¹ Mu musuga-musuga,ba mbuda bootsu ba dibundu ye ba mbuda bootsu ba bayuuda ba wanagani mudiambu di gu dinga pila yi gu zuwa Yesu. ² Ba mu gami ba mu gangi mi yololu,bwoona ba mu hani gu mioogu mi guvedinedi Pilatu. ³ Dangu yudashi,wuna wu deegi Yesu,di gadi mbi ba geshidi Yesu mbi ga fani fwaa,ga dadi kenda dji vula,bwoona ga vududi mbongu djina dji ndondu,ndondu magumi madadu,gwedi ba mbuda ba dibundu ye ba mbuda beega ba bayuuda, ⁴ mbi:"yi hangi masumu mu gu deega muudu wuna wu gondi hanga mbii mudiambu ba muzuwa!''Haa ba mu vududi mbi:''mapandi mana ma dudadi pidu?loo amana meedi mapandi magu ndi beeni!'' ⁵ Yuudashi ga matshi mbongu mu gihani gi tshigu gi nzu yi bisambu,bwoona ga ba yambudidi.Dangu di,gendi gu di ganga mushinga ye koda ga fwii. ⁶ Ba mbuda ba di bundu ba bongi mbongu djieeni,bwoona ba yagudi mbi:"matshigu ma pidu loo ma duhegi tswaa mu gusaa dji mukeshi di nzu yi bisambu,mudiambu muudu wu bongi mbongu dji ga sendi mudiambu di lu fwaa lu muudu weega.'' ⁷ Dangu di wanagani gu hwii mbongu djina basumbi dambu yi manu yi muudu wu moshi wu hangaga ma nzungu,mudiambu ma gala madjiamu ma ba nzenji. ⁸ Bwoona ndambu yi manu yina ba yi lendigagagi tii leludi mbi:"manu ma mengi''. ⁹ Bwoobuna mapandi ma yagudi mbigudi Jeremi mi tshi lunga,mbi:"ba sendi mbongu djina dji ndondu maguumi madadu{gwedi talu yina yi baadu ba Yizalayedi yi ba geshi mu gufuda mudiambu ye ndji}, ¹⁰ bwoona mu mbongu djina ba sumbi sambu yi manu yi muudu wu moshi wu hangaga manzungu,pila yi ndedi fwumu Gahungu.'' ¹¹ Yesu gitshi manana ye twala yi pilatu,bwoona guvedinedi ga mu yufudi mbi:"weedi todila wu ba yuuda?''Yesu ga vududi mbi:"wu yagudi pimbu." ¹² Bwoona dangu ba mbuda badibundu ye ba mbuda beega ba mu funda,loo ga vududi shi gima gi moshi. ¹³ Dangu di piladu ga yufudi mbi:"loo wu ba yuga mapandi mana mootsu ma ba bagu gufunda?" ¹⁴ haa Yesu loo ga vududi shi gima;bwoona guvedinedi ga yidugi penza. ¹⁵ Dala,mu gosu kindji yi pagi guvedinedi ga galaga ye gi kalulu di gudushila ba yuuda muudu wu moshi mudangumbada wuna wu ba dinga. ¹⁶ Mu dangu dina gu gadi ye muudu wu moshi mudangumbada wu yabagani pimbu-pimbu,djina diandi Yesu Barabase. ¹⁷ Bwoona dangu di wagani gu hwii piladu ga ba yufudi mbi:"naa mukadi ga baadu ba lu zodi mbi yi lu yambu dila?Barabas mbi loo Yesu wuna wu balendigaga mbi Kidishidu?'' ¹⁸ Mudiambu bu ba yabi mbi ba hani Yesu gu mioogu miandi mu musogi. ¹⁹ Dangu piladu ga gadi muni sambisa Yesu mu tribinadi,mukedu piladu ga mu dumishi mu ganda mbi:"loo gu goda mu mapandi ma muudu wuna wu gondi hanga mbii,mudiambu mu piba yii yidadi pashi dji vula gundoshi mudiambu ye ndi.'' ²⁰ Ba mbuda ba dibumbu ye ba mbuda beega ba bendi baadu mu gu dinga piladu mbi ga ba yambudila barabase,haa ga zuwa Yesu. ²¹ Haa guvedinedi ga yufydi mbi:"naa mu kadi ga baadu baa ba baboodi lu zodi mbi yi lu yambudila?"ba mbi:"Barabase.'' ²² Piladu ga bayufudi mbi:"haa Yesu wuu wu ba lendigaga Kidishidu,lu zodi mbi yi mu hanga