¹ Dangu di muhunga wu Gahungu ga needi Yesu mu manu ma maganga mudiambu ga mu meega. ² Dangu di Yesu ga hangi magumi maya ma piba ye ma mwiini,gu gonda madia,nzala yi gami. ³ Sadana gitshi gwedi Yesu ga mu ledi mbi:"mbi weedi mwaana wu Gahungu,yagula gwedi madadi maa ma guma mapaa.'' ⁴ Haa Yesu ga yagudi mbi:"muudu loo ga djingaga kaga mudiambu ye mapaa ma ga diagaga,haa ga djingagagi mudiambu ye mapandi mana ma yagulagagi Gahungu.'' ⁵ Dangu di Sadana ga needi Yesu gu yelusalemi,bula di ba santu,ga mushi ye londi di yangi di nzu yi bisambu yi ba yuuda, ⁶ mwaana wandi mbi:"mbi weedi mwaana wu Gahungu,di lumba yatshi,mudiambu ba sonigi mu muganda wu Gahungu mbi:"Gahungu ga lela ba wandjio bandi mbi kii ba hanga mudiambu ye ndji ba guneda gu mioogu mi baa,bwoona gulu diagu loo dibudila mu madadi.'' ⁷ Yesu ga mu ledi mbi:"ba sonigi kega mu muganda wu Gahungu mbi.''Loo gu meega fwumu Gahungu.'' ⁸ Bwoona sadana ganedi Yesu ye londi di mundonda wu leya shela,ga mu ledi mbi bifwumu biootsu bi londi di manu ye lugumu lu biaa. ⁹ Sadana ga yagudi mbi:"bi biootsu bi wu badala,yi guhega biaa mbi bu wu fugamani mudiambu ye gu sambila.'' ¹⁰ Yesu ga vududi mbi:"gaduga,sadana!mudiambu ba sonigi mu muganda wu Gahungu mbi:''wu fani samba fwumu Gahungu woogu,kaga ndi buna wu fani sambila.'''' ¹¹ Dangu di,ga mu lendigi;ba wandjio bitshi moniga,ba yandigi guhangila Yesu. ¹² Yesu ga yugi mbi bashi Yowani mudangu mbada,gendi mu manu ma gadileya. ¹³ Haa loo ga gadi ngolu ye bula di Nazaledi,haa gendi ndjinga gu bula di gapediwumu,bula di moshi mu mbimba di yanga di gadileya,mu manu ma Zabuloni ye Nefetadi. ¹⁴ Mapandi mana ma bwii mudiambu di gi gulungisa mapandi mana mambigudi Ezaya ma ga yagudi mbi: ¹⁵ ''Ndi Zabuloni,ndi Nefetadi,manu mu ndambu yi mwetshi wu neeni,gu shimu yanga di Yuludani,ndi Gadileya,manu ma baadu bana ba gondi ba yuuda! ¹⁶ Baadu bana ba ndjingaga mu piba mwiini wu ngolu!Mwiini wuna ga moniga gwedi baadu bana ba ndjingaga mu gifudi ye gi lufwaa!" ¹⁷ Gaduga dangu di,Yesu ga yandigi gu longa mbi:"balumunani mbundu mudiambu gi fwumu gi Gahungu gi pena-pena.'' ¹⁸ Dangu di ga gadi muni lunda mu mbimba di yanga di gadileya,ga dadi ba pangi boodi{Shimoni wuna wu ba lendiga piela}ye Andele,mugegi wu Shimoni.Ba lumbagi mbwanda mu mwetshi,mudiambu ba gadi mu gisalu gi guloba ba mbitshi. ¹⁹ Yesu ga ba ledi mbi:"yi zani,lu ndanda yi lu longa pila yi guloba baadu.'' ²⁰ Ba yambudi ma mbwandu ma baa tsalu,bwoona ba mu landi. ²¹ Dangu di gendi ga gidamina gadadi ba pangi boodi kega,Yagobu ye Yowano baana ba Zebede ba gadi mu bwaadu ye dada wu baa;ba gadi muni yidiga mabwandu ma baa.Yesu ga ba lendigi, ²² ba shshi bwaadu ye dada wu baa tswalu,bwoona ba landi Yesu. ²³ Yesu ga gadi muni gwenda luda mu gi fudi giootsu gi gadileya;ga gadi muni gwenda longa baadu gu ndambu yina mu ma nzu ma baa ma bisambu,ga gadi muni gwenda ba lela tsangu dji pimbu mudiambu ye gi fwumu gi Gahungu,ga gadi muni gwenda gindisa baadu bana ba gadi ye makashi ye ma pashi ma pila ye pila. ²⁴ Tsangu djiandi di pasagani mu gi dini gi manu ma Sidiya.ya yena ba gadi muni mu nedila baadu bana bootsu ba gadi ye makashi ma pila ye pila,baadu bana ba gadi ye mihunga mimbii,ba gadi ye makashi ma gugona,ye bigada,Yesu ga ba gindishi ba bootsu. ²⁵ Baadu ba vula ba mulandi:ba dugi mu manu ma Gadileya ye mu mabula guumi ye gu bula di yoludani ye gu yudeya,ye gu shimu di yanga di yoludani.