¹ Ba fadishi ye ba sadiseya bitshi meega Yesu ba mu yufudi mu gu ba lesa gi dimbu gi moshi gi duga gu yilu. ² Haa Yesu ga ba vududidi:"mu dangu di mashiga lu yagulaga: mbatshi gu gala pimbu,mudiambu yilu di gumi gu beenga.'' ³ Ye mu mashiga lu yagulaga:"lelu mvula yi nogaa mudiambu yilu di gumi gu benga ye gidima.Mbi lu bas dala gu yilu lu fani yaba gumisu mbi kii pila gi lumbu gi gala;haa loo luyabi gu dendula bi dimbu bi dangu di. ⁴ Binu baadu ba dangu di,lwedi baadu ba mbi,loo lwedi kega ye lu gwigilu!lu ba dinga gu dala gi dimbu,haa Gahungu loo gaa lu lesa gi dimbu giega,giana buna gi mbigudi Yona.Bwoona gasadi bashisa,gendi gwandi. ⁵ Dangu di ba longogi gu shimu,ba bidi mu gu neda mapaa. ⁶ Yesu ga ba ledi mbi:"gebani,dalani pimbu mudiambu ye kindji yi mapaa yi ba fadishi ye ba sadiseya''. ⁷ Ba longogi ba yandigi gu saa tembi baa ye baa mbi:"ga ba yagula buna mudiambu loo dushi neda mapaa.'' ⁸ Haa Yesu ga yabi ma banza ma baa,tunda ga ba yufudi mbi:mudiambu ldi kii lu ba saa tembi mbi:"ga ba yagula mudiambu loo dwedi ye mapaa? Loo lwedi ye lugwigilu lu vula.'' ⁹ Loo lu yabi tegu?loo yibugaga ma pandi ma yi hangi dangu di yi geshi mudiambu ye baadu ma fuunda madanu,bi sandji bi gwii lu doguni? ¹⁰ Loo lu yabi dangu di yi geshi mapaa matsambwadi dangu di yi geshi ye bi sandji gwii ludoguni? ¹¹ Kii pila lu fani konda yaba mbi loo yi lu lelagi mudiambu ye mapaa?Haa giebani mudiambu ye kindji yi mapaa yi ba fadishi ye ba sadiseya!'' ¹² Dangu di,ba yabi mbi loo ga ba gebisagi mudiambu ye kindji yi mapaa,haa mudiambu ye malongi ma ba fadishi ye basadiseya. ¹³ Dangu Yesu di ga gumi gu ndambu di bula Sezadiya di Fulubi,ga yufudi ba longogi bandi mbi:"baadu ba ya gulaga mbi mwaana muudu gedi naa?" ¹⁴ Ba yagudi:"baadu beega ba yagulaga ndji wedi Yiowani-mbodigi,beega mbi Ediya,Yelemia mbilo mbigudi wu moshi.'' ¹⁵ Dangu di Yesu ga ba ledi:"haa binu baa lu yagulaga mbi yedi naa?" ¹⁶ Shimoni piela ga vududi mbi:"ndji Kidishidu mwaana Gahungu wu mooni.'' ¹⁷ Yesu ga yagudi mbi:"Shimoni mwaana wu yona,wu yagudi pimbu mudiambu ma pandi maa ma wu yagudi,shi muudu wu moshi loo ga guleshi,haa dada wami wuna wedi gu yilu muudu wu gu ledi. ¹⁸ Haa yi ba gu lu lela mbi:piela,wedi dadi,ya yena ye londi di dadi dina yi dunga di bundu di diami shi lu fwaa loo di lu gama. ¹⁹ Yi gu hega baana-ba tsabi di gi fwumu di Gahungu:ma pandi mana ma wu ganga ndjila aya ye londi di manu,Gahungu bu ga ganga kega ndjila yi maa gu yilu;Ye mana kega ma wu gangula aya ye londi di manu bu ba gangula kega gu yilu.'' ²⁰ Bwoona Yesu ga ledi ba longogi baandi mbi:loo gu lelani shi muudu wu moshi mbi:yedi Kidishidu. ²¹ Yandiga dangu dina,Yesu ga yandigi gu lela ba longogi baandi mbi yi fani gwenda gu yelusalemi guna ba mbuda ba dibundu ye ba longi ba tshigu,ba tadisa pashi.Bu ba nzuwa,haa Gahungu bu ga tshamugisa mu gi lumbu gi dadu. ²² Piela ga mu nedi mu lu hunguluguga:"ga yadigi gu nganina mbi:"mapandi maa gala guleya ye ndi fwumu mapandi maa ma gu yi tshi legu.'' ²³ Haa Yesu di ga balumugi ga ledi piela:"ndi gadipemba gaduga aya gu misu maami wu ba zola ganga ndjila yandi mudiambu loo wedi pashi mu mapandi ma Gahungu,haa mu mapandi ma baadu." ²⁴ bwoona Yesu ga ledi ba longogi bandi:"wuna zodi gu nda-nda,loo ga fani yindula lu ndjingu lwandi ndi beeni,haa ga senda kulundji diandi,gitsa ga nda-nda. ²⁵ Mudiambu muudu wootsu wu zola gu hulusa mooni wandi bu ga mu bidisa,haa muudu wootsu wuna wu bidisa mooni wandi mu gi guma giami bu ga mudala. ²⁶ Kii fwunu muudu mu gu gala ye bima biootsu bi londi di manu haa bidishi mooni wandi?Mbilo kii gima muudu ga fani fuda mudiambu mu gu bonga moonin wandi? ²⁷ Bwoona mwaana muudu ga gwitsa ye ba wandjio bandi mu lu gumu lu dada wandi,bwoona fuda gosu muudu nga bwedi bi salu biandi. ²⁸ Yi ba lu lela ma pandi ma kiediga,gwedi ye baadu beega bedi yaa loo ba fwaa,tii gwoona gu ba dala mwaana muudu witshi mu gi fwumu giandi.''