¹ Tamity fahafito amby folo nanjaka i Peka ana i Remalia, ro nanomboke nanjaka ty Ahaza ana i Jotama mpanjaka Joda. ² Roapolo tao ty Ahaza ro nanomboke nanjaka, nanjaka zisike ty fito amby folo tao ta Jerosalema re. Tsy nanao ze mare teo amaso Yaveh Zagnaharene, hoe ty natao Davida razambeine re. ³ Fa kea, nagnorike ty lala reo mpanjaka Israely re; nataone tao agnate afo ho fagnatetre oroa ty anane lahy, ho fagnoriha reo fagnanara raty reo firene, ze le fa rinoa Yaveh teo agnoloa ty vahoake Israely. ⁴ Nanolotre fagnatetre re vaho nagnoro liten-ketae magnitre tagne amireo toera agnabo, tegne amireo tazoa, naho tegne ambane ty hetae maintso iaby. ⁵ Naho Rezina, mpanjaka Syria vaho Peka ana Remalia, mpanjaka Israely le niakatre mba hanafike i Jerosalema. Nanao faherano i Ahaza iereo, nefa tsy naharese aze iereo. ⁶ Tamize andro zay, ty Rezina mpanjaka Syria le nimpoly nangalake Elota ho ahy Syria naho nandroake reo ndaty Joda hiala i Elota. Bakeo le nimbaeo Elota reo Syriana agne amize le fa nitoboha iereo zisike androany. ⁷ Ka nandefa mpinday talily ho agne amy Tiglato-pilesera mpanjaka Asyria ty Ahaza, manao hoe:" Mpanomponao raho vaho ananao." Mitsangana naho vonjeo eo amity tagna ty mpanjaka Syria vaho ty tagna ty mpanjaka Israely, ze le fa nanafike ahy raho." ⁸ Le nalae Ahaza ty volafoty vaho ty volamena ze hisane tao antragno Yaveh vaho teo amireo harea ty lampa ty mpanjaka naho nalefane ho fomea ho ahy ty mpanjaka Asyria. ⁹ Le nidranjy aze ty mpanjaka Asyria, naho niakatre nandietre i Damaskosy ty mpanjaka Asyria, naharese zay vaho nangalake reo vahoake ho gadra ho ahy Kira. Vinonone avao kea ty Rezina mpanjaka Syria. ¹⁰ Nindeha tagne Damaskosy ty Ahaza mpanjaka mba hifankahisake amy Tiglato-pilesera mpanjaka Asyria. Nahisake alitara raike tao Damasoksy re. Nandefa ty modele vaho ty sare ty alitara naho ty toerane ty asa paie iaby tagne amy Oria mpisoro re. ¹¹ Oria mpisoro le nagnamboatre alitara mitovy amireo voatre le fa nalefa i Ahaza mpanjaka bakagne Damaskosy. Vinitane taloha ty nimpolia Ahaza mpanjaka bakagne Damaskosy ty mpanjaka le nahisake alitara; namonje ty alitara ty mpanjaka vaho nanese fagnatetre amizay eo . ¹³ Nanao fagnatetre oroa vaho fagnatetre vare re, naho nagnily ty fagnatene finome vaho namitse ty lio bakamity fagnatem-pilongoa ze teo agnoloa Yaveh__le nalaene teo agnoloa ty tempoly, bakeo agnivo ty alitarane vaho ty tempoly Yaveh naho nataone teo amity faritre avara ty alitara zay. ¹⁵ Bakeo le nandily Oria mpisoro Ahaza mpanjaka nanao hoe:" Eo ambone ty alitara bey ro hagnoroa ty fagnatetre oroa ty maray naho ty hariva le ty fagnatetre vare, naho reo fagnatetre oroa ty mpanjaka vaho fagnatetre vare, miarake amireo fagnatetre oroa ty vahoake ty tane iaby, vaho reo fagnatetre vare naho reo ambone zay ty lio iaby bakamity fagnatetre oroa, naho ty lio iaby bakamity soro. Fa ty alitara varahy le ho ahy mba ho fangala dineke." ¹⁶ Le nanao arake ze nandilia Ahaza mpanjaka aze ty Oria mpisoro. ¹⁷ Bakeo le nafaha Ahaza mpanjaka teo amity tsangana ketae afindra reo takelake vaho reo koveta; nazotrone avao kea ty koveta teo amity agnombe varahy ze teo ambane zay naho natoboke teo amity lampim-bato zay. ¹⁸ Noho ty mpanjaka Asyria, le nalane reo fanakofa ho ahy ty Sabata ze le fa namboare iereo tao antempoly, amity filira ty mpanjaka teo ambaly ty tempoly Yaveh. ¹⁹ Laha ty raraha hafa mikasike i Ahaza vaho iaby ze nataone, feie tsy le fa voasoratre ao agnate ty boke ty tantara reo mpanjaka Joda vao zay? ²⁰ Nimate vaho naleve tao antana Davida ty Ahaza. Lasa mpanjaka nisolo aze ty Hezekia anadahine.