¹ Tamity tao fahafito amby roapolo nanjakaaa Jeroboama mpanjaka Israely, ro nanomboke nanjaka ty Azaria ana i Amazia mpanjaka Joda. ² Ene amby folo tao ty Azaria ro nanomboke nanjaka, naho nanjaka tao Jerosalema zisike ty roe amby dimampolo tao re. Jekolia ro agnaran-drenene, naho bakagne Jerosalema re. ³ Nanao ze mare amaso Yaveh re, arake ze natao Amazia raene. ⁴ Na le zay aza le tsy mba nafaha reo toera agnabo. Mboe nanao soro vaho nagnoro liten-ketae magnitre teo amireo toera agnabo avao ty ndaty. ⁵ Nampijale ty mpanjaka ty Yaveh kay ka boka zisikamity andro nifatezane re naho nitoboke tao amina tragno misara-toera. Jotama, anadahy ty mpanjaka, ro loha ty foko naho nandily teo amity vahoako tao amity tane. ⁶ Naho ty amireo raraha hafa mikasike i Azaria, vaho iaby ze nataone, feie tsy le fa voasoratre ao amity boke ty tantara reo mpanjaka Joda vao zay? ⁷ Ka nimate niarake tamireo razambeine ty Azaria, naleve iereo tagne amity tana Davida niarake tamireo razambeine re. I Jotama, anadahine, ro lasa mpanjaka nisolo ty toerane. ⁸ Tamity fahavalo amby telopolo tao nanjaka Ahazia mpanjaka Joda, le Zakaria ana i Jeroboama ro nanjaka teo amy Israely tagne Samaria zisike ty enem-bola. ⁹ Nanao ze raty teo amaso Yaveh re, manahake ty natao reo razane. Tsy niala tamity hadisoa Jeroboama ana i Nebata, ze nahavy ty Israely nanonta re. ¹⁰ Nimonomono handietre i Zakaria ty Saloma ana i Jabesy, nanafike aze tagne Ibleama, naho namono aze. Le lasa mpanjaka nisolo ty toerane re. ¹¹ Ty amity raraka hafa mikasike i Zakaria, le voasoratre ao amity boke ty tantara reo mpanjaka Israely reo. Zao ro safa Yaveh ze nataliline tamy Jeho, manao hoe:" Hitoboke eo amity sezan-droandria Israely zisikamity foko fahefatre nisolo ty fokonao." Le niseho zay. ¹³ Nanomboke nanjaka Saloma ana i Jabesy tamity fahasive amby telopolo tao nanjaka i Azaria mpanjaka Joda, naho nanjaka volane raike avao tao Samaria re. ¹⁴ Naho niakatre bakagne Tirza ho agne Samaria i Menahama ana i Gady. Tagne ro nanafihane i Saloma ana i Jabesy, tao Samaria. Namono aze re ka lasa mpanjaka nisolo ty toerane. ¹⁵ Ty amity raraha hafa mikasike i Saloma vaho ty monomono nataone, le voasoratre ao amity boke ty tantara reo mpanjaka Israely zay. ¹⁶ Le nanafike i Tifsa vaho reo iaby teo, vaho ty sisin-tane nagnodidy i Tirza ty Menahama, satria tsy vinoha iereo ho aze ty tana. Ka tinafine zay, naho tinatane iaby reo ampela bevoka tao amize tana zay. ¹⁷ Tamity fahasive amby telopolo tao nanjaka Azaria mpanjaka Joda, le nanomboke nanjaka teo amy Israely ty Menahama ana i Gady; nanjaka zisike ty folo tao ta Samaria re. ¹⁸ Nanao ze raty teo amaso Yaveh re. Zisike ty androm-pivelomane, le tsy niala tamity hadisoa Jeroboama ana i Nebata re, ze nahavy ty Israely nanonta. ¹⁹ Naho niavy handietre ty tane ty Pola mpanjaka Asyria, naho namea Menahema talenta volafoty arivo ty Pola, mba hiomba aze ty fanohagna Pola ka hahamafe ty fanjaka Israely teo antanane. ²⁰ Nalae Menahama bakamity Israely tamity alala ty fitakea ty ndaty manan-karea