¹ Gifwumu gi Gahungu gi fanagani nga muudu wuna wu gadi ye ngundu yi vinu wu dugi mu musuga-musuga gendi dinga baadu mu gwenda mu hangila gi salu yi ngundu. ² Gu ngoyi bawagani mbi ga fani gu ba fuda gosu gilumbu ndindu lu moshi lu moshi,di ga ba dumi mu gu hanga. ³ Mu dangu di dadu di musuga ga dugi keega,gendi ye zandu ga dadi baadu ba niamugi loo ba gadi ye gisalu. ⁴ Ga ba ledi mbi:''binu keega yizani luhanga gisalu gi ngundu yi vinu biootsu bina biedi pimbu bu yi lu heega.''Baadu bana bendi hanga. ⁵ Ga dugi keega mu dangu di sambanu ye mudangu yi gimvwa ye ga hangi nga bu ga hangi teegu. ⁶ Mu mbala yega keega gu gadi dangu di guumi ye gimoshi di mashiga ga dugi gu zandu ga dadi keega baadu ba hwemini gu baa,ga ba ledi mbi:"kii lu hweminini yaa,lu ba gonda hanga gi salu gi lumbu gi muhundu?" ⁷ Ba yagudi mbi:"mudiambu loo gu du boongi shi muudu mu gisalu.''Ga ba ledi mbi:"binu yi zani hanga gisalu mu ngundu yami yi vinu.'' ⁸ Dangu di bwi piba,mweni ngudu ga lendigi gapida gandi ga mu ledi mbi:''balendiga baadu bana wu ba fuda mbongu dji baa,teegu wu fuda bana bitshi gu ngoyi ha nga wu fuda bana bitshi gu misu.'' ⁹ Ba sadi bana ba yandigi gisalu mu musuga ba bongi lu ndondu lu moshi nga bana bitshi gu ngoyi,ha ba yaba mbi ba djivula ba bongi gi desu gi moshi ye bana bitshi gu ngoyi. ¹⁰ Baadu bitshi mu musuga ba yandigi guboguda muna mu lela mbi:"buni du fani bonga pidu ba bootsu gi desu gi moshi. ¹¹ Gu ngoyi yi gu senda mabuguda ma baadu bana. ¹² Ba sadi ba mu ledi mbi:"baadu ba wu bongi gu ngoyi wu ba fudi gi geledi ye pidu,du niogugi yandiga musuga ye mwini.'' ¹³ Ha fwumu wu mangundu ga vududi gwedi musadi wu moshi mu kadi ga baa mbi:"ndugu,loo yi gu hangi mbii.Loo du yugani ye dji mbi wu fani hanga gisalu gilumbu moshi mudiambu ye lundondu lu moshi? ¹⁴ Bonga mbongu djiagu,ndagwoogu gu nzu yaagu.Yi zodi gu hega baadu bitshi gu ngoyi yi binu nga binu ba yibongi gu misu. ¹⁵ Loo yedi yeswaa mu gu hanga gosu gina mu mbongu djiami mi beeni?Mbi loo weedi ye gigedemi bu yi hangi ma pimbu? ¹⁶ Diadina baadu ba tsuga ba gala ba teegu,ba teegu ba guma ba tsuga.Miganda mipimbu mina mi teegu mi beebishi:"baadu bavula ba balendigi,haa ndambu basolugi.'' ¹⁷ Dangu di gadi Yesu muna dombuga gu Yelusalemi,ga needi ba tumwa guumi ye boodi,mundjila ga ba ledi mbi: ¹⁸ "Dalani,dwedi mu gu dombuga gu Yelusalemi ye mwaana muudu bu bamudega gwedi ba nganga ba Gahungu,balongi ba tshigu ye gwedi basonigi ba miganda.Ba mugeshila nkanu mbi ga fani fwaa ¹⁹ ye ba mu deegi gwedi baadu bana ba gondi gwigila mudiambu ba mu seeya,ba mu bula miswamba,ye gu mu goma ye kulundji.Haa mu gilumbu gidadu ba ga shamuga.'' ²⁰ Gu ngoyi bima bina Zebedeyo gendi gwedi Yesu ye baana bandi.Ga fugamani gu milu miandi ye ga mudingi bima. ²¹ Yesu ga mu ledi mbi:"kii wu zodi?"Ga mu ledi mbi:"yagula mbi mu dangu di wu gadi fwuu wu neeni baana ba mami ba bashigumugi,wu moshi gu googu djiagu di gi dada ye weega gu googu djiagu di gi ngudi mu gi fw2umu giandi gi yilu. ²² Haa Yesu ga mu vududidi mbi:"loo wu ba yaba bi wu ba dinga.Bu lu kuga gu nwaa gooba di mapashi di ba peega?"baana bana ba gumbudi mbi:"bu du kuga.'' ²³ Ga ba ledi mbi:"loo gwedi gima,bu lu nwaa.Haa mu gu shigumuga gu googu djiami di gi dada ye di gi ngudi,haa dada wami bu gu hana bihani bina gwedi bana ba ga yidigidi.'' ²⁴ Ba tumwa bana guumi,dangu di bayugi mapandi mana,di ba yugidi bana boodi kabu. ²⁵ Haa Yesu ga ba lendigi ba bootsu gaba ledi mbi:"yabani mbi ba fwumu ba yalaga baadu mu gi ngolu-ngolu,yabani keega mbi baadu ba neeni ba balelaga mbi beedi ye biyega. ²⁶ Haa gu galalegu buna mukadi ga binu.Diadina,wuna wu ba yagula mbi ga gala mukadi ga binu geedi musadi wu Gahungu. ²⁷ Mbi muudu wu moshi mu kadi ga binu bu ga zodi gu gala fwumu ga fani gala muhiga wu baadu beega, ²⁸ gi desu gi moshi ye mwaana muudu,loo gitshi mbi baadu ba musadila,haa ndi witshi hangila baadu,ye gu ba hega mooni wandi nga mbongu dji gadula baadu ba vula mu gihiga gi masumu. ²⁹ Dangu di Yesu ga gadugi gu Yedigo,baadu bavula ba mulandi. ³⁰ Gu gadi ye ba fwii misu boodi ba gadi mu mbimba ndjila ba hwemini.Di ba yugi mbi Yesu ga baluda,ba lendigi mu ndaga yi ngolu mbi:"fwumu,mwaana wu Davidi du yuuga kenda.'' ³¹ Baadu bana ba banganini mbi:"hweminani pweede'',haa ba fwii misu ba yagula kaga mu ndaga yi ngolu mbi:"fwumu,mwaana wu Davidi du yuuga kenda.'' ³² Yesu ga manini,ga ba lendigi ye ga ba yufudi mbi:"lu zodi mbi yi lu hanga kii?" ³³ Ba mu ledi mbi:"fwumu,yambula mbi miisu ma pidu ma dala keega.'' ³⁴ Yesu,ga ba yugidi kenda,ga ba shi lu lembu mu miisu,kaga dangu diadina ba yandigi gu dala keega,gu ngoyi ba mu landi.