¹ Naho tamity tao fahatelo nanjaka Hosea ana i Elaha, mpanjaka Israely, ro nanomboke nanjaka ty Hezekia ana i Ahaza, mpanjaka Joda. ² Dime amby roapolo tao re ro nanomboke nanjaka; nanjaka sive amby roapolo tao tagne Jerosalema re. Ty agnaran-drenene le i Aby; anakampela Zakaria re. ³ Naho nanao ze mahity teo amaso Yaveh re, nagnorike ty ohatre iaby ze le fa natao Davida razambeine. ⁴ Nagnafake reo toera agnabo re, nandrava reo ambe vato, naho nanampake reo baon'Aseraha. Nanampantampake ty menara varahy ze natao i Mosesy re, satria tamireo andro reo ro nagnoroa ty vahoake Israely ty liten-ketae magnitre ho ahy zay; zay le natao hoe:" Nehostana." ⁵ Natoky Yaveh, ty Zagnahare Israely ty Kezekia, mba tsy hisy ndaty hitovy amine ao afarane eo amireo mpanjaka Joda iaby, na eo amireo mpanjaka ze talohane. ⁶ Fa niarake tamy Yaveh re. Tsy nijano nagnorike aze re naho niambe reo liline, ze nandilia Yaveh Mosesy. ⁷ Ka niomba Hezekia Yaveh, naho na aia aia nombane le nambine re. Niarake nandietre ty mpanjaka Asyria re naho tsy nanompo aze. ⁸ Nanafike reo Filistina zisikagne Gaza vaho ty sisin-tane magnodidy re, zisikagne amity tilikambo reo mpiambe ka zisikagne amity tana voaaro mafe. ⁹ Naho tamity tao fahaefatre nanjaka Hezekia Mpanjaka, ze tao fahafito nanjaka Hosea ana i Elaha mpanjaka Israely, le niakatre handietre i Samaria ty Salmanesera mpanjaka Asyria naho nanao faherano zay. ¹⁰ Naho tamity fiafara ty tao fahatelo ro nangala iereo zay, le tamity tao fahaene nanjaka Hezekia, ze tao fahasive nanjaka Hosea mpanjaka Israely; zay ro fomba nitsepaha i Samaria. ¹¹ Ka niente ty mpanjaka Asyria tagne Asyria ty Israely, naho nataone tao Hala, teo amity Rano Habora tagne Gozana, naho tao amireo tana Mediana iereo. ¹² Nanao zay re satria tsy nagnenke ty feo Yaveh Zagnaharene iereo, fa kea nandika ty rehake ty nifagnenkea, iaby ze nandilia Mosesy mpanompo Yaveh iereo. Nilietre hidranjy na hanao zay iereo. ¹³ Naho tamity tao fahaefatre amby folo nanjaka Hezekia Mpanjaka, Sankeriba mpanjaka Asyria le nanafike ty tana voaaro mafe iaby Joda ka nangalake reo. ¹⁴ Ka nandefa talily tagne amity mpanjaka Asyria, ze tane Lakisy ty Hezekia mpanjaka Joda nanao hoe:" Le fa nanohy anao raho. Miala amiko. Na ino ino hampindesenao ahy le ho enteko." Le nitake tamy Hezekia mpanjaka Joda mba handoa ty talenta volafoty telonjato vaho talenta volamena telopolo ty mpanjaka Asyria. ¹⁵ Ka namea Hezekia aze ty volafoty iaby ze hisake tao amireo tragno Yaveh vaho tao amireo fitobohan-jaka lafo-vily ty lampa ty mpanjaka. ¹⁶ Le nafaha Hezekia ty volamena teo amity tempoly Yaveh vaho teo amity ambe ze nametahane takelam-bolamena; naho nameane ty mpanjaka Asyria ty volamena. ¹⁷ Nefa ty mpanjaka Asyria nagnetseke ty tafine foloay, nagnirake i Tartana vaho Raba-sarisa naho ty bey ty mpifehe bakagne Lakisy ho agne amy Hezekia mpanjaka ao Jerosalema. Nindeha niakatre tamity lala iereo naho niavy tao ambaly Jerosalema. Namonje ty lakan-drano ty kamory ambone iereo, teo andalambey ty baibo ty mpamotsy lamba, naho nijano teo amizay. ¹⁸ Laha fa nikaike i Hezekia Mpanjaka iereo, le niakatre mba hagnente iereo ty Eliakima anadahy Hilkia, ze nandily ty foko, vaho Sebna mpanora-dala, naho Joa anadahy Asafa, mpitahiry talily. ¹⁹ Naho ty bey ty mpifehe nirehake iereo mba hitalily amy Hezekia ze nirehafe ty mpanjaka bey, mpanjaka Asyria, manao hoe:" Ino ro loharano ty fatokianao? ²⁰ Rehake tsy