¹ Tamity tao fahatelo amby roapolo naha-mpanjaka Joda Joasy andahy Ahazia, ro nanomboke nanjaka teo amy Israely tagne Samaria ty Joahaza; fito amby folo tao re ro nanjaka. ² Nanao ze raty teo amaso Yaveh re naho nagnorike reo hadisoa Jeroboama anadahy Nebata, ze nahavy Israely hanonta; naho tsy niala tamizay ty Joahaza. ³ Nirehetre tamy Israely ty helo Yaveh, naho natolotre iereo tegne antagna Hazaela mpanjaka Syria zisikagne Re naho tegne antagna Beni-Hadada anadahy Hazaela. ⁴ Ka le nangatake Yaveh ty Joahaza, naho nidranjy aze Re satria hisane ty fampijalea ty Israely, ty fomba nampijalea ty mpanjaka Syria iereo. ⁵ Ka namea Yaveh mpamonje ty Israely, naho nilay bakamity tane reo Syriana iereo, naho ty ana Israely nanomboke nitoboke tagne amireo fitobohane arake ze nanagna iereo taloha. ⁶ Na zay aza, le tsy niala tamireo hadisoa ty foko Jeroboama iereo, ze nahavy ty Israely hanonta, naho nanohy zay iereo, naho ty baon'Aseraha nijano tagne Samaria. ⁷ Ka niala i Joahaza reo Syriana niarake tamity mpitiki-tsoavale dimampolo, kalese folo, naho miaramila antomboke ray ale avao, fa ty mpanjaka Syria le fa nandrava iereo, naho nanao iereo hoe ty akofa amity androm-pikosohambare. ⁸ Laha ty amireo zaka hafa mikasike i Joahaza, vaho ze nataone iaby naho ty fahefane, feie tsy le fa voasoratre ao amity boke ty tantara reo mpanjaka Israely vao zay? ⁹ Ka nimate tagne amireo razane ty Joahaza, naho nandeve aze tagne Samaria iereo. Le Joasy anadahine ro lasa mpanjaka teo amity toerane. ¹⁰ Tamity tao fahafito amby telopolo naha-mpanjaka Joda i Joasy, ty fanjaka Josay anadahy Joahaza le nanomboke teo amy Israely tagne Samaria; ene amby folo tao ro nanjakane. Nanao ze raty teo amaso Yaveh re. ¹¹ Tsy mboe niala tamireo hadisoa Jeroboama anadahy Nebata re, ze nahavy Israely hanonta, feie tagne amirey ro nindehanane. ¹² Laha ty amireo zaka hafa mikasike i Joasy, vaho ze nataone iaby, naho ty herene tamize nialiane tamy Amazia mpanjaka Joda, feie tsy le fa voasoratre ao amity boke ty tantara reo mpanjaka ty Israely vao zay? ¹³ Le nimate tagne amireo razambeine ty Joasy, naho Jeroboama ro nitoboke teo amity sezan-droandriane. Le naleve teo niarake tamireo mpanjaka tagne Samaria ty Joasy. ¹⁴ Naho narare noho ty arete raike ze namono aze ty Elisa tafara atoy, ka nizotro tagne amine ty Joasy mpanjaka Israely naho nitagny teo amine. Hoe re hoe:" Ry raeko, ry raeko, reo kalese ty Israely vaho ty mpitiki-tsoavale ro mangalake anao!" ¹⁵ Le hoe ty Elisa tamine:" Mangala folese naho bala-folese maro" ka le nagalake folese vaho bala-folese maro ty Joasy. ¹⁶ Hoe ty Elisa tamity mpanjaka Israely hoe:" Anovo eo amity folese ty tagnanao," ka nataone teo amizay ty tagnane. Bakeo natobo Elisa teo amity tagna ty mpanjaka ty tagnane. ¹⁷ Hoe ty Elisa hoe:" Sokafo mianignana ty lafonete." Le sinokane zay. Le hoe ty Elisa hoe:" Tifiro", ka nitifitre re. Le hoe ty Elisa:" Zay ro bala-folesem-paharese Yaveh, bala-folesem-paharese Yaveh teo amy Syria, fa hanafike reo Syriana agne Afeka riha zisike ty andravanao iereo." ¹⁸ Le hoe ty Elisa hoe:" Raeso reo folese," ka nalae Joasy reo. Le hoe re tamity mpanjaka Israely hoe:" Asio amirey ty tane," ka nagnisy ty tane intelo re, naho nijano bakeo . ¹⁹ Feie meloke tamine ty lahilahin'Agnahare ka nanao hoe:" Tokone indime na ignene ro nagnisianao ty tane. Bakeo le tokone nanafike Syria riha mandram-paharava nao aze, nefa amizao intelo avao riha ro hanafike i Syria." ²⁰ Bakeo le mate ty Elisa, naho nandeve aze iereo. Naho nisy Moabita nanafike ty tane tamity voaloha ty tao. ²¹ Laha nandeve ty lahilahy iereo, le nahisake Moabita raike re, ka nanorake ty vatagne tao ankibory Elisa. Laha vatane vaho nikasike ty taola Elisa ty fate ty lahilahy, le velo ndraike re naho nitsanga. ²² Nampijale reo Israely tamity andro Joahaza mpanjaka iaby ty Hazaela mpanjaka Syria. ²³ Nefa nandefetre ty Israely Yaveh, ka niferegnay iereo naho niantra iereo, noho ty fagnenkeam-pilongoa nataone tamy Abrahama, Isaka, naho Jakoba. ka tsy nandrava iereo Yaveh, naho mboe tsy nandroake iereo tamity fiatrehane Re. ²⁴ Mate ty Hazaela mpanjaka i Syria, ka i Beni-hadada anadahine ro lasa mpanjaka teo amity toerane. ²⁵ Nampipoly reo tana ze nalae tamy Joahaza raene tamity aly tamy Beni-hadada ana i Hazaela ty Joasy ana i Hazaela. Intelo ty Joasy ro nanafike aze, naho nangalake reo tana Israely reo ndraike re.