¹ Dangu Yesu di ga longi mapandi mana mootsu gu hwii,ga ledi ba longogi bandi mbi: ² "Yabagani mbi bilumbu bioodi bisadi mu gu guma mu kindji yi pagi,bwoona ba hana mwaana muudu gu mioogu mi ba mbeeni bandi mudiambu ba mu saa ye londi di kulundji,ga fwaa. ³ Dangu di,ba mbuda ba nganga ba Gahungu ye bambuda beega ba bayuuda bendi wa nagana mu nzu Kayifa,fwumu ba nganga ba Gahungu. ⁴ Ba wagani mbi:"du gamagi Yesu mu gi tswegi mudiambu ye gu mu zuwa. ⁵ Haa loo du fani mu gama mu bilumbu bi kindji,''mbi loo baadu bootsu bu bamana dombuga.'' ⁶ Dangu Yesu di ga gadi gu bula di bedani mu nzu yi Shimoni wuna wu belagi gi kashi gi kungudi, ⁷ mukedu wu moshi gitshi pena-pena ye Yesu.Ga gadi ye mulangi wu moshi wu ba hangi ye dadi wu ba lendigi Aldida;mulangi weeni ga gadi wu hwaa yula ye madiashi mataalu ma vula.Dangu Yesu di ga gadi ye meesa,mukedu weeni ga shi madiashi ye londi di mudu wu Yesu. ⁸ Dangu ba longogi ba Yesu di badadi pandi yina,ba yugi kabu mbi:"kii fwunu yi gu yioniga madiashi maa buna? ⁹ Ba kanda madega mu talu yi vula,bwoona mbongu djina ba kanda ndji hana gwedi ba tsugami!'' ¹⁰ Haa Yesu bu ga yabi mapandi mana ma ba yagula; bwoona ga ba yufudi mbi:"mudiambu di kii lu ba yangisa mukedu wuu?Wu pangi pandi yi pimbu. ¹¹ Ba tsugami ba gala ye binu dangu diootsu,haa loo yi balagala dangu diootsu ye binu. ¹² Wu yidigi madiashi mu ludu lwoomi mudiambu ye gu yidiga gi lumbu ba bala ma ndjiga. ¹³ Yi ba lu lela pandi yi kiediga:gosu gi hani ye londi di manu ba bala yabigisa pandi yi pimbu,ba bala yagula pandi yi mukedu wuu ma ga hangi mudiambu ye gu mu yindula.'' ¹⁴ Dangu di,mu longogi wu moshi mu kadi ga balongogi guumi ye boodi,dona wu balendigagi Yuudashi iskadiyote,gendi yufula ba mbuda ba banganga ba Gahungu ¹⁵ mbi:''kii lu pegagi mbi bu yi luhegi Yesu?"Bwoona ba dangi mbongu,ndondu ma gumi madadu,ba mu hegi. ¹⁶ Yandi ga dangu dina,Yuudashi gadingagi dangu di pimbu yi guhana Yesu gu mioogu mi baa. ¹⁷ Mu gilumbu gi teegu gi kindji gi mapaa mana gondi mwemu,balongogi bitshi yufula Yesu mbi:"guni wu zodi dwenda du gu yidigila madia ma kindji wu pagi?'' ¹⁸ Ndi mbi:"ndani gu bula di Yelusalemi,mu nzu yi muudu wu moshi,bwoona lu mu lela mbi:"longi wu yagudi,mbi:"dangu diandi di lungi.Ga ba gwitsa ye ba longogi bandi mu gwitsa daa kindji yi pagi.""' ¹⁹ Ba longogi bendi hanga pila yi ba ledi Yesu:ba yidigi madia ma pagi. ²⁰ Dangu di bwii piba,Yesu ga gadi ye ba longogi bandi guumi ye boodi muni dia. ²¹ Dangu di ba gadi muni dia,Yesu ga yagudi mbi:"yi ba lu lela pandi yi mu kiediga:muudu wu moshi mu kadi ga binu ga teega.'' ²² Ba longogi