kii?"Ba bootsu mbi:"mu sani ye kulundji!" ²³ Haa piladu mbi:"kii mapandi mbi ma gahangi?''Bwoona ba yandigi gu yagula ngolu mbi:"musaa ye kulundji!" ²⁴ Piladu gadadi mbi ga ba bayufula kaga pamba,mudiambu ba gadi mu gu hanga kaga matata keega ma gu luda.bwoona ga sendi mwetshi,ga yobishi mioogu miandi gu misu ma baadu ba gadi yena,bwoona ga yagudi mbi:"lufwaa lu muuudu wuu loo lwedi gu mioogu miami,meedi mapandi ma binu!'' ²⁵ Baadu bootsu vududi gwedi ndi mbi:"meengi mandedi ma bwaa ye londi mudu wu pidu ye baana ba pidu!'' ²⁶ Dangu di,piladu ga ba yambudidi Barabase;ga ledi baadu bandi mu gu buula Yesu fwimbu,bwoona ga muhani gu mioogu mi ba pumbulu mudiambu ba musaa ye londi di kulunji ga fwaa. ²⁷ Dangu di,pa pumbulu ba guvedinedi piladu ba needi Yesu mu kadi ga nzu yi guvedinedi,bwoona ba lendigi ba pumbulu beega,ba bootsu bitshi yula fwinama ye Yesu. ²⁸ Ba mu gadudi miledi,bwoona ba muvwadishi lobu di benga. ²⁹ Ba dungi puu yi ngangu nga puu yi gi fwumu,ba mu vwaditshi mu mudu,bwoona ba mu shi ga mudi gu gogu diandi di gi dada.Dangu di ba fugamani gu milu miandendi,ba museyi mbi:"mbodi,fwumu wu ba yuuda!'' ³⁰ Ba mulogudidi meedi,ba sendi ga mudi gana,ba mu budi ye londi di mudu. ³¹ Dangu di ma museyi gu hwii,ba mu gadudi lobu dina ba mu vwadishi miledi miandendi ndibeeni.Bwoona ba muneedi mudiambu di gwenda gu mu saa ye londi di kulundji. ³² Dangu di benda,ba wanagani ye muudu wu moshi di bula di Sirene,djina diandi Shimoni,ba mu ledi mu gu needa kulundji wu Yesu. ³³ Bitshi guma mu gihani gi moshi gi ba lendigaga Gologoda,disongidila mbi:"gihani gi gifwa gi mudu." ³⁴ Bahegi Yesu vinu di bafugishi ye mwetshi wu bululu.Haa dangu di gada meegi,gaduni mu gu dinwaa. ³⁵ Dangu di,ba mushi ye londi di kulundji mudiambu ba muzuwa.Ba budidi miledi miandendi bwaadi mudiambu ba gabisa mu kadi ga baa. ³⁶ Bwoona ba gadi,ba yandigi gu mu danina. ³⁷ Yebaya di londi di mudu wu Yesu ba ledi gi shina gi mapandi ma ba zuwidi:"ndji wuuwu Yesu,todila wu ba yuuda.'' ³⁸ Dangu di,ba shi ba bandi boodi mu ba gulundji mu ma kulundji gihani gi moshi ye Yesu,wu moshi gu ndambu di gogu diandi di gi dada weega gu ndambu di gogu di gingudi. ³⁹ Baadu ba luda yena,ba yandigi gu nigisa midu mi baa ye gu mu sawula ⁴⁰ mbi:"ndji muudu wu yagula mbi wu zuwa nzu yi Gahungu,bwoona wu yi dunga kega mu bilumbu bidadu!Hulusa mooni woogu mbi ndji weedi mwaana wu Gahungu,gaduga ye kulundji yi zaa duluga!'' ⁴¹ Ba mbuda ba banganga ba Gahungu,ba longi ba tshigu ye ba mbuda beega,ba yandigi gu mu seya kega mbi: ⁴² ''ga gulusagi baadu beega,haa loo ga fani gu di gulusa!Haa mbi geedi todila wu yizalayedi ga gaduga dangu di ye londi di kulundji,bwoobuna pidu nga du mu gumbula. ⁴³ Ga shi mbundu gwedi Gahungu,''ga yagudi kega mbi geedi mwaana wu Gahungu.Bwoona,Gahungu ga mu gulusa dangu di mbi ga mu zolaga!''' ⁴⁴ Shi ba bandi bana ba bashi ye londi di kulundji pena-pena ye Yesu,ba kega bu bamusawulagi gi desu gi moshi. ⁴⁵ Mu dangu di miidi,piba