¹ Yesu gendi goda kega mu bwaadu,ga sabugi kega mwetshi,ga gumi ye bula diandi ndi beeni. ² Bi tshi mu nedila gi gada gi moshi gi hwaa miimba ye londi di giandu.dangu Yesu di gadadi lu gwigilu lu baa,ga ledi mu kashi mbi:"ndji pangi wami muudu wu masumu,gala ye gi gesa,Gahungu wu gu loludi.'' ³ Bwoona ba longi beega ba tshigu ba yandigi gu yagula gu ma mbundu ma baa mbi:"muudu wuu ga ba mvwenza Gahungu!" ⁴ Yesu ga yabi ngindu dji baa,ga ba yufudi:"mudiambu di kii lwedi ye mabanza mana ma mbii? ⁵ Mu mapandi maa moodi,kii biedi bi pashi mu gu yagula:''Gahungu wu gu loludi''mbi loo''niamuga,ndaawenda gwoogu?" ⁶ Haa yi ba zola binu lu yaba mbi mwaana muudu gedi ye gi yega mu gu lolula muudu wu masumu yaa ye londi di manu.''Bwoona ga ledi gi gada mbi:"niamuga gwoogu,senda giandu giagu,bwoona vuduga gu nzu yagu!" ⁷ Muudu weeni ga niamugi,ga vudugi gu nzu yandi. ⁸ Dangu baadu di badadi bwoona,booma bu ba gami;ba heegi Gahungu lugumu mudiambu Gahungu ga hegi muudu gi yega gi buna. ⁹ Yesu ga gadugi ye gi hani gina.Dangu di ga gadi muni luda,ga dadi muudu wu hemini ye twala yi nzu yi gu fudisa baadu bidadi,ndjina diandi Matayi.Yesu ga mu ledi mbi:"ndada.''Matayi ga niamugi,ga landi Yesu. ¹⁰ Dangu Yesu di ga gadi muni dia mu nzu,dulagi ye baadu beega ba vula bambii,bitshi dia meesa ma moshi ye ndi ye ba longogi bandi. ¹¹ Dangu ba fadishi yedi badadi mapandi mana,ba yufudi balongogi bandi mbi:"mudiambu di kii longi wu binu ga ba deia meesa moshi ye dulagi ye baadu ba vula ba bikalulu bi mbii?" ¹² Yesu ga ba yugi,bwoona ga ba ledi mbi:"baadu bana loo beedi ye gikashi,loo beedi ye fwunu yi munganga.Haa bana beedi ye gi kashi,baadu ba bana beedi ye fwunu yi munganga. ¹³ Ndaa lu longuga gi songidila gi pandi maa meedi mu muganda wu Gahungu:"loo yi zolaga mbi baadu ba peegi ma gabu magimeengi,haa nzolagagi baadu ba yugidi baadu beega kenda.''Mudiambu loo yi tshi mu gu lendiga baadu ba pimbu haa baadu ba masumu.'' ¹⁴ Dangu di,ba longogi ba Yowani mbodigi bitshi yufula Yesu mbi:"mbal;a dji vula pidu ye ba fadishi du dunaga gu dia mudiambu ye gu samba Gahungu,haa ba longogi bandi,mudiambu di kii kondaga duna gu dia shi gandambu?" ¹⁵ Yesu ga ba yufudi kega mbi:"binu lu bayaba mbi ba ndugu ba muudu wuna wu bakwela,ba fani gala mu kenda dangu muudu wuna di gedi ye baa?Loo,haa gi lumbu giedi gi ba gadula muudu wuna mu kadi ga baa,bwoona gi ba duna gu dia. ¹⁶ ''Muudu loo ga fani bambigisa muledi wu tuunda mugidembu gi muledi wu mpaa,mudiambu gi dembu gina gi baga muledi wuna wu tunda bwoona ganu di luda pila yi gadi teegu mu bu neeni. ¹⁷ Muudu loo ga fani saa kega vinu di mpaa mu bungu di tunda mu muganda wu mbitshi.Mbi buga hangi bwoona,mabungu bu mabudiga,vinu bu di diaguga,mabungu bu mafwaa.Haa ba saaga vinu di mpaa mubungu di mpaa,haa nga ba digieba ma moodi pimbu.'' ¹⁸ Dangu Yesu di ga gadi muni yabisa