bandi ba dadi kenda dji vula,bwoona ba yandigi gu mu yufula wu moshi wu moshi mbi:"fwumu,gwedi mii?" ²³ Yesu mbi:"muudu ndona wu shi mapaa longa di moshi ye mii,muudu ndi wuna wu teegagi. ²⁴ Mwaana muudu ga fwaa,nga bu ba sonigi mudiambu ye ndi mu muganda wu Gahungu,haa kenda gwedi muudu wuna wu ba mudega!Gu ludi pimbu mbi muudu wuna loo ba mubudi!'' ²⁵ Yudashi,wuna wu deega Yesu,ga yufudi Yesu mbi:"longi,gwedi mii?"Yesu mbi :"ndji beeni wu yagudi mbi gwedi ndji. ²⁶ Dangu di ba gadi muni dia,Yesu ga sendi mapaa;ga hegi Gahungu,ga mageshi mu bidini-bidini,ga hegi balongogi bandi,bwoona ga yagudi mbi:"sendani mapaa maa,lu ma dia;meedi ludu lwami.'' ²⁷ Bwoona ga sendi goba di vinu;gahani madonda gwedi Gahungu,bwoona ga bahegi mbi:"nwani,binu bootsu. ²⁸ Mudiambu maa meedi meengi mami mana ma ba lela ngwagana yi Gahungu bu gawagani ye baadu.Meengi maa madiagugi mudiambu ye baadu ba vula ba masumu,mudiambu Gahungu ga ba lolula. ²⁹ Yi ba lu lela:yandiga dangu di,loo yi kega vinu di tii mugilumbu gina gi yi nwaa vinu di mapaa ye binu mu gi fwumu gi dada wami.'' ³⁰ Dangu di ba yimbi mi gunga mikindji gu hwii,beendi gu mindonda mi miidi mi Olive. ³¹ Dangu di,Yesu ga ledi balongogi bandi mbi:"mupiba yayiyi kaga lu tshisa binu bootsu,mudiambu ba sonigi mu kuganda wu Gahungu mbi:"bu yi zuwa ngungudi wu mamema,haa mamema mandi bu ma pasagana.' ³² Haa dangu Gahungu di gatshamugisa mu lufwaa,bu yi gwenda gu misu mabinu gu bula di Gadileya.'' ³³ Haa Piela ga yagudi mbi:"shi baadu beega ba bootsu ba gu shi-shi,haa loo yi gushisa shi gadigii.'' ³⁴ Yesu mbi:"yi ba gulela mapandi makiediga:mu piba yayiyi kaga,dangu di gondi kogu,wu tuuna mbala djidadu mbi loo wu nzabi.'' ³⁵ Piela mbi:"shi gu fwaa bu yi fwaa ye ndji gihani gi moshi,loo yi duna shi gandambu mbi loo yi gu yabi!''Bwoona balongogi bootsu kega ba yagudi kaga pila yi moshi. ³⁶ Dangu di,Yesu ye balongogi bandi bitshi guma ye gihani gi moshi yi balendigaga jestemani,bwoona Yesu ga baledi mbi:"galani yaa,yendi gwoona mu gusambila Gahungu.'' ³⁷ Ga sendi Piela ye baana bana boodi ba Zedeyo;bendi ndjila yi moshi yendi.Yesu ga yandigi gu yuga kenda,mbundu yandi kega yi yandigi gu buula ngolu. ³⁸ Dangu di,ga baledi mbi:"mbundu yi yudi ye kenda;yi bazola fwaa.Salani yaa;loo gu nimbani,mudiambu mi kega loo yi nimbani. ³⁹ Ga pusani gu misu gandambu,gafugamani mbunzu yatshi,bwoona ga yandigi gu sambila Gahungu mbi:"dada wami,mbi bu zodi kadula mu pashi dji.Haa loo gu landa luzolu lwami,haa lwoogu.'' ⁴⁰ Dangu di,Yesu gitshi vuduga,gadadi balongogi bana badadu banimbi gilu,bwoona ga yufudi piela mbi:"loo lu fani