yi bwii mu gifudi gina giootsu tii mu matrwazere(15h')di mashiga. ⁴⁶ Mu matrwazere ma mashiga Yesu ga yagudi mundaga yi ngolu mbi:"Edi,Edi,lema sabakatani?"disongidila mbi:Gahungu wami,Gahungu wami,mudiambu ye kii wu zambudi mi beeni?" ⁴⁷ Baadu beega ba gadi yena,dangu di ba yugi mapandi mana,ba yagudi mbi:"muudu wuu ga ba lendiga Ediya!" ⁴⁸ Tswalu,muudu wu moshi ye kadi ga baa gendi tiinu,mudiambu ga senda ginigu,ga gishi mu vinu di bululu,ga digangi mu mudi wu moshi wu leeya,bwoona ga meegi gu saa Yesu gu ganu mudiambu ga nwaa. ⁴⁹ Haa baadu beega mbi:"du dala mbi Ediya gitsagi gu mugulusa!'' ⁵⁰ Haa Yesu gashi kega ndaga yi ngolu,bwoona ga fwii. ⁵¹ Dangu di,muledi wu yembelu wuna wu gabisagagi gihani gi tshigu ye gihani gi guluda tshigu mukadi ga nzu yi bisambu yi ba yuuda ga bagugi ye kadi-kadi,ga duga gu tuu tii gu mashina.Manu ma nigagani,madadi ma hesugi, ⁵² madjiamu ma gangugi,bwoona baadu bavula ba Gahungu,bana ba fwii,ba shamugi. ⁵³ Badugi mu madjiamu;bwoona dangu Yesu di ga niamugi mu lu fwaa,ba godi gu bula disantu.Baadu ba vula ba badadi guna. ⁵⁴ Fwumu wun ba pumbulu ye ba pumbulu bandi bana ba dala Yesu,dangu di badadi manu muni nigana ye mapandi mootsu mabwa,ba yugi booma penza,bwoona ba yagudi mbi:"mukiediga,muudu wuu ga gadi mwaana wu Gahungu!'' ⁵⁵ Ba kedu bavula ba gadi guna ba gadi ba manani gu leeya,muni dala.Ba kedu bana ba gadugi mu manu ma gadileya;ba gadi muni landa Yesu mudiambu di gu mu sadisa. ⁵⁶ Mu kadi ga baa gu gadi ye Madiya wu bula di magadala;Madiya,ngudi wu Yagobu ye wu Yisefu;ye ngudi wu baana ba Zebedeyo. ⁵⁷ Mu mashiga ma mana kaga,gungoyi,mvwama wu moshi wu bula di Adimateya gitshi guma,ndjina diandi Yizefu;ndi kega ga gadi mu longogi wu Yesu. ⁵⁸ Gendi dinga mvwumbi yi Yesu gwedi Piladu.Bwoona Piladu ga hani tswaa mbi ba hana mvwumbi gwedi Yizefu. ⁵⁹ Dangu di,Yizefu gasendi mvwumbi yina,ga yigangi mu muledi wu mpaa, ⁶⁰ bwoona gendi gu yisaa mu mandjiamu ma mpaa ma gashimi mudiambu ye ndi beeni mudadi dina di gadi nga mu ga mundonda.Ga pushi dadi di moshi di neeni,ga gangi gu giafulu yi madjiamu,bwoona gendi gwandi. ⁶¹ Madiya wu magadala ye Madiya wuna weega kega,ba gasdi gwooguna,ba hwemini muni dala madjiamu. ⁶² Mu gilandi(disonhidila mbi gi lumbu gi guhululuga,gi lumbu gina gi landi gidanu),ba mbuda ba nganga ba Gahungu ye bafadishi bendi wanagana mu nzu yi Piladu. ⁶³ Ba mu ledi mbi:"fwumu,du yibugi mbi,muudu wuu wu bupala dangu di ga gadi ye mooni,ga yagulagi mbi:'Gahungu ga nioamugisa mulufwaa gu ngoyi bilumbu bidadu.' ⁶⁴ Bwoona dumisa baadu mu gwenda mudanina mu madjiamu tii mu gilumbu gidadu.Bwoobuna,balongogi bandi loo ba fani gwenda mugadula mudiambu ba yagula mbi:'Gahungu wu mu niamugishi mu lufwaa.'Bupala buu bu tsuga bu fani luuda bu teegu mu mbii.'' ⁶⁵ Piladu ga yagudi mbi:"sendani ba pumbulu,ndani lwenda lu danina madjiamu pimbu-pimbu pila yi lu fani hanga.'' ⁶⁶ Bu bendi,ba hangi bwoobuna:ba gangi dadi,ba shi-shi ba pumbulu mu gu danina madjiamu.