⁹ Fa Yaveh Zagnaharenareo ro hameanareo hasy. Re ro hamonje anareo amity here reo fahavalonareo." ⁴⁰ Tsy nidranjy iereo, satria nanohy nanao ze natao iereo tagne amity lasa iereo. ⁴¹ Ka le natahotre Yaveh reo firene naho nanompo reo saren-jaka voasokiereo avao kea iereo, naho nanao hoe zay avao kea reo ana iereo__manahake ze natao ty foko ty ana iereo. Manohy manao ze natao reo razane zisikagne iereo, zisikezao.