gala ba hwaa niamuga shi dangu di moshi ye mi? ⁴¹ Loo gu nimbani.Sambilagani Gahungu mudiambu lu konda bwaa mu dangu di dipashi.Lwedi ye luzolu gu mbundu,haa luudu lu binu lwedi ye bumolu. ⁴² Yesu gendi kega mumbala yi djioodi mu gu sambila mbi:''dada wami mbi loo yi fani gaduga mu pashi dji,luzolu lwoogu lu hangamana kaga.'' ⁴³ Gitshi vuduga kega;ga badadi muni nimba kega,mudiambu gilu bu yibaludagani. ⁴⁴ Ga ba shi-shi,gendi kega ga dambu,ga sambidi Gahungu mbala dji dadu pila yi moshi. ⁴⁵ Dangu di,ga vudugi kega gwedi ba longogi bandi,ga ba yufudi mbi:"buni,binu lunimbi kaga?Dala,dangu kega di lungi;g sadi ga ndambu ba bahana mwaana muudu gu mioogu mi baadu ba masumu. ⁴⁶ Niamugani,twendani!Dala,muudu wuna wu teegi ndoo wu gumi pena-pena!" ⁴⁷ Mu dangu diadina kaga Yesu ga gadi muni yagula,mulongogi wu moshi mu kadi ga balongogi guumi ye boodi,djina diandi Yudashi,gitshi guma ye baadu ba vula.Ba gadi ye mambedi ye miidi gu mioogu.Ba mbuda nganga ba Gahungu ye ba mbuda beega ba bayuuda,baa badumi baadu bana. ⁴⁸ Yudashi wuna wu deegi Yesu ga ledi baadu beeni mbi:''muudu wuna wu yi hega beshi,ndji wuna wu lugama.lumugama!'' ⁴⁹ Dangu di tshi guma yudashi,Gapusani pena-pena ye Yesu,bwoona ga mu ledi mbi:"mbodi,longi!"dangu di gahegi Yesu beshi. ⁵⁰ Yesu ga muledi mbi:''ndugu wami,hanga mapandi mana maa wu yitshi hanga!"Dangu di,baadu bana bitshi ye yudashi ba pusani pena-pena Yesu,bwoona ba mugami. ⁵¹ Muudu wu moshi mu kadi ga baadu bana ga gadi ye Yesu,ga dushi mbedi yandi,ga geshi tsu yi muhiga wu mfwumu wu banganga Gahungu. ⁵² Yesu ga mu ledi mbi:"vudula mbedi yagu ye gihani gi ya,mudiambu baadu bana bootsu ba hangila mbedi ba fwaa kegagu mbedi. ⁵³ Loo wu yabi mbi,mbi yi zoodi,yi fani dinga lusadisu gwedi Dada wami,bwoona ga fani tumisa tswalu ndonga gumi ye djioodi ba wandjio? ⁵⁴ Haa mbi bwi yi hangi bwoona,kii pila mapandi mana ma basonigi mu mukanda wu Gahungu ma gwitsa lungisama,mudiambu gu ba yagula mbi gu fani gala pila ya yina?'' ⁵⁵ Dangu di Yesu gayufudi baadu bana ba gadi yena mbi:"binu lu yitshi ye mambedi ye miidi mudiambu di gu kama nga mwibi?Gosu gilumbu yi gadi yi hwemini mu nzu yi Gahungu mudiambu ye gu longa,haa loo gu binu lu kami. ⁵⁶ Haa mapandi maa mootsu ma bwii mudiambu ye gu lungisa mapandi mana ma sonigi ba mbigudi mu miganda mi Gahungu.''Dangu di,balongogi bandi bootsu ba mushishi,ba dini. ⁵⁷ Baadu bana ba gami Yesu ba mu needi gu nzu yi Kayifa,fwumu wu banganga Gahungu.Balongi ba tshigu ye ba mbuda ba gadi ba wanagani gwooguna. ⁵⁸ Piela ga gadi gu leeya gu ngoyi,muni gwelanda Yesu tii mu lupangu lu fwumu wu banganga