kirai-kiraike mba handoa sekele volafoty dimampolo amine mba hamea ty mpanjaka Asyria vola ao. Ka nitoli-doda nihere ty mpanjaka Asyria naho tsy nitoboke tao amity tane. ²¹ Laha ty amireo raraha hafa mikasike i Menahema, vaho reo iaby nataone, feie tsy le fa voasoratre ao amity boke ty tantara reo mpanjaka Israely vao zay? ²² Naho nimate niarake tamireo razambeine ty Menahema, ka Pekahia anane ro lasa mpanjaka nisolo ty toerane. ²³ Naho tamity faha-dimampolo tao nanjaka Azaria mpanjaka Joda, ro nanomboke nanjaka teo amy Israely tao Samaria ty Pekahia ana i Menahema; nanjaka zisike ty roe tao re. ²⁴ Nanao ze raty teo amaso Yaveh re. Tsy mba nagnary ty hadisoa Jeroboama ana i Nebata, ze nahavy ty Israely nanonta re. ²⁵ Nana nama raike natao ty hoe: Peka ana i Remalia ty Pekahia, ze nimonomono handietre aze. Niarake tamireo dimampolo lahy Gileada, le namono i Pekahia vaho Argoba naho Aria tagne Samaria ty Peka, tao amity tragno manda ty lampa ty mpanjaka. Vinono Peka ty Pekahia naho re ro lasa mpanjaka nisolo ty toerane. ²⁶ Laha ty amity raraha mikasike i Pekahia, vaho reo iaby ze nataone, le voasoratre ao amity boke ty tantara reo mpanjaka Israely zay. ²⁷ Tamity faharoe amby dimampolo tao nanjaka Azaria mpanjaka Joda, ro anomboke ty Peka ana i Remalia nanjaka teo amy Israely tao Samaria; nanjaka zisike ty roapolo tao re. ²⁸ Nanao ze raty teo amaso Yaveh re. Tsy niala tamity hadisoa Jeroboama ana i Nebata, ze nahavy ty Israely nanonta re. ²⁹ Tamity andro Peka mpanjaka Israely, le niavy ka nangalake Iona, Abela-beti-maka, Janoa, Kadesy, Hazora, Gileada, Galilia, naho ty tane Naftaly iaby ty Tiglato-pilesera mpanjaka Asyria. Naho ninday ty vahoake nimbaeo Asyria re. ³⁰ Ka le nanao monomono nandietre i Peka ana i Remalia ty Hosea ana i Ela. Nanafike aze re ka namono aze. Le lasa mpanjaka nisolo ty toerane re, tamity faharoapolo tao nanjaka Jotama ana i Ozia. ³¹ Laha ty amity raraha mikasike i Peka, vaho iaby ze nataone, le voasoratre ao amity boke ty tantara ty mpanjaka Israely zay. ³² Tamity tao faharoe nanjaka Peka ana i Remalia, mpanjaka Israely, le nanomboke nanjaka ty Jotama ana i Azaria, mpanjaka Joda. ³³ Dime amby roapolo tao re tamy nanomboke nanjaka; nanjaka zisike ty ene amby folo tao tamy Jerosalema re. Jerosa ro agnara ty renene; anakampela Zadoka re. ³⁴ Nanao ze mare teo amaso Yaveh ty Jotama. Nagnorike ty ohatre iaby ze natao Azaria raene re. ³⁵ Kanefa, tsy mba nafaha reo toera agnabo. Mboe nanao soro vaho nagnoro liten-ketae magnitre teo amireo toera agnabo avao ty vahoake. Natsanga Jotama ty vavahady ambone Yaveh. ³⁶ Laha ty amireo raraha hafa mikasike Jotama, vaho iaby ze nataone, feie tsy le fa voasoratre ao amity boke ty tantara reo mpanjaka Joda vao zay? ³⁷ Tamize andro zay Yaveh le nanomboke nagnirake i Rezina mpanjaka Arama, vaho Peka ana i Remalia, handietre i Joda. ³⁸ Nimate niarake tamireo razambeine ty Jotama naho naleve niarake tamireo razambeine tao amity tana Davida, razane. Naho Ahaza, anadahine, ro lasa mpanjaka nisolo ty toerane.