¹ Tamity fahafito tao nanjaka Jeho, ro nanomboke ty fanjaka Joasy; nanjaka zisike ty efapolo tao tamy Jerosalema re. Zibia ro agnaran-drenene. bakagne Beri-sheba. ² Nanao ze mare teo amaso Yaveh ty Joasy tamity andro iaby, satria nagnanatre aze ty Joiada mpisoro. Kanefa reo toera agnabo tsy rinava. ³ Mboe nanao soro vaho nagnoro liten-ketae magnitre teo amireo toera agnabo avao ty vahoake. ⁴ Hoe Joasy tamireo mpisoro hoe:" Ty vola iaby ze niente ho fagnatetre masy tao antragno Yaveh, le ty vola ze natao ty ndaty kirai-kiraike__na ty vola navory tamity fagnisaham-bahoake zay, na ty vola azo tamity vava arere, na ty vola niente ty ndaty tamity fandrisiha Yaveh tao ampo iereo mba hagnomea__ ⁵ le tokone ho raese reo mpisoro ty vola bakamity raike amireo harea iereo naho hagnamboara ze havoa hisake tao antempoly." ⁶ Fa tamity fahatelo amby roapolo tao nanjaka Joasy Mpanjaka, le tsy nagnamboatre na ino ino tao antempoly reo mpisoro. ⁷ Naho nikaike i Joiada mpisoro vaho reo mpisoro hafa ty Joasy mpanjaka; hoe re tamiereo hoe:" Nagnino nareo ro tsy nagnamboatre na ino ino tao antempoly? Amizao ko mangalake vola amity mpandoa hetra sase, fa raeso ze le fa voavory mba hagnamboara ty tempoly naho ameo reo ze afake manao ty hamboatre zay." ⁸ Laha zao le nagnenke tsy hitake vola amity vahoake vaho tsy hagnamboatre ty tempoly sase reo mpisoro. ⁹ Fa kea, nangalake vata raike Joiada mpisoro, nandoake ty lombone, naho nametrake zay teo agnila ty alitara, teo ankavana ty filira ao amity tragno Yaveh. Reo mpisoro ze niambe ty filira ao antempoly le nametrake ty vola iaby ze niente ho ao antragno Yaveh tao amizay. ¹⁰ Isake ty hisa iereo fa bey vola tao agnate ty vata, le niavy mpanora-dala ty mpanjaka vaho ty mpisorombey naho nametrake ty vola tao agnate kitapo naho magnisake zay bakeo, ty vola hisake tao antempoly Yaveh. ¹¹ Natolo iereo teo antagna reo lahilahy ze nikarakara ty tempoly Yaveh ty vola ze voalanja. Namea iereo reo mpandrafitre vaho reo mpamboatre ze niasa tao antempoly Yaveh zay, ¹² naho ho ahy reo mpanao tragno vaho reo mpanao vato, mab hivilia hetae vaho vato voatampake mba hagnamboara ty tempoly Yaveh, vaho ho ahy zaka iaby ze paie vilie hagnamboara zay. ¹³ Fa ty vola niente tao antragno Yaveh le tsy nagnomea hivilia finga volafoty, meso, koveta, trompetra, na enta volafoty na volamena ho ahy zay. ¹⁴ Namea iereo reo ze nanao ty asa famboara ty tragno Yaveh ze vola zay. ¹⁵ Fagnampe zay, tsy nangatake ty vola namea hanova famboara mba ho agnate reo lahilahy ze nandrae zay iereo naho nagnomea zay ho ahy reo mpiasa, satria mare reo lahilahy reo. ¹⁶ Fa ty vola ho ahy ty fagnatetre noho ty heloke vaho ty fagnatetre noho ty hadisoa le tsy niente tao antempoly Yaveh, satria ahy reo mpisoro zay. ¹⁷ Naho nanafike vaho nialy tamy Gata ty Hazaela mpanjaka Syria, naho nahazo zay. Bakeo le nitolike hanafike i Jerosalema ty Hazaela. ¹⁸ Nalae Joasy mpanjaka Joda ty zaka iaby ze natao Josafata vaho Jehorama naho Ahazia, vaho reo razambeine, reo mpanjaka Joda, vaho reo volamena hisake tao amity efetre famoria tao antragno Yaveh vaho ty mpanjaka naho nandefa reo tagne amy Hazaela mpanjaka Syria. Le lasa niala tao Jerosalema ty Hazaela. ¹⁹ Laha ty amireo raraha hafa mikasike Joasy, iaby ze nataone, feie tsy le fa voasoratre ao amity boke ty tantara reo mpanjaka Joda vao zay? ²⁰ Nitsanga reo mpanompone naho niarake nanao hevetre; tinafy iereo tagne Beti-milo ty Joasy, agne amity lala mizotro mbaeo Sila. ²¹ Tinafy i Jozakara anadahy Simata, vaho Jozabada anadahy Somera, mpanompone re, ka mate. Naleve iereo niarake tamireo razambeine tao amity tana Davida ty Joasy, naho Amazia, anadahine, ro lasa mpanjaka teo amity toerane.