Gahungu.Dangu Piela di gagodi mu gadi ga lupangu gu hwii,gendi yi muga gi hani gi moshi ye ba pumbulu ba fwumu wuna mudiambu mu gu dala mbi kii mutindu mapandi ma Yesu ma ba tsuga. ⁵⁹ Ba mbuda nganga ba Gahungu ye baadu bootsu ba gadi mu gi mvuga gi neeni gi ba yudashi ba dingagi mapandi ma bupala ma gu fundila Yesu,mudiambu ba muzuwa. ⁶⁰ Haa loo badadi shi pandi yi moshi,shi baadu bavula bitshi funda Yesu mu mapandi ma ma bupala.Mu gumanisa baadu bootsu bitshi ⁶¹ ba yagudi mbi:"muudu wuu ga yagudi mbi:'yi fani zuwa nzu yi Gahungu,bwoona,mu bilumbu bidadu,yi dungi kega.''' ⁶² Fwumu banganga Gahungu ga niamugi,bwoona ga yufudi Yesu mbi:"haa loo wu ba shi mvudu?mudiambu di kii baadu baa bagu gu funda?" ⁶³ Haa Yesu ga gadi gwandi pwedee.Bwoona fwumu wu ba nganga Gahungu ga muledi mbi:"mu djina di gahungu wu mooni,yi ba gu gulela mu gu Gahungu mbi gu mukiediga weedi meshiya,mwaana wu Gahungu.'' ⁶⁴ Yesu ga mu ledi mbi:"wu yagudi pimbu.Haa yi ba gu gulela:"yandiga dangu di,ludala mwaana muudu wu shi mugi wu googu di gibagala di Gahungu,bu lu mudala muni gwitsa ye londi di maduda.'' ⁶⁵ Dangu di,fwumu wu ba nganga Gahungu ga bagi miledi miandi,bwoona ga yagudi mbi:"wu vwendji Gahungu!Kii fwunu yi gudinga kega batemwe? ⁶⁶ Luyugi shi dangu di pila yi ga vwendji Gahungu! Lu bayaba kii?''Ba mbi:''ga fani fwaa.'' ⁶⁷ Dangu di,ba mulogudidi meedi,ba mubudi ma komi.Baadu beega ba mubudi mambada, ⁶⁸ bwoona ba yagudi mbi:"Meshiya dulela mbi naa wu gubudi?" ⁶⁹ Pila ga gadi wu shimugi ye ndjila mu kadi ga lupangu.Mwaana mu kedu wu moshi wuna wu gadi muudu wu gisalu wu fwumu wu ba nganga Gahungu gitshi lela Piel;a mbi:"shi ndji kega,wu gadi ye Yesu,muudu wu gifudi gi Gadileya.'' ⁷⁰ Haa bu gaduni mapandi mana mootsu ye misu ma baadu bootsu mbi:"loo yi ba yaba mapandi mana ma wu ba yagula.'' ⁷¹ Dangu piela di gadugi ye ndjila di lupangu,mwaana mukedu weega wuna wu gadi muhiga wu fwumu ba nganga Gahungu ga mudadi,bwoona ga ledi baadu bana ba gadi guna mbi:"muudu wuu kega ga gadi ye yesu,muudu wu Nazeledi.'' ⁷² Bwoona Piela ga duni kega mbi:''yi ba gesa Gahungu mbi loo yi muyabi muudu wuu.'' ⁷³ Loo mbi tunda ngolu,baadu bana ba gadi bitshi lela Piela mbi:"gu mukiediga ndji kega,wu gadi ye baa.Du gu yabi mundaga yagu!" ⁷⁴ Dangu di Piela ga yandigi gu yagula mbi:''Gahungu ga tshinza mbi yi bayagula bupala!Yi ba gesa Gahungu mbi loo yi yabi muudu wuu!''Kaga mudangu diadina,kogu ga gogudi. ⁷⁵ Bwoona Piela ga yindudi mapandi mana ma muledi Yesu mbi:''gu gala kogu wu gonda gogula,wu tuna mbala dji dadu mbi loo wu nzabi.''Piela ga dugi ye ndjila,bwoona ga didi ngolu.