misy antone ro rehafenao, manao hoe misy nama vaho here ho amity aly. Naho amizao ia ro atokisanao? Ia ro nagnomea herem-po anao havande handietre ahy? ²¹ Ingo, matoky ty tehe volontara torotoro ty Egypta riha, kanefa laha mitehe amizay ty ndaty, le hipiteke eo amity tagnane zay ka handoake zay. Manahake zay ty Farao mpanjaka Egypta amireo iaby matoky aze. ²² Fa laha mirehake amiko riha hoe:' Matoky Yaveh Zagnahare zahay, feie vao tsy re ty raike ze nangalake reo toera agnabo vaho ty alitara ze nalae Hezekia, naho nitalily tamy Joda vaho Jerosalema hoe:' Tsy maintsy manompo eo agnoloa ty alitara Jerosalema toy riha'? ²³ Amizao are, te-hanolotre fagnatetre soa bakamity tompoko mpanjaka Asyria raho. Hameako Soavale roe arivo riha, laha mahisake mpitikitre aze reo. ²⁴ Hataonao akore ty mandietre na le ty raike amity kapitene ze kele vatane amireo mpanompo ty tompoko aza? Le fa nametrake ty fatokianao tagne Egypta ho ahy reo kalese vaho ty mpitiki-tsoavale riha! ²⁵ Feie le fa nindeha niakatre tsy nisy Yaveh mba hialy handietre vaho handrava ty toera toy vao raho? Hoe Yaveh tamiko:' Tafiho naho aravao ty tane toy."' ²⁶ Bakeo Eliakima anadahy Hilkia, vaho Sebna, naho Joa nirehake tamity bey ty mpifehe hoe:" Mba rehafo amity firehake Syriana rie reo mpanomponao, fa azonay zay. Ko mirehake aminay amity firehake Joda eo amity sofy ty ndaty ze eo amity rindry." ²⁷ Nefa hoe ty bey ty mpifehe tamiereo hoe:" Feie vao nandefa ahy ho agne amity tomponao vaho riha ty tompoko mba hitalily reo rehake reo? Feie vao raho nalefane tagne amireo lahilahy mitoboke eo amity rindry, ia ro tsy maintsy hihina ty malotene vaho hino ty amany iereo arere miarake aminao?" ²⁸ Naho ty bey ty mpifehe nitsanga vaho nikaike tamity feo mafe tamity firehake Jiosy hoe:" Dranjigno ty rehake ty mpanjaka bey, le ty mpanjaka Asyria. ²⁹ Zao ro ambara ty mpanjaka,' ko mete hofitahe Hezekia nareo, fa tsy afake ty hamonje anao amity fahefako re. ³⁰ Ko mamototre Hezekia hampatoky anao Yaveh, manao hoe:" Hamonje antika vatane Yaveh, naho ty tana toy le tsy hatolotre ho eo antagna ty mpanjaka Asyria."' ³¹ Ko midranjy i Hezekia, fa zao ro reha ty mpanjaka Asyria hoe:' Milongoa amiko naho miaraha amiko. Naho ty kirai-kiraike baka aminareo le sambe hihina amity voalobone vaho ty hetaen'aviavine, naho hino ty rano ao amity famorian-dranone. ³² Hanao zay mandra-pihaviako vaho hindaisako anareo agne amity tane hoe ty tanenareo arere, tane tsy misy vare vaho voaloboke vaovao, tane misy mofo vaho tanem-boaloboke, tane misy hetae oliva vaho tantele mba ho velo nareo fa tsy ho mate.' Ko midranjy i Hezekia laha miezake mandrese lahatre anareo re, manao hoe:' Hamonje antika Yaveh.' ³³ Feie nisy nahavonje iereo teo antagna ty mpanjaka Asyria vao reo zagnahare ty ndaty? Aia vao reo zagnahare Hamata vaho Arpada? ³⁴ Aia vao reo zagnahare i Sefarvaima, vaho Hena, naho Iva? Nahavonje i Samaria teto antagnako vao iereo? ³⁵ Eo amity zagnahare ty tane iaby, feie vao le fa nisy zagnahare nahavonje ty tanene tamity fahefako? Akore ro hahafaha Yaveh mamonje i Jerosalema amity hereko?" ³⁶ Kanefa nitsy ty ndaty naho tsy namale, satria le fa nandily ty mpanjaka hoe:" Ko mamale aze." ³⁷ Bakeo Eliakima, ana i Hilkia, ty ambone teo amity foko; vaho Sebna ty mpanora-dala; naho Joa ana i Asafa, ty mpitan-tsoratre, nilitre nimbaeo amy Hezekia niarake tamireo siky iereo riatre, naho ninday ty reha ty bey ty mpifehe tamine.