¹ "Loo gu hangani bisalu bi binu bi Gahungu mudiambu di gudi lela gu misu mi baadu bootsu.Mbi bwoona lu hangi dada wu binu weedi gu yilu,loo ga lu hega sandadingwadi shi ga ndambu. ² Bwoona,mbi wu bahana magabu gwedi tsugami,loo guda muganda;yina pila yi hangaga muudu wu bu pala ye mu ma nzu ma bisambu ye mu muwangu,mudiambu baadu ba badidisa.Yi ba lu lela mapandi ma kiediga:ba sendi gu mwaga sandadi ngwadi di baa. ³ Haa mbi wu bahana magabu gwedi ba tsugami,hanga mu pila mbi shi ndugu woogu shela ga konda yaba mapandi mana. ⁴ Bwoona magabu magu loo mamiga gu misu ma baadu,haa dada woogu weedi gu yilu,wuna wu dalaga mapandi wu hangaga mu gi tswegi,ga gu hega sandadingwadi. ⁵ Mbi lu basamba Gahungu,loo gu galani nga baadu ba bupala ba zolaga gu gala mu muninga mu ma nzu ma bisambu ye mu ma magu ma ma ndjila mudiambu baadu bootsu ba badala.Yi ba lu lela mapandi ma kiediga:ba sendi ye tuunda sandadingwadi. ⁶ Haa mbi wu ba zola samba,goda gu sugu diagu,ganga kiafulu,bwoona samba dada woogu wuna wu kondaga moniga.Bwoona dada woogu wuna wu dalaga mapandi mana ma wu hangaga mu gi tswegi,ga guhega sandadingwadi. ⁷ Mbi lu ba samba,loo gu yagulani ngolu nga ba mipani.ba yindulagagi mbi Gahungu ga ba yuga mudiambu ye bisambu bi baa bi leeya. ⁸ Loo gu galani nga baa,mudiambu dada wu binu ga yabaga gu twala mapandi mana ma lwedi ma fwunu dangu di lu kondi mudinga. ⁹ Dalani pila yi lu fani sambila Gahungu:"dada wu binu wuna weedi gu yilu,ndjina diagu di gala di lugumu. ¹⁰ Gi fwumu giagu gitsa,luzolu lwoogu luhanga yaa mu manu nga gu yilu. ¹¹ Duhega leludi madia mana ma dwedi maa fwunu. ¹² Du lolula pidu baadu ba masumu bu du loludi baadu ba duhangagagi mambii. ¹³ Loo gu du yambula pashi yi guluda dji vula,haa dugadula gu mioogu mi baadu ba mbii. ¹⁴ Mudiambu,baadu beega bana ba luhangi mbii lu ba balolula,dada wu binu kega weedi gu yilu bu ga lu lolula. ¹⁵ Haa mbi loo lu ba lolula baadu beega,dada wu binu kega loo ga lu lolula. ¹⁶ Mbi lu ba duna gu dia mudiambu di gu samba Gahungu,loo gu galani ye mbunzu yi kenda nga baadu bupala;ba balumunaga ma mbunzun ma baa mudiambu di gu lela baadu mbi ba dunaga gu dia mudiambu di gu samba Gahungu.Yi ba lu lela mapandi ma kiediga:ba sendi ye tunda sandadingwadi di baa. ¹⁷ Mbi wu ba duna gu dia sugula mbunzu yagu,sanuna tsugi dJiagu. ¹⁸ Bwoona,baadu beega loo ba yaba mbi wu ba duna gu dia;kaga dada woogu wuna wu gondaga moniga wu yabagagi.Bwoona dada woogu wuna wu dalagagi mapandi mana ma wu hangaga mu gi tswegi,ga gu hega sandadi ngwadi. ¹⁹ Loo gu tswegani gi mvwama yaa ye londi di manu.Yaa ye londi di manu ba mbitshi badi di diagaga,bi gumaga madadi beebi ba godaga mu nzu mu ngolu mu gwenda bi yiba. ²⁰ Haa yi tswega gi mvwama gu yilu,guna ba mbitshi loo ba fani bi dia,loo bi fani guma madadi,beebi loo bas fani goda kega mu gwenda gu bi yiba. ²¹ Mudiambu gihani giedi giagu,ya yena kega ye gala mbundu yagu. ²² Misu maagu miedi nga mwiinda wu ludu lwoogu.mbi magu meedi pimbu,ludu gu lu mu mvimba lugala kega ye mwiini. ²³ Haa mbi misu magu meedi ma gu fwaa,ludu lwoogu lu mvimba kega lugala piba.Piba yi gala yi vula shela! ²⁴ Loo shi muudu wu moshi wu fani hangila ba fwumu boodi,ga zola fwumu wu moshi,haa wuna weega loo,ga dumuga gweedi fwumu wu moshi,haa ga mvweza wuna weega.Binu kega,loo lu fani hangila ba fwumu baa boodi,Gahungu ye gi mvama ²⁵ Bwoona,yi ba lu lela mbi:loo lu fani dala pashi mbi kii lu diagi,mbi loo kii lu nwagi mudiambu ye lunzingu lu binu,loo fani dala pashi kega mbi kii miledi lu mvadagi mu ludu lu binu.Haa mooni loo lu galudi madia mu fwunu.Haa ludu loo ludi madia mu fwunu? ²⁶ Dalani ba nuni:loo ba gunaga,loo ba gadulaga kega bima mu mangundu,loo ba biswegaga mu nzu,haa dada wu binu wuna weedi gu yilu ga ba hegaga madia.Haa binu loo lu ludi ba nuni mu fwunu? ²⁷ Naa mukadi ga binu wu fani gi lumbu gi moshi mu djingu lwoondi mbi bu gashi mabanza gwedi ndi? ²⁸ Mudiambu di kii binu lu sagaga mabnza ma binu mu miledi?Dalani bi tundu bina biedi mu tsegi kii pila bi gulaga:loo bihangaga,loo bi di dungilaga kega miledi. ²⁹ Haa yi ba lu lela mbi:shi ndi beeni Salomo mu lu gumu lwandi lwootsu lu gi fwumu,loo ga vadi miledi mi pimbu nga bitundu wu moshi mukadi ga bi tundu bii. ³⁰ Kasa djina diedi lelu mu tsegi,haa dji ba gesa mbatshi mu gu dji masa gu mbaa,Gahungu wu dji vadisaga buna,bwoona,mbi ga vadisagagi kasa djina,haa loo ga lu vadisa gu guluda gu vula?Aa lugwigilu lu binu lwedi lu kunda shela! ³¹ Loo gu dalani pashi mu gu yufulaga mbi:"kii du ba dia?",''kii du ba nwaa?'',''kii du ba vada?" ³² Ba mipani ba ndingaga bima bina biootsu dangu djiootsu.Haa binu,dada wu binu wuna weedi gu yilu wu yabi mbii loo lweedi fwunu yi bima bina biootsu. ³³ Haa landani kaga mu gu dinga gi fwumu giandi ye mapandi mana ma ga zolagagi,bwoona ga lu yiga bima bina biootsu. ³⁴ Bwoona,loo gu dalani pashi mudiambu ye mapandi mana ma ba gwitsa mbashi;gilumbu gi mbatshi gi gala ye pashi di gia beeni dji gu fwana.Gosu gi lumbu gi dunedilaga pashi,loo gwedi fwunu mu gu du yiga pashi djiega.