pandi yina,fwumu wu moshi wu ba yuda gitshi guma ga fugamani mu milu mi Yesu,bwoona ga yagudi:"mwaana wami wu mukedu wu fwii sebi-sebi di,haa yi zaa wu mu saa gogu,bwoona nga ga gala ye mooni.'' ¹⁹ Yesu ga niamugi,ga landi muudu weeni;ba longogi bandi kega ba mu landi. ²⁰ Mukedu wu moshi ga gadi ye gi kashi gi guduga meengi yandiga ma mvula guumi ye moodi gitshi pena-pena gu ngoyi Yesu.Bwoona ga gami tsongi wu muledi wandi, ²¹ Mudiambu ga yindula mbi:"mbi bu yi gami tsongi yi muledi wandi,kindagi.'' ²² Haa Yesu ga balumugi gi ngoyi,gadadi mukedu weeni,bwoona ga yagudi mbi:"ngudi wu gala ye gigesa!lugwigilu lwoogu lu gu hulushi.''Mu dangu diadina kaga,mukedu wuna ga gindii. ²³ Dangu Yesu di ga gumi mu nzu yi fwumu yi bayuda,gadadi baadu ba bula mizigi mu mafwaa ye beega ba vula ba saa lolu, ²⁴ Bwoona ga ba ledi mbi:"ga dugani gu binu!mwaana loo ga fwii,haa gedi huhwaa mimba.''Bwoona baadu beeni ba yandigi gu mu seya. ²⁵ Dangu di ba dushi baadu gu hwii,Yesu ga godi,ga gami mwaana wu mukedu mu gogu,bwoona mwaana ga niamugi. ²⁶ Tsangu djina dji pasagani gi dini gina gi muwundu. ²⁷ Yesu ga gadugi yana.Dangu di ga gadi muni gwenda,baadu boodi ba hwaa fwaa misu ba yandigi gu mu landa muni gwendaga yagula mundaga yi ngolu mbi:"mwaana Davidi,du yuga kenda!'' ²⁸ Dangu Yesu di gagumi mu nzu,baadu bana ba fwii misu ba pusugi pena-pena ye ndi,bwoona ga ba yufudi mbi:"lu yabi mbi yi fani hanga pandi yina?"Baa mbi:"eee,fwumu!'' ²⁹ Dangu di,Yesu ga shi lu lembu ye londi di misu mi baa,ndi mbi:"pandi yi yiootsu yi gala kaga gwedi binu bootsu nga bwedi lugwigilu lu binu!'' ³⁰ Bwoona ba yandigi gu dala kega.Yesu ga ba ledi mu ngolu mbi:"gebani!loo lesani mbandi yii shi gwedi muudu wu moshi!'' ³¹ Haa bendi yagula pandi yina gu ndambu yiootsu. ³² Dangu baadu bana di bendagi,baadu beega bitshi needa gi hulu gwedi Yesu.Gihulu gina loo gi yabi gu yagula mudiambu ga gadi ye mihunga mimbii. ³³ Dangu Yesu di ga dushi mihunga mimbii,muudu wuna ga yandigi gu yagula.baadu bootsu bana ba gadi yana ba yidugi.Ba yandigi gu yagula mbi:"mu kadi ga baadu ba yi shiledi loo yandu du sadi dala muudu wu buu shi mbala yi moshi!" ³⁴ Haa bafadishi mbi:"fwumu wu mihunga mimbii,wu muhegaga ngolu mu gu dusaga mihunga mimbii.'' ³⁵ Yesu genda luda mu mabula mootsu maneeni ye ma digi-digii genda longa baadu mu manzu ma baa ma bisambu,genda ba yabisa tsangu dji pimbu mudiambu ye gi fwumu gi Gahungu,genda gindisa baadu bana ba gadi ba kashi mbi loo mu pashi dji pila ye pila. ³⁶ Dangu di gadadi baadu ba vula-bavula,ga ba yugi kenda,mudiambu ba gadi ba lembwi,gi gesa loo,nga ma mema ma gondi ngungudi wu gu madala. ³⁷ Bwoona Yesu ga ledi ba longogi bandi mbi:"kuna dji vula djiedi mu ngundu,haa baadu ba gisalu loo beedi ba fani dji gadula. ³⁸ Woondilani weeni ngundu mu gu dumisa baadu beega mu gisalu mudiambu ye gu gadula kuna djiandi.''