¹ Tamity faharoe tao naha-mpanjaka i Joasy anadahy Joahaza, mpanjaka Israely, le nanomboke nanjaka ty Amazia ana i Joasy, mpanjaka Joda. ² Dime amby roapolo tao re ro nanomboke nanjaka; nanjaka sive amby roapolo tao tamy Jeroslema re. Ty agnara ty renene le Joadana, bakagne Jerosalema. ³ Nanao ze mare teo amaso Yaveh re, fa tsy manahake Davida raene. Re le nanao ty zaka iaby ze natao Joasy, raene. ⁴ Feie tsy nafaha reo toera agnabo. Nanohy nanao soro vaho nagnoro liten-ketae magnitre tegne amireo toera agnabo reo ty ndaty. ⁵ Naho laha vatane vaho tafitoboke soa ty fitondrane, le vinonone reo mpanompo ze namono ty raene, le ty mpanjaka. ⁶ Fa mboe tsy vinonone ty ana reo mpamono ndaty, fa nanao arake ty voasoratre tao amity lala, tao amity Boke Mosesy kea re, arake ty le fa nandilia Yaveh, nanao hoe:" Tsy tokone ho vonoe noho ty hadisoa reo anane reo rae, na ho vonoe noho ty hadisoa reo rae-amandrenene reo anane. Fa ty ndaty kirai-kiraike kea le tokone ho vonoe noho ty hadisoane avao." ⁷ Namono miaramila Edomita ray ale re tao amity baibon-tsira re; nalaene tagne agnaly avao kea ty Sela, naho nataone ty hoe: Joktela, ze fikaiha aze zisikezao. ⁸ Naho nandefa mpinday talily ho agne amy Joasy anadahy Joahaza, anadahy Jeho, mpanjaka Israely ty Amazia nanao hoe:" Avia, andao tika hifanao agne agnaly." ⁹ Feie Joasy mpanjaka Israely le nandefa mpinday talily himpoly tagne amy Amazia mpanjaka Joda, nanao hoe:" Ty fatike ze tagne Libanona le nampinday talily ho ahy ty sedera tao Libanona, nanao hoe:' Ameo ho valy ty anako lahy ty anakampelanao,' feie nisy bibin'ala nandrio naho nandia ty fatike. ¹⁰ Le fa nanafike i Edoma vatane riha, le fa nagnakatre anao ty arofonao. Mirehareha amity fahareseanao, feie mijanogna ao antragno, fa nagnino riha ro tokone hagnoronta vaho hanonta ty vatanao, le riha vaho Joda niarake taminao?" ¹¹ Fa tsy nidranjy ty Amazia. Ka nanafike Joasy mpanjaka Israely naho nifagnatre-tarehe tao Bety-semesy re vaho Amazia, mpanjaka Joda, ze ahy Joda. ¹² Rese Israely ty Joda, naho nilay noly ty lahilahy iaby. ¹³ Tsinepa Joasy mpanjaka Israely tao Bati-semesy ty Amazia mpanjaka Joda ana i Joasy anadahy Ahazia. Niavy tao Jerosalema re naho nandrava ty rindry nanomboke teo amity vavahady Efraima zisikagne amity vavahady Zorone, efajato metatre ty halavane. ¹⁴ Nalaene iaby ty volamena vaho ty volafoty iaby, reo zaka iaby hisake tao antragno Yaveh, vaho reo zaka manan-danja iaby tao amity lampa ty mpanjaka, niarake tamireo takalom-pia avao kea, naho nimpoly tagne Samaria re. ¹⁵ Laha ty amireo zaka hafa mikasike Joasy, iaby ze nataone, ty fahefane, naho ty fomba nialiane tamy Amazia mpanjaka Joda, feie tsy le fa voasoratre ao agnate ty boke ty tantara reo mpanjaka Israely vao zay? ¹⁶ Naho nimate niarake tamireo razambeine ty Joasy naho naleve tagne Samaria niarake tamireo mpanjaka Israely, naho Jeroboama, anadahine, ro lasa mpanjaka nisolo aze. ¹⁷ Amazia ana i Joasy, mpanjaka Joda, le nivelo dime amby folo tao tafara ty nimateza Joasy, ana i Joahaza, mpanjaka Israely. ¹⁸ Laha ty amireo zaka hafa mikasike i Amazia, feie tsy le fa voasoratre ao agnate ty boke ty tantara reo mpanjaka Joda vao zay? ¹⁹ Nanao hevetre handiera i Amazia tao Jerosalema iereo, naho nilay tagne Lakisy re. Nilay tagne Lakisy re, feie nandefa lahilahy hagnorike aze tagne Lakisy iereo naho namono aze tagne. ²⁰ Niente iereo nimpoly tamity soavale re, naho nimpoly niarake tamireo razameine tao amity tana Davida. ²¹ Ty vahoake Joda iaby le nangalake i Azaria, te ene amby folo tao, naho nanao aze ho mpanjaka teo amity toera Amazia raene. ²² Azaria ro nagnore ndraike i Elota nao nanao zay tao Joda, naho nimate niarake tamireo razambeine ty Amazia. ²³ Tamity fahadime amby folo tao naha-mpanjaka i Amazia, anadahy Joasy mpanjaka Joda, ro nanomboha Jeroboama anadahy Joasy mpanjaka Israely nanjaka tao Samaria; nanjaka zisike ty raike amby efapolo tao re. ²⁴ Nanao raty teo amaso Yaveh re. Tsy niala tamireo hadisoa natao Jeroboama anadahy Nebata re, ty nahavy ty Israely hanonta. ²⁵ Nampimpoly ty sisin-tane Israely nanomboke teo Lebo Hamata zisikagne amity Riake ty Araba re arake ty safa Yaveh, ty Zagnahare Israely, ze le fa nirehafene tamy Jona mpanompo ty ana i Amitahy, ty mpaminane, bakagne Gata-hefera. ²⁶ Fa hisa Yaveh ty jale Israely, ze vatane nangirifiry tamity iaby iaby, na ty ndevo na ty malio, naho tsy nisy mpagnavotre ty Israely. ²⁷ Ka nirehake Yaveh fa tsy hanimba ty agnara Israely eo amity ambane lagnitre Re, fa vinonjene tamity alala ty tagna Jeroboama ana i Joasy kea iereo. ²⁸ Laha ty amireo zaka hafa mikasike i Jeroboama, reo iaby ze nataone, ty fahefane, ty nialiane vaho nagneregnane i Damaskosy vaho Hamata, zay ahy Joda, ho ahy Israely, feie tsy le fa voasoratre ao amity boke ty tantara reo mpanjaka Israely vao zay? ²⁹ Nimate niarake tamireo razambeine ty Joroboama, niarake tamireo mpanjaka Israely, naho i Zakaria anadahine ro lasa mpanjaka